ឯកឧត្តមអភិសន្តិបណ្ឌិត ស សុខា ឧបនាយរដ្ឋមន្រ្តី រដ្ឋមន្រ្តីក្រសួងមហាផ្ទៃបានគួសបញ្ជាក់ថា មរណភាពរបស់កុមារី ជាសិស្សសាលាប៊ែលធី សាខាព្រែកតាមាក់ គឺជាការបាត់បង់យុវជនបន្តវេនរបស់កម្ពុជា។
ក្នុងសារចូលរួមរំលែកទុក្ខដ៏ក្រៀមក្រំបំផុតជាមួយក្រុមគ្រួសារសិស្សានុសិស្សបានបាត់បង់ជីវិតក្នុងឧប្បទ្ទវហេតុគ្រោះថ្នាក់ចរាចរណ៍នៅព្រឹកថ្ងៃទី១០ ខែវិច្ឆិកា ឆ្នាំ២០២៦ ឯកឧត្តម ឧបនាយរដ្ឋមន្រ្តី ស សុខាលើកឡើងថា ក្នុងឧប្បទ្ទវហេតុគ្រោះថ្នាក់ចរាចរណ៍ ដ៏សោកសង្រេងនៅលើកំណាត់ផ្លូវជាតិលេខ៨ ក្នុងស្រុកខ្សាច់កណ្តាល បណ្តាលឱ្យបាត់បង់ជីវិតសិស្សសាលាចំនួន ៥នាក់ រស់នៅស្រុកពារាំង ខេត្តព្រៃវែងនេះ គឺជាសោកនាដកម្មដ៏សែនខ្លោចផ្សាមួយ និងជាការបាត់បង់នូវយុវជនបន្តវេន ដែលជាធនធានមនុស្សដ៏សំខាន់សម្រាប់ប្រទេសជាតិ នាពេលអនាគត ។
ឯកឧត្តមបន្តថា ជាមួយនឹងហេតុការណ៍នេះ ពិតជាបាននិងកំពុងធ្វើឱ្យក្រុមគ្រួសារនៃសពទាំងអស់ ឈឺចាប់ ក្តុកក្តួល ខ្លោចផ្សាចិត្ត រកអ្វីប្រៀបផ្ទឹមពុំបាន នៅពេលដែលទទួលបានដំណឹងដ៏សោកសង្រេងនេះ ពិសេសនៅពេលឃើញសាកសព ពិតជាមិនអាចទទួលយកបាន ប៉ុន្តែបានកើតឡើងរួចទៅហើយ។
សូមបញ្ជាក់ថា នៅព្រឹកថ្ងៃទី១០ ខែវិច្ឆិកា ឆ្នាំ២០២៦ មានករណីភ្ញាក់ផ្អើលមួយបានកើតឡើងដោយសាររថយន្តឯកជនមួយបានដឹកសិស្សសាលាប៊ែលធីចំនួន២៦នាក់ បានក្រឡាប់ធ្លាក់ចូលទឹកស្រះស្ថិតក្នុងភូមិអន្លុង ឃុំព្រែកតាមាក់ ស្រុកខ្សាច់កណ្តាល ខេត្តកណ្តាលបណ្តាលឱ្យសិស្សស្រីស្លាប់ចំនួន៥នាក់ភ្លាមៗតែម្តង ។ សិស្សទាំង៥នាក់នោះ រស់នៅស្រុកពារាំង ខេត្តព្រៃវែង ៕


