ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានមានប្រសាសន៍គូសបញ្ជាក់ថា ការចូលរួមសហការយ៉ាងសកម្មពីសំណាក់ប្រជាពលរដ្ឋជាមួយអាជ្ញាធរដែនដី គឺជាកាតាលីករ និងជាចំណែកយ៉ាងធំធេងក្នុងការកាត់បន្ថយរាល់បទល្មើស និងភាពអសកម្មផ្សេងៗដែលកើតមានឡើងនៅក្នុងមូលដ្ឋាន និងសហគមន៍ឱ្យមានប្រសិទ្ធភាពខ្ពស់ ។ ប្រសាសន៍ដឹកនាំដ៏ខ្ពង់ខ្ពស់នេះ ត្រូវបានធ្វើឡើងក្នុងឱកាសដែលឯកឧត្តមអភិសន្តិបណ្ឌិត អញ្ជើញជាអធិបតីភាពដ៏ខ្ពង់ខ្ពស់ក្នុងពិធីដុតបំផ្លាញចោលបារីក្លែងម៉ាកជាង ៨០០ តោន និងសម្ភារៈបទល្មើសផ្សេងៗទៀត ដែលកម្លាំងសមត្ថកិច្ចជំនាញស្រាវ ជ្រាវ និងបង្ក្រាបបានក្នុងខេត្តតាកែវ នាពេលកន្លង មក។ ពិធីនេះបានប្រព្រឹត្តទៅនាព្រឹកថ្ងៃទី១៧ ខែកញ្ញា ឆ្នាំ២០២៦ ស្ថិតនៅក្នុងឃុំត្រពាំងធំខាងត្បូង ស្រុកត្រាំកក់ ខេត្តតាកែវ។
នាឱកាសនោះឯកឧត្តមឧបនាយករដ្ឋមន្ត្រីបានសង្កត់ ធ្ងន់ថា បេសកកម្មរក្សាសន្តិសុខ សុវត្ថិភាព និងការបង្ក្រាបបទល្មើសគ្រប់ប្រភេទ មិនមែនជាភារកិច្ចផ្តាច់មុខរបស់អាជ្ញាធរ ឬសមត្ថកិច្ចតែម្នាក់ឯងនោះឡើយ។ កិច្ចការនេះទាមទារឱ្យមានការចូលរួមយ៉ាងសកម្ម និងជិតស្និទ្ធពីគ្រប់ភាគីពាក់ព័ន្ធ ពិសេសគឺបងប្អូនប្រជាពលរដ្ឋផ្ទាល់តែម្តង ព្រោះរាល់សកម្ម ភាពបទល្មើសទាំងឡាយ តែងតែបង្កើតឡើងនៅក្នុងមូលដ្ឋាន។ ដូច្នេះ ប្រជាពលរដ្ឋគឺជាស្ពានចម្លងព័ត៌មានដ៏សំខាន់ ដែលអាចមើលឃើញនូវរាល់បាតុភូតមិនប្រក្រតី និងរាយការណ៍ជូនអាជ្ញាធរមាន សមត្ថកិច្ចបានទាន់ពេលវេលា ដើម្បីបង្ការ ទប់ស្កាត់ និងបង្ក្រាបបានទាន់ហេតុការណ៍ ដែលនេះជាសក្ខីភាពនៃការចូលរួម មិនអាចខ្វះបានក្នុងសង្គម។
ជាមួយគ្នានេះដែរ ឯកឧត្តមអភិសន្តិបណ្ឌិត ស សុខា ក៏បានសម្តែងនូវការកោតសរសើរ និងវាយតម្លៃខ្ពស់ចំពោះអាជ្ញាធរដែនដី កងកម្លាំងប្រដាប់អាវុធ និងមន្ត្រីពាក់ព័ន្ធគ្រប់លំដាប់ថ្នាក់ ដែលបានខិតខំប្រឹង ប្រែងរុញច្រានការអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” យ៉ាងសកម្ម និងទទួលបានលទ្ធផលជាផ្លែផ្កា។ ជាក់ស្តែង ការដកហូត និងដុតបំផ្លាញចោលនូវបារីក្លែងម៉ាកជាង ៨០០ តោន រួមទាំងវត្ថុតាងផ្សេងៗនាពេលនេះ គឺជាសកម្មភាពរួមចំណែកយ៉ាងសំខាន់ក្នុងការការពារសុខភាពសាធារណៈរបស់ប្រជាពលរដ្ឋ និងទប់ស្កាត់ផលប៉ះពាល់ធ្ងន់ធ្ងរដល់សេដ្ឋកិច្ចសង្គមផងដែរ ។
សូមបញ្ជាក់ផងដែរ បើយោងតាមរបាយការណ៍នៃប្រតិបត្តិការបង្ក្រាប វត្ថុតាងដែលត្រូវយកមកដុតបំផ្លាញចោលនាឱកាសនោះ រួមមាន៖ ១. វត្ថុតាងដកហូតពីទីតាំងរោងចក្រ ចំនួន៧អគារ ក្នុងនោះរួមមាន៖ មានម៉ាស៊ីនចម្រុះបម្រើការងារផលិតបារី ចំនួន ៩១ គ្រឿងកុំព្យូទ័រ ចំនួន ៦ គ្រឿង សម្ភារៈពាក់ព័ន្ធគ្មានម៉ាក ចំនួន ១,១២៧,២១៣ គីឡូក្រាម សម្ភារៈពាក់ព័ន្ធពាក់ម៉ាកក្លែង ចំនួន ២៣០,៨៩០ គីឡូក្រាម។ ២. វត្ថុតាងដកហូតពីទីតាំងឃ្លាំងស្តុក រួមមាន បារីពាក់ម៉ាកក្លែង ចំនួន ៣១ ប្រភេទ សរុប ១,៨១៦,៩៦៤ ស៊ុង (ស្មើនឹង ៣៧០,៧៧៣ គីឡូក្រាម) ដែលភាគច្រើនជាបារីម៉ាក ESSE, JET, MEVIUS, Manchester និងបារីពាក់ម៉ាកក្លែងរបស់ប្រទេសចិន និងសំបកវេចខ្ចប់ពាក់ម៉ាកក្លែង ចំនួន ១២២,៥២៧ គីឡូក្រាម ៕
