នៅថ្ងៃទី៤ ខែកញ្ញា ឆ្នាំ២០២៦ ក្រសួងមុខងារសាធារណៈ បានរៀបចំពិធីប្រកាសជាផ្លូវការ «បណ្តាញអគ្គលេខាធិការ នៃក្រសួង ស្ថាប័ន ចំណុះអង្គការនីតិប្រតិបត្តិ» ក្រោមអធិបតីភាព ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ។
«បណ្តាញអគ្គលេខាធិការ» ត្រូវបានបង្កើតឡើងក្នុងគោលបំណងពង្រឹងកិច្ចសហការ និងការសម្របសម្រួលអន្តរក្រសួង ស្ថាប័ន ព្រមទាំងបង្កើនភាពប្រទាក់ក្រឡា និងប្រសិទ្ធភាពនៃប្រព័ន្ធរដ្ឋបាលកណ្តាល តាមរយៈការកំណត់ និងអនុវត្តមុខងារគាំទ្រដោយប្រើប្រាស់ស្តង់ដារតែមួយ។
ក្នុងឱកាសនេះ ការប្រើប្រាស់ថ្នាលឌីជីថល «បាយ័ន» សម្រាប់ការបញ្ជូន និងទទួលឯកសាររវាងក្រសួង ស្ថាប័ន ត្រូវបានចាត់ទុកថាជាការចាប់ផ្តើមដ៏ស្វាហាប់មួយរបស់ «បណ្តាញអគ្គលេខាធិការ» ក្នុងការជំរុញការផ្លាស់ប្តូររដ្ឋបាលទៅរកប្រព័ន្ធឌីជីថល និងការកាត់បន្ថយការប្រើប្រាស់ឯកសារជាក្រដាស។
ថ្លែងក្នុងពិធី ឯកឧត្តម ហ៊ុន ម៉ានី បានគូសបញ្ជាក់ថា ការជួបជុំរបស់អគ្គលេខាធិការនៃក្រសួង ស្ថាប័ន នាពេលនេះ គឺជាសក្ខីភាពនៃការប្តេជ្ញាចិត្តរួមគ្នា ក្រោមស្មារតី «ជវភាពនៃប្រព័ន្ធតួអង្គតែមួយ» ដើម្បីរួមគ្នាកសាងរដ្ឋបាលសាធារណៈកម្ពុជាឱ្យកាន់តែទំនើប មានសមត្ថភាពខ្ពស់ រឹងមាំ វៃឆ្លាត និងស្អាតស្អំ។
ឯកឧត្តម ហ៊ុន ម៉ានី បានបង្ហាញការជឿជាក់ថា «បណ្តាញអគ្គលេខាធិការ» នឹងក្លាយជាបណ្តាញដែលមានភាពសកម្ម បុរេសកម្ម បើកចំហ ផ្អែកលើជំនឿទុកចិត្ត និងផ្តោតលើសមិទ្ធកម្ម ដោយអាចក្លាយជាយន្តការសំខាន់មួយសម្រាប់ការសហការ និងសម្របសម្រួលការងាររវាងក្រសួង ស្ថាប័ន។
ឯកឧត្តមក៏បានស្នើ និងលើកទឹកចិត្តឱ្យក្រសួង ស្ថាប័ន បន្តចូលរួមគាំទ្រ ផ្តល់អាទិភាព និងពង្រឹងកិច្ចសហការ ព្រមទាំងការពិគ្រោះយោបល់ជាប្រចាំ ដើម្បីធានាឱ្យការអនុវត្តផែនការសកម្មភាពឆ្នាំ២០២៦ របស់ «បណ្តាញអគ្គលេខាធិការ» សម្រេចបានលទ្ធផលជាក់ស្តែង។
ការបង្កើត «បណ្តាញអគ្គលេខាធិការ» និងការចាប់ផ្តើមប្រើប្រាស់ថ្នាលឌីជីថល «បាយ័ន» ត្រូវបានរំពឹងថា នឹងរួមចំណែកជំរុញការធ្វើទំនើបកម្មរដ្ឋបាលសាធារណៈ ពង្រឹងប្រសិទ្ធភាពការងារ និងឈានទៅរកការប្រើប្រាស់ប្រព័ន្ធឌីជីថលរួមគ្នាទូទាំងប្រព័ន្ធរដ្ឋបាលសាធារណៈកម្ពុជា៕
