ឯកឧត្តម ស៊ីយ៉េដ យូសាហ្វ រ៉ាហ្សា ជីឡានី ប្រធានស្ថាបនិកISC និងជាប្រធានព្រឹទ្ធសភាប៉ាគីស្ថាន បានថ្លែងថា សភាមិនមែនជាអ្នកឈរនៅពីក្រៅទេ អ្វីដែលយើងត្រូវធ្វើ គឺត្រូវតែអនុវត្តបន្តរួមគ្នានៅក្នុងស្មារតីកុងសង់ស៊ីស និងភាពស្រុះស្រួលគ្នា។
ការថ្លែងធ្វើឡើង ក្នុងឱកាសចូលរួមសន្និសីទប្រធានសភានៃអន្តរសភា លើកទី២ ដែលកម្ពុជាធ្វើជាម្ចាស់ផ្ទះ ពីថ្ងៃទី២៦ ដល់ថ្ងៃទី២៨ ខែសីហា ឆ្នាំ២០២៦ ដោយមានថ្នាក់ដឹកនាំសភា និងភាគីពាក់ព័ន្ធមកពីជុំវិញពិភពលោក ប្រមាណជាង២០ប្រទេស ចូលរួមផ្លាស់ប្តូរទស្សនៈ ចែករំលែកបទពិសោធ និងចំណេះដឹង ពាក់ព័ន្ធនឹងបញ្ហាប្រឈមនានា ដែលពិភពលោកកំពុងប្រឈម។
ឯកឧត្តម បានបន្តថា ពិភពលោក ត្រូវតែពឹងផ្អែកគ្នា ត្រូវការនូវសាមគ្គីភាព និងសន្តិភាព។ ក្នុងស្មារតីនេះ ដែលនាំយើងឱ្យទៅរកនូវដំណោះស្រាយ ដោយមិនមែនគ្រាន់តែជាពាក្យសម្តី ឬសេចក្តីប្រកាសទេ ប៉ុន្តែត្រូវតែមានការប្តេជ្ញាចិត្តខ្ពស់ និងរឹងមាំជាមួយនឹងលទ្ធផលជាក់ស្តែង ដែលត្រូវតែអនុវត្ត និងសម្រេចឱ្យបាន។
ឯកឧត្តម បានថ្លែងបញ្ជាក់ថា «យើងមានភាពសកម្មរួមគ្នាក្នុងការដោះស្រាយបញ្ហាជាច្រើន ដូចជាការប្រែប្រួលអាកាសធាតុ និងវិបត្តិឆ្លងរីករាលដាលនៃជំងឺសកល ការផ្តល់ជំនួយទៅដល់ការប្រែប្រួលអាកាសធាតុ ការធានានូវវិនិយោគនៅក្នុងវិស័យអប់រំ និងនវានុវត្តន៍។ ឥឡូវនេះ យើងត្រូវតែបង្វែរការប្តេជ្ញាចិត្តទៅជាសកម្មភាពជាក់ស្តែង ជាមួយនឹងកិច្ចសន្ទនា និងអ្វីដែលត្រូវធ្វើបន្តទៀត។ យើងត្រូវតែរៀបចំស្ថាប័ននៃកិច្ចសន្ទនាសភាISC។ យើងត្រូវតែប្រឹងប្រែងធ្វើកិច្ចការងារនៅក្នុងការជួបជុំគ្នាជាប្រចាំឆ្នាំ។ យើងត្រូវតែមានយន្តការច្បាស់លាស់ក្នុងការឆ្លើយតបទៅនឹងវិបត្តិផ្សេងៗ ហើយយើង ក៏ត្រូវការការពង្រឹងនូវការគោរពច្បាប់អន្តរជាតិ ដែលជាមូលដ្ឋានគ្រឹះដ៏សំខាន់ និងរឹងមាំសម្រាប់សុខសន្តិភាពពិភពលោក។ យើងត្រូវតែរក្សាបាននូវអ្វីដែលមិនអាចទស្សន៍ទាយ សំដៅកាត់បន្ថយហានិភ័យ ពិសេសធានាឱ្យបាននូវការអភិវឌ្ឍប្រកបដោយចីរភាព។ សភាត្រូវតែប្រឹងប្រែងធ្វើការងាររួមគ្នា និងមានគណនេយ្យភាពចំពោះប្រជាពលរដ្ឋរបស់ខ្លួន»។
ឯកឧត្តម ប្រធានស្ថាបនិកISC បានបញ្ជាក់នូវការកត់សម្គាល់ថា «ដំណើរផ្លូវរបស់កម្ពុជាគឺមានដំណើរឆ្ពោះទៅមុខយ៉ាងល្អប្រសើរពាក់ព័ន្ធទៅនឹងការដោះស្រាយជម្លោះ និងការកសាងសន្តិភាពកាលពីឆ្នាំ១៩៩៨។ ប្រទេសកម្ពុជា បានបង្ហាញថា សន្តិភាពបានផ្តល់នូវមូលដ្ឋានគ្រឹះដ៏សំខាន់សម្រាប់ការអភិវឌ្ឍប្រទេស ហេដ្ឋារចនាសម្ព័ន្ធ និងការកាត់បន្ថយភាពក្រីក្រ។ ការជួបជុំគ្នានៅរាជធានីភ្នំពេញនាពេលនេះ គឺជាការរំលឹកឱ្យឃើញថា សង្គម និងប្រទេសរបស់កម្ពុជា អាចរួចចាកផុតពីប្រទេសមួយដែលក្រីក្រ ទៅជាប្រទេសដែលមានការអភិវឌ្ឍ តាមរយៈការស្តារ និងការចរចាសន្តិភាព។ ការងាររបស់យើង គឺពាក់ព័ន្ធទៅនឹងការកសាងនូវអ្វីដែលកាន់តែប្រសើរ និងរឹងមាំជាមួយគ្នាសម្រាប់ពិភពលោក។ ពិភពលោកកំពុងតែវិវត្ត ដូច្នេះយើងត្រូវតែរស់នៅជាមួយនឹងសាមគ្គីភាព និងឯកភាពគ្នា។ យើងលើកទឹកចិត្ត និងចង់ឱ្យពិភពលោកមួយកាន់តែប្រសើរឡើង។ យើងត្រូវតែរួបរូមគ្នា ដើម្បីធ្វើឱ្យពិភពលោកប្រកបដោយសុខសន្តិភាព»។
សូមបញ្ជាក់ថា សន្និសីទប្រធានសភានៃអន្តរសភា(ISC) លើកទី២ ដែលកម្ពុជាធ្វើជាម្ចាស់ផ្ទះនាពេលនេះ ដឹកនាំរៀបចំដោយផ្ទាល់របស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាស្ថាបនិកសន្និសីទប្រធានសភានៃអន្តរសភាមួយរូប ក្នុងគោលបំណងដើម្បីកសាងនូវទំនុកចិត្ត តាមរយៈកិច្ចសន្ទនានិងការការពារសន្តិភាព ដោយផ្អែកលើមូលដ្ឋាននៃច្បាប់អន្តរជាតិ៕
