ប្រទេសបារាំង កំពុងប្រឈមទៅលើផលប៉ះពាល់យ៉ាងធ្ងន់ធ្ងរពីអំពើចលាចល និងកុបកម្មដ៏ហិង្សាធំបំផុតមួយក្នុងរយៈពេលជាច្រើនឆ្នាំ បន្ទាប់ពីការតវ៉ាប្រឆាំងនឹងការឡើងថ្លៃទំនិញ និងសេវាសាធារណៈធ្លាក់ចុះ បានបណ្តាលឱ្យបាតុករម្នាក់ស្លាប់ ប៉ូលិសជាង ៦០០នាក់រងរបួស និងមនុស្សជាង ២,០០០នាក់ត្រូវចាប់ខ្លួន។ នេះបើយោងតាមការចេញផ្សាយដោយសារព័ត៌មាន Reuters។
បាតុកម្មទូទាំងប្រទេសកាលពីថ្ងៃសៅរ៍ ដែលមានមនុស្សជាងកន្លះលាននាក់ចូលរួមក្នុងទីក្រុងជាច្រើន បានផ្ទុះទៅជាកុបកម្មហិង្សា ដោយក្រុមជ្រុលនិយមបានដុតបំផ្លាញអគារសាលាក្រុង ប្លន់ហាងទំនិញ វាយបំបែកកញ្ចក់អគារ និងប៉ះទង្គិចជាមួយប៉ូលិស។ នៅទីក្រុងលីម៉ូស ភាគនិរតីប្រទេសបារាំង អគារសាលាក្រុងចំណាស់អាយុកាល ១៤៣ឆ្នាំ ត្រូវរងការដុតបំផ្លាញស្ទើរទាំងស្រុង ខណៈនៅទូទាំងប្រទេស ហាងទំនិញរាប់រយកន្លែងបានរងការខូចខាត ក្នុងនោះក្រុមហ៊ុនលក់រាយយក្ស Carrefour បញ្ជាក់ថា ហាងរបស់ខ្លួនចំនួន ៥០កន្លែងបានរងការខូចខាត និង ២០កន្លែងត្រូវបានគាស់កកាយលួចយកទំនិញ ដែលខាតបង់ទឹកប្រាក់រាប់សិបលានអឺរ៉ូ។
រដ្ឋមន្ត្រីមហាផ្ទៃបារាំងបានឱ្យដឹងថា បាតុករម្នាក់បានស្លាប់ដោយសារគាំងបេះដូងពេលកំពុងតវ៉ាក្នុងទីក្រុងប៉ារីស ប៉ូលិសជាង ៦០០នាក់រងរបួស និងមនុស្សជាង ២,០០០នាក់ត្រូវបានឃាត់ខ្លួន។ រដ្ឋាភិបាលបារាំងបានទម្លាក់កំហុសលើក្រុមឆ្វេងនិយមជ្រុល និងក្រុមទុច្ចរិត ដែលបានឆ្លៀតឱកាសបង្កអំពើហិង្សា និងលួចប្លន់ទ្រព្យសម្បត្តិ ខណៈវិមានអេលីហ្សេបានប្រកាសថា លោក អេម៉ានុយអ៊ែរ ម៉ាក្រុង ប្រធានាធិបតីបារាំង នឹងថ្លែងសុន្ទរកថាទៅកាន់ប្រជាជាតិ ដើម្បីដោះស្រាយវិបត្តិសង្គមដ៏ក្តៅគគុកនេះ។
គួរបញ្ជាក់ថា បាតុកម្មនេះបានផ្តើមចេញពីការតវ៉ារបស់សិស្ស-និស្សិតកាលពីខែមុនជុំវិញបញ្ហាកង្វះគ្រូបង្រៀន និងលក្ខខណ្ឌសិក្សា មុនពេលរីករាលដាលទៅជាការមិនពេញចិត្តទូទាំងសង្គមចំពោះវិសមភាព ការកាត់បន្ថយការចំណាយសាធារណៈ និងការកើនឡើងនៃថ្លៃជីវភាព ដែលកំពុងដាក់សម្ពាធយ៉ាងធ្ងន់ធ្ងរលើលោក ម៉ាក្រុង មុនការបោះឆ្នោតប្រធានាធិបតីនៅឆ្នាំក្រោយ៕
