សំណង់រឹងមួយស្ថិតនៅភូមិទួលរកាទី១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ត្រូវបានអាជ្ញាធរបញ្ជាផ្អាកសាងសង់ តែម្ចាស់សំណង់នៅតែបន្តសកម្មភាពសាងសង់ ដោយមិនអើពើការណែនាំ និងវិធានការរបស់អាជ្ញាធរឡើយ។
ករណីនេះត្រូវបានក្រុមការងារព័ត៌មានចុះផ្តិតយកសកម្មភាព ឡើងវិញនៅថ្ងៃទី៥ ខែតុលា ឆ្នាំ២០២៥ បន្ទាប់ពីអាជ្ញាធរខណ្ឌបានបញ្ជាផ្អាកសំណង់នៅថ្ងៃទី២៥ ខែកញ្ញា មុនពេលនេះ។ ទោះជាយ៉ាងណា ការសាងសង់នៅតែបន្តយ៉ាងសកម្ម ដោយរំលោភលើដីចំណីមាត់ច្រាំងទន្លេ ដែលជាសម្បត្តិរបស់រដ្ឋ។
យោងតាមច្បាប់ស្តីពីសំណង់ និងអនុក្រឹត្យពាក់ព័ន្ធ ការសាងសង់ដោយគ្មានលិខិតអនុញ្ញាត និងការចាក់ដីចូលច្រាំងទន្លេ គឺជាការរំលោភបំពានច្បាប់ ដែលអាចនាំឲ្យមានវិធានការផ្លូវច្បាប់ប្រឆាំងទៅលើម្ចាស់សំណង់។
លោក សេង គន្ធ អភិបាលខណ្ឌមានជ័យ បញ្ជាក់ថា សំណង់នោះត្រូវបានផ្អាករួចហើយ ប៉ុន្តែម្ចាស់សំណង់មិនគោរពតាមកិច្ចសន្យាផ្អាកសាងសង់ទាំងពីរដងនោះទេ។ មន្ត្រីមួយចំនួនក៏ត្រូវបានផ្ដល់ការងារតាមដាន ប៉ុន្តែសកម្មភាពសាងសង់នៅតែបន្ត ដោយបង្ហាញពីភាពអសមត្ថភាពក្នុងការគ្រប់គ្រងតំបន់។
អង្គភាពសារព័ត៌មានសង្ឃឹមថា ឯកឧត្តម ឃួង ស្រេង អភិបាលរាជធានីភ្នំពេញ នឹងចាត់វិធានការផ្ទាល់ ដើម្បីបញ្ឈប់សំណង់ខុសច្បាប់នេះ។ ព្រមទាំងអំពាវនាវឲ្យក្រសួងពាក់ព័ន្ធ ដូចជា ក្រសួងធនធានទឹកនិងឧតុនិយម ក្រសួងរ៉ែនិងថាមពល និងក្រសួងរៀបចំដែនដី នគរូបនីយកម្ម និងសំណង់ ចុះត្រួតពិនិត្យ និងអធិការកិច្ចផ្ទាល់ ដើម្បីធានាថាសំណង់មានភាពស្របច្បាប់។
អង្គភាពសារព័ត៌មានយើង បន្តតាមដានករណីនេះ និងនឹងរាយការណ៍បន្ថែម នៅពេលអាជ្ញាធរពាក់ព័ន្ធឆ្លើយតប។
