ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងឯកឧត្តម កើត រិទ្ធ ឧបនាយករដ្ឋមន្ត្រី និងជារដ្ឋមន្ត្រីក្រសួងយុត្តិធម៌ បានអញ្ជើញជាអធិបតីក្នុងពិធីដុតបំផ្លាញផលិតផលក្លែងម៉ាក និងសម្ភារពាក់ព័ន្ធ ដែលត្រូវបានសមត្ថកិច្ចក្រសួងមហាផ្ទៃបង្ក្រាប និងរឹបអូសបាននាពេលកន្លងមក នៅភូមិតាគោក ឃុំឈ្វាំង ស្រុកពញាឮ ខេត្តកណ្តាល នាព្រឹកថ្ងៃទី១១ ខែវិច្ឆិកា ឆ្នាំ២០២៦។
យោងតាមរបាយការណ៍របស់លោកឧត្តមសេនីយ៍ឯក មួង សុធា អគ្គស្នងការរងនគរបាលជាតិ បានឱ្យដឹងថា ផលិតផលក្លែងម៉ាក និងសម្ភារពាក់ព័ន្ធដែលត្រូវដុតបំផ្លាញនៅក្នុងពិធីនេះ មានចំនួនសរុបប្រមាណ ៧៥០តោន ដែលជាផលិតផលនៅសេសសល់ពីការបង្ក្រាប និងផលិតផលដែលសមត្ថកិច្ចបង្ក្រាបបានក្នុងត្រីមាសទី៣ ឆ្នាំ២០២៦។ ផលិតផល និងសម្ភារពាក់ព័ន្ធទាំងនោះរួមមាន៖
១. ប្រេងម៉ាស៊ីនម៉ាក Total ចំនួនប្រមាណ ២តោន ដែលបង្ក្រាបបាននៅថ្ងៃទី៦ ខែមិថុនា ឆ្នាំ២០២៤។
២. ប្រេងម៉ាស៊ីនម៉ាក Nova 2T ចំនួនប្រមាណ ១,៥តោន ដែលបង្ក្រាបបាននៅថ្ងៃទី២៤ ខែកក្កដា ឆ្នាំ២០២៤។
៣. អំបោះដេររបួសម៉ាក ETHILON ចំនួនប្រមាណ ០,៤៨តោន ដែលបង្ក្រាបបាននៅថ្ងៃទី១២ ខែសីហា ឆ្នាំ២០២៤។
៤. បារីក្លែងម៉ាក និងសំបកវេចខ្ចប់ ចំនួនប្រមាណ ៥៨តោន ដែលបង្ក្រាបបាននៅថ្ងៃទី១២ ខែវិច្ឆិកា ឆ្នាំ២០២៤។
៥. គ្រឿងអេឡិចត្រូនិកម៉ាក Apple ចំនួនប្រមាណ ០,៦៥តោន ដែលបង្ក្រាបបាននៅថ្ងៃទី១២ ខែឧសភា ឆ្នាំ២០២៥។
៦. សម្លៀកបំពាក់ម៉ាក Boss ចំនួនប្រមាណ ០,៦៥តោន ដែលបង្ក្រាបបាននៅថ្ងៃទី១៥ ខែកក្កដា ឆ្នាំ២០២៥។
៧. បន្ទះបិទបញ្ចុះកម្ដៅម៉ាក Cool-Kid ចំនួនប្រមាណ ១,៦តោន ដែលបង្ក្រាបបាននៅថ្ងៃទី៤ ខែធ្នូ ឆ្នាំ២០២៥។
៨. ថ្នាំដុសធ្មេញម៉ាក Sogate និង Crogate ចំនួនប្រមាណ ១៦តោន ដែលបង្ក្រាបបាននៅថ្ងៃទី២២ ខែមករា ឆ្នាំ២០២៦។
៩. បារីក្លែងម៉ាក និងសំបកវេចខ្ចប់ ចំនួនប្រមាណ ៤៥៥តោន ដែលបង្ក្រាបបាននៅថ្ងៃទី២៣ ខែមិថុនា ឆ្នាំ២០២៦។
១០. បារីក្លែងម៉ាក និងសំបកវេចខ្ចប់ ចំនួនប្រមាណ ២១២តោន ដែលបង្ក្រាបបាននៅថ្ងៃទី២១ ខែតុលា ឆ្នាំ២០២៦។
ពិធីដុតបំផ្លាញផលិតផលក្លែងម៉ាក និងសម្ភារពាក់ព័ន្ធទាំងនេះ គឺជាផ្នែកមួយនៃការអនុវត្តច្បាប់ និងការបង្ក្រាបបទល្មើសពាក់ព័ន្ធនឹងការផលិត ការនាំចូល និងការចែកចាយផលិតផលក្លែងម៉ាក ដើម្បីរួមចំណែកការពារសិទ្ធិម្ចាស់ម៉ាកសញ្ញា និងផលប្រយោជន៍អ្នកប្រើប្រាស់៕











