ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា អត្រាពន្ធថ្មីចំនួន ១០% ដែលសហរដ្ឋអាមេរិកដាក់លើកម្ពុជា មិនមែនយកទៅបូកបន្ថែមលើអត្រា ១៩% នោះទេ។
ក្នុងសន្និសីទសារព័ត៌មានស្ដីពី «អត្រាពន្ធគយថ្មីក្នុងការនាំចេញពីកម្ពុជាទៅសហរដ្ឋអាមេរិក បន្ទាប់ពីការស៊ើបអង្កេតអនុលោមភាពនៃមាត្រា ៣០១ នៃច្បាប់ពាណិជ្ជកម្មសហរដ្ឋអាមេរិក» នៅរសៀលថ្ងៃទី២៧ ខែកក្កដា ឆ្នាំ២០២៦ នាទីស្តីការក្រុមប្រឹក្សាអភិវឌ្ឍន៍កម្ពុជា ឯកឧត្តម ស៊ុន ចាន់ថុល បានឱ្យដឹងថា កាលពីថ្ងៃទី២៣ ខែកក្កដា ឆ្នាំ២០២៦ កម្ពុជាបានទទួលអត្រាពន្ធថ្មីចំនួន ១០% ខណៈប្រទេសមួយចំនួនក្នុងតំបន់អាស៊ាន ក៏ទទួលបានអត្រាដូចគ្នាផងដែរ រួមមាន ម៉ាឡេស៊ី និងឥណ្ឌូនេស៊ី។
ឯកឧត្តមបានបន្តថា អត្រាពន្ធនេះមិនមែនបន្ថែមលើអត្រា ១៩% នោះទេ។ កម្ពុជាត្រូវបង់ពន្ធលើអត្រាពន្ធ MFN ខណៈអត្រាពន្ធ MFN នេះ គឺជាអត្រាពន្ធដែលអនុម័តដោយសភាសហរដ្ឋអាមេរិក មិនមែនអនុម័តដោយរដ្ឋាភិបាលសហរដ្ឋអាមេរិកនោះទេ។ ដូច្នេះ គ្រប់ប្រទេសទាំងអស់ត្រូវបង់ពន្ធលើ MFN បូកជាមួយអត្រាពន្ធ ១០% ឬ ១២.៥%។
ឯកឧត្តមបានបន្តទៀតថា កម្ពុជានៅមានពន្ធ Excess Capacity ដោយក្រោយការស៊ើបអង្កេត ប្រហែលជា ២ ឬ ៣ ខែទៀត សហរដ្ឋអាមេរិកនឹងបញ្ជាក់អំពីពន្ធ Excess Capacity នេះ លើប្រទេសចំនួន ១៦ រួមមាន កម្ពុជា ឥណ្ឌា ចិន ជប៉ុន ម៉ាឡេស៊ី ឥណ្ឌូនេស៊ី សិង្ហបុរី ថៃ វៀតណាម បង់ក្លាដេស សាធារណរដ្ឋកូរ៉េ សហភាពអឺរ៉ុប (EU) ម៉ិកស៊ិក ន័រវែស តៃវ៉ាន់ និងស្វីស។
ឯកឧត្តមបានបញ្ជាក់ថា កម្ពុជាក៏បានពិភាក្សាជាមួយតំណាងពាណិជ្ជកម្មសហរដ្ឋអាមេរិកផងដែរ។ ភាគីសហរដ្ឋអាមេរិកបានបញ្ជាក់ថា កិច្ចព្រមព្រៀងពាណិជ្ជកម្មបដិការដែលបានចុះហត្ថលេខា នៅតែត្រូវបានទទួលស្គាល់។ នេះមានន័យថា ពន្ធ Excess Capacity និង Forced Labor នឹងមិនឱ្យលើសអត្រា ១៩% ឡើយ។ បន្ថែមពីនេះ សហរដ្ឋអាមេរិកក៏បានសន្យាថា នឹងមិនធ្វើឱ្យកម្ពុជាបាត់បង់ភាពប្រកួតប្រជែងជាមួយប្រទេសជិតខាងនោះទេ។
«ថ្ងៃនេះ ខ្ញុំចង់បញ្ជាក់ឱ្យច្បាស់ម្ដងទៀតថា ពន្ធ ១០% មិនមែនបន្ថែមលើ ១៩% ទេ។ អត្រា ១៩% ត្រូវបានលុបចោល ហើយជំនួសមកវិញដោយ Forced Labor និង Excess Capacity ប្រហែលជា ៩%។ អ៊ីចឹង សរុបគឺស្ថិតនៅក្នុងរង្វង់ហ្នឹង។ ប៉ុន្តែ ចំណុចវិជ្ជមាន គឺកម្ពុជាទទួលបាន TRQ (Tariff Rate Quota) ដែលភាគីសហរដ្ឋអាមេរិកកំពុងរៀបចំរូបមន្ត ហើយនឹងផ្ញើមកឱ្យយើង»។
សូមបញ្ជាក់ថា តំណាងពាណិជ្ជកម្មសហរដ្ឋអាមេរិក (USTR) នៅថ្ងៃទី២៤ ខែកក្កដា ឆ្នាំ២០២៦ បានដាក់ពន្ធគយអត្រា ១០% លើកម្ពុជា បន្ទាប់ពីការស៊ើបអង្កេតតាមមាត្រា ៣០១។ ក្នុងពេលជាមួយគ្នានេះ សហរដ្ឋអាមេរិកក៏បានដាក់ពន្ធគយអត្រា ១២.៥% លើប្រទេសចំនួន ៣៨ ផ្សេងទៀត រួមទាំងប្រទេសថៃ និងវៀតណាមផងដែរ៕
