ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ លើកឡើងថា ការកសាងមូលធនមនុស្ស គឺជាការវិនិយោគរយៈពេលវែងដែលទាមទារឱ្យមានការចូលរួមពីគ្រប់ភាគីពាក់ព័ន្ធ ទាំងរាជរដ្ឋាភិបាល ស្ថាប័នអប់រំ លោកគ្រូ អ្នកគ្រូ មាតាបិតា អាណាព្យាបាល និងសហគមន៍ទាំងមូល។ កុមារម្នាក់ ឬយុវជនម្នាក់ ដែលទទួលបានការអប់រំល្អ អាចក្លាយជាគ្រូបង្រៀន វេជ្ជបណ្ឌិត វិស្វករ សហគ្រិន មន្ត្រីរាជការ ឬក៏អ្នកជំនាញក្នុងវិស័យផ្សេងៗ ដែលនឹងចូលរួមចំណែកកសាងប្រទេសជាតិនៅថ្ងៃអនាគត។
ការលើកឡើងបែបនេះ ធ្វើឡើងនៅព្រឹកថ្ងៃទី១៨ ខែវិច្ឆិកា ឆ្នាំ២០២៦ ក្នុងពិធីសម្ពោធដាក់ឱ្យប្រើប្រាស់អគារសិក្សាថ្មីរបស់អង្គការតុកកែញញឹមកម្ពុជា ស្ថិតនៅក្នុងឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង ដែលមានបន្ទប់រៀនចំនួន៨បន្ទប់ ព្រមទាំងបរិក្ខារសិក្សាសំខាន់ៗ ដើម្បីគាំទ្រដល់ការសិក្សារបស់សិស្សានុសិស្សចំនួន១៦៣នាក់ ចាប់ពីថ្នាក់ទី៧ ដល់ថ្នាក់ទី១០ សំដៅរួមចំណែកលើកកម្ពស់ឱកាសទទួលបានការអប់រំ ប្រកបដោយគុណភាព សម្រាប់កុមារនៅខេត្តកំពង់ឆ្នាំង។
អគារសិក្សាថ្មីនេះ ជាផ្នែកមួយនៃការពង្រីកហេដ្ឋារចនាសម្ព័ន្ធអប់រំរបស់អង្គការតុកកែញញឹមកម្ពុជា ដើម្បីឆ្លើយតបទៅនឹងកំណើនចំនួនសិស្សានុសិស្ស និងការពង្រីកកម្រិតថ្នាក់សិក្សា ខណៈឆ្នាំសិក្សា២០២៦-២០២៧ សាលាមានសិស្សានុសិស្សសរុប៦០៤នាក់ ក្នុង២៦ថ្នាក់ ដោយផ្តល់ការអប់រំ រួមផ្សំជាមួយការអភិវឌ្ឍបំណិនជីវិត ការគាំទ្រផ្នែកអាហារូបត្ថម្ភ សុខភាព និងអនាម័យ។ នេះបើតាមការឱ្យដឹងរបស់លោក ងន់ សុខលាភ នាយកប្រតិបត្តិអង្គការតុកកែញញឹមកម្ពុជា។
ឯកឧត្តមឧបនាយករដ្ឋមន្ត្រី ហ៊ុន ម៉ានី ចាត់ទុកសមិទ្ធផលថ្មីនេះ ជាការពង្រីកហេដ្ឋារចនាសម្ព័ន្ធអប់រំរបស់សាលា និងបើកឱកាសកាន់តែទូលំទូលាយ សម្រាប់ការអប់រំដល់កុមារ និងយុវជនក្នុងសហគមន៍នេះ ឱ្យទទួលបាននូវការអប់រំប្រកបដោយគុណភាព និងអាចទទួលបានការសិក្សាកាន់តែប្រសើរឡើង។ ឯកឧត្តម បានសង្កត់ធ្ងន់ថា ការអប់រំ និងការបណ្តុះបណ្តាលជំនាញវិជ្ជាជីវៈ ត្រូវមានការផ្សារភ្ជាប់គ្នា ដើម្បីឱ្យយុវជនអាចយកចំណេះដឹងផ្នែកទ្រឹស្តី និងការអនុវត្តក្នុងការងារជាក់ស្តែង ឆ្លើយតបទៅនឹងតម្រូវការទីផ្សារការងារជាក់ស្តែង។
សូមបញ្ជាក់ថា អង្គការតុកកែញញឹមកម្ពុជា (Smiling Gecko Cambodia) គឺជាអង្គការមិនមែនរដ្ឋាភិបាលក្នុងស្រុកមួយ ដែលធ្វើការលើការអភិវឌ្ឍសហគមន៍ ដោយផ្តោតលើការអប់រំ ការជួយសង្គ្រោះ និងលើកកម្ពស់ជីវភាពគ្រួសារក្រីក្រនិងងាយរងគ្រោះ តាមរយៈការផ្តល់ចំណេះដឹង ជំនាញ និងការងារ ដើម្បីឱ្យពួកគេអាចពឹងផ្អែកលើខ្លួនឯងបានយូរអង្វែង។ អង្គការនេះ ត្រូវបានចុះបញ្ជីស្របច្បាប់នៅឆ្នាំ២០១៤ បន្ទាប់បង្កើតនៅឆ្នាំ២០១២ និងមានបរិវេណគម្រោងលើផ្ទៃដីប្រមាណ១៥០ហិកតា ស្ថិតនៅក្នុងស្រុកសាមគ្គីមានជ័យ ខេត្តកំពង់ឆ្នាំង មានចម្ងាយប្រមាណ៦០គីឡូម៉ែត្រ ពីរាជធានីភ្នំពេញ៕





