កម្លាំងនគរបាលជាតិនៅថ្ងៃទី៤ ខែតុលា ឆ្នាំ២០២៦ បានបើកប្រតិបត្តិការបង្ក្រាបទីតាំងសង្ស័យពាក់ព័ន្ធបទល្មើសឆបោកតាមប្រព័ន្ធអនឡាញ (Online Scam) មួយកន្លែង នៅអគារកញ្ចក់កម្ពស់ ៣០ជាន់ ស្ថិតក្នុងភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ដោយឃាត់ខ្លួនជនបរទេស និងជនជាតិខ្មែរ សរុបចំនួន ៥៨៧នាក់។
ប្រតិបត្តិការនេះធ្វើឡើងក្រោមការបញ្ជាផ្ទាល់របស់នាយឧត្តមសេនីយ៍ ស ថេត អគ្គស្នងការនគរបាលជាតិ និងដឹកនាំដោយលោកឧត្តមសេនីយ៍ឯក អ៊ី សុឃី អគ្គស្នងការរងនគរបាលជាតិ ដោយមានការសហការពីកម្លាំងគណៈបញ្ជាការឯកភាពខេត្តបន្ទាយមានជ័យ និងក្រោមការសម្របសម្រួលរបស់តំណាងអយ្យការអមសាលាដំបូងខេត្ត។
តាមការបញ្ជាក់របស់មន្ត្រីជាន់ខ្ពស់នៃអគ្គស្នងការដ្ឋាននគរបាលជាតិ ក្នុងចំណោមអ្នកដែលត្រូវបានឃាត់ខ្លួនចំនួន ៥៨៧នាក់ មានស្ត្រី ១០៥នាក់ រួមមាន៖
- ជនជាតិឥណ្ឌូនេស៊ី ៥១៨នាក់ ក្នុងនោះស្ត្រី ៧៦នាក់
- ជនជាតិថៃ ១៨នាក់ ក្នុងនោះស្ត្រី ៦នាក់
- ជនជាតិខ្មែរ ៥១នាក់ ក្នុងនោះស្ត្រី ២១នាក់
មន្ត្រីនគរបាលបានឱ្យដឹងថា តាមការស៊ើបអង្កេតបឋម មេខ្លោងនៃបណ្តាញសង្ស័យពាក់ព័ន្ធបទល្មើសឆបោកនៅទីតាំងនេះ ត្រូវបានស្គាល់ថា ជាជនជាតិថៃ។
ក្នុងប្រតិបត្តិការនេះ សមត្ថកិច្ចក៏បានដកហូតសម្ភារ និងវត្ថុតាងពាក់ព័ន្ធមួយចំនួន ដើម្បីបន្តនីតិវិធីស៊ើបអង្កេត និងចាត់ការតាមច្បាប់។
សមត្ថកិច្ចកំពុងបន្តសាកសួរ និងស្រាវជ្រាវបន្ថែម ដើម្បីកំណត់តួនាទីរបស់អ្នកពាក់ព័ន្ធ និងសកម្មភាពរបស់បណ្តាញនេះ មុនចាត់ការតាមនីតិវិធីច្បាប់៕
