បាឋកថាជាស៊េរី «កេរដំណែលរស់៖ គុណតម្លៃ ៧ មករា» មិនមែនរៀបចំឡើងគ្រាន់តែដើម្បីរំឭកពីជីវប្រវត្តិរបស់ថ្នាក់ដឹកនាំជំនាន់មុនប៉ុណ្ណោះទេ ប៉ុន្តែថែមទាំងជាវេទិកាសម្រាប់ផ្ទេរបទពិសោធ មេរៀនប្រវត្តិសាស្ត្រ និងគុណតម្លៃនៃការដឹកនាំទៅកាន់អ្នកជំនាន់ក្រោយផងដែរ។ នេះបើតាមការគូសបញ្ជាក់របស់ឯកឧត្តម ខៀវ កាញារីទ្ធ ឧត្តមប្រឹក្សាផ្ទាល់ព្រះមហាក្សត្រ និងជាសមាជិកគណៈកម្មាធិការកណ្តាល គណបក្សប្រជាជនកម្ពុជា។
ការគូសបញ្ជាក់នេះធ្វើឡើងក្នុងឱកាសដែលឯកឧត្តម ខៀវ កាញារីទ្ធ អញ្ជើញជាវាគ្មិនកិត្តិយសក្នុងវេទិកាបាឋកថាជាស៊េរី «កេរដំណែលរស់៖ គុណតម្លៃ ៧ មករា» នាព្រឹកថ្ងៃទី៦ ខែកញ្ញា ឆ្នាំ២០២៦ នៅវិមាន ៧ មករា។
ក្នុងឱកាសនោះ ឯកឧត្តមបានកោតសរសើរចំពោះគំនិតផ្តួចផ្តើមក្នុងការរៀបចំបាឋកថាជាស៊េរីនេះ ដោយចាត់ទុកថា ជាវេទិកាដ៏មានសារៈសំខាន់សម្រាប់រក្សាខ្សែទំនាក់ទំនងនៃប្រវត្តិសាស្ត្រ និងផ្ទេរបទពិសោធពីជំនាន់មួយទៅជំនាន់មួយ។
ឯកឧត្តមបានបញ្ជាក់ថា ការផ្ទេរចំណេះដឹង និងបទពិសោធពីអ្នកជំនាន់មុនទៅអ្នកជំនាន់ក្រោយ គឺមានសារៈសំខាន់ ដើម្បីកុំឱ្យការយល់ដឹងអំពីអតីតកាល ក៏ដូចជាគុណតម្លៃដែលបានកសាងឡើងតាមរយៈការលះបង់របស់ថ្នាក់ដឹកនាំជំនាន់មុន ត្រូវបាត់បង់ទៅតាមពេលវេលា។
ឯកឧត្តម ខៀវ កាញារីទ្ធ ក៏បានសង្កត់ធ្ងន់ថា ការស្គាល់ប្រវត្តិសាស្ត្រ បរិយាកាសនយោបាយនៃសម័យកាលនីមួយៗ ព្រមទាំងមូលហេតុ និងកាលៈទេសៈដែលនាំទៅដល់ការសម្រេចចិត្តសំខាន់ៗ គឺជាគ្រឹះចាំបាច់សម្រាប់អ្នកជំនាន់ក្រោយ ក្នុងការវាយតម្លៃឱ្យបានត្រឹមត្រូវចំពោះដំណើរតស៊ូ ការលះបង់ និងសមិទ្ធផលដែលថ្នាក់ដឹកនាំជំនាន់មុនបានកសាង និងបន្សល់ទុកជូនជាតិ និងប្រជាជន។
អតីតរដ្ឋមន្ត្រីក្រសួងព័ត៌មានរូបនេះបានបន្ថែមថា តាមរយៈការចែករំលែកដោយផ្ទាល់ពីបទពិសោធដែលថ្នាក់ដឹកនាំជំនាន់មុនធ្លាប់ឆ្លងកាត់ នឹងជួយបង្កើតចំណងនៃការយល់ដឹងរួមរវាងជំនាន់មុន និងជំនាន់ក្រោយ។ ការយល់ដឹងរួមនេះ អាចជួយឱ្យអ្នកជំនាន់ទាំងពីរធ្វើការជាមួយគ្នា បន្តការងារពីគ្នា រួមគ្នាថែរក្សា ពូនជ្រំ និងអភិវឌ្ឍសមិទ្ធផលដែលមានស្រាប់ឱ្យកាន់តែរឹងមាំ។
វេទិកាបាឋកថាជាស៊េរី «កេរដំណែលរស់៖ គុណតម្លៃ ៧ មករា» ត្រូវបានចាត់ទុកថា ជាឱកាសមួយសម្រាប់អ្នកជំនាន់ក្រោយស្វែងយល់កាន់តែស៊ីជម្រៅអំពីប្រវត្តិសាស្ត្រ បទពិសោធ និងគុណតម្លៃដែលបានបន្សល់ទុកពីថ្នាក់ដឹកនាំជំនាន់មុន ដើម្បីយកជាមូលដ្ឋានសម្រាប់បន្តការងារ និងអភិវឌ្ឍសង្គមជាតិទៅមុខ៕
