ភ្នំពេញ ៖ កាលពីថ្ងៃទី៣១ ខែមីនា ឆ្នាំ២០២៥កន្លងទៅ ក្រសួងអប់រំ យុវជន និងកីឡា បានចេញសេចក្តីថ្លែងការណ៍មួយច្រានចោលការដាក់ចំណាត់ថ្នាក់អប់រំរបស់កម្ពុជានៃគេហទំព័រ World opulation Review 2025 នៅលេខរៀងទី១២០ ក្នុងចំណោម ២០៣ប្រទេសកាលពីពេលថ្មីៗនេះ ពោល គឺទាបជាងប្រទេសឡាវ និងទីម័រខាងកើត ។
ក្រសួងអប់រំ យុវជន និងកីឡា បានអះអាងថា វិយអប់រំកម្ពុជាមានវឌ្ឍនភាពទាំងបរិមាណ និងគុណភាព ហើយមិនអន់ជាងឡាវ និងទីម័រខាងកើតឡើយ។នៅក្នុងសេចក្តីឆ្លើយតប និងការបំភ្លឺទៅកាន់គេហទំព័រ World Population Review 2025 ក្រសួងអប់រំ យុវជន និងកីឡា បានលើកយកចំណុចសំខាន់ៗជាច្រើនមកបង្ហាញក្នុងន័យថា វិស័យអប់រំនៅកម្ពុជាមិនស័ក្តិសមជាប់ចំណាត់ថ្នាក់លេខ១២០ ក្នុងចំណោមប្រទេសចំនួន ២០៣ឡើយ ។
តាមក្រសួងអប់រំ យុវជន និងកីឡា ការចាត់ចំណាត់ថ្នាក់អប់រំរបស់ World Population Review បានផ្តោតទៅលើចំណុចចំនួន៣ រួមមាន ប្រព័ន្ធអប់រំសាធារណៈដែលត្រូវបានអភិវឌ្ឍយ៉ាងល្អ ការចូលរៀននៅសាកលវិទ្យាល័យ និងការអប់រំប្រកបដោយគុណភាពខ្ពស់ ។ សេចក្តីថ្លែងការណ៍របស់ក្រសួងអប់រំ យុវជន និងកីឡា បញ្ជាក់ថា វិធីសាស្ត្រនៃការចាត់ចំណាត់ថ្នាក់អប់រំដោយផ្អែកលើការស្ទង់មតិ និងយល់ឃើញជាសាធារណៈបែបនេះ កំពុងត្រូវបានពិនិត្យ និងច្រានចោលដោយក្រុមជំនាញរបស់ប្រទេសមួយចំនួន ។
ក្រសួងបានលើកយកឧទាហរណ៍ខ្លះៗមកបង្ហាញថា ការវាយតម្លៃរបស់ World Population Review មិនត្រឹមត្រូវនៅត្រង់ថា វិស័យអប់រំរបស់ប្រទេសទីម័រខាងកើត មិនអាចប្រសើរជាងម៉ាឡេស៊ី ហើយវិស័យអប់រំឡាវ ក៏មិនអាចប្រសើរជាងថៃដែរ ព្រោះម៉ាឡេស៊ីនិងថៃ សុទ្ធសឹងជាប្រទេសដែលមានការវាយតម្លៃគុណភាពអប់រំកម្រិត PISA(Programme for ternational Student Assessment) ។ សម្រាប់កម្ពុជា ក្រសួងអប់រំ យុវជន និងកីឡា បានទាញការសន្និដ្ឋានថា ប្រទេសឡាវ និងទីម័រខាងកើត មិនមានភាពល្អប្រសើរជាងប្រទេសកម្ពុជា និងប្រទេសថៃនៅឡើយ ទាំងការអប់រំចំណេះដឹងទូទៅ និងឧត្តមសិក្សា ។
ជាមួយគ្នានេះ ក្រសួងអប់រំ យុវជន និងកីឡាក៏បានលើកឡើងពីលក្ខណៈវិទ្យាសាស្ត្រដែលតម្រូវឲ្យការចាត់ថ្នាក់អប់រំជាលក្ខណៈអន្តរជាតិត្រូវធ្វើឡើងដោយពិនិត្យទៅលើកត្តាជាច្រើនដូចជា អត្រាអក្ខរកម្ម និងលទ្ធផលសិក្សា លទ្ធភាពទទួលបានការអប់រំ គុណភាពនៃការបង្រៀននិងកម្ម
វិធីសិក្សា ប្រសិទ្ធភាពរបស់គ្រូ ភាពពាក់ព័ន្ធនៃកម្មវិធីសិក្សា និងវិធីសាស្ត្រគរុកោសល្យ ហេដ្ឋារចនាសម្ព័ន្ធអប់រំ ការវិនិយោគរបស់រដ្ឋាភិបាលលើវិស័យអប់រំ ឧត្តមសិក្សា និងស្រាវជ្រាវ។ល។ជារួម ក្នុងរយៈពេល១០ឆ្នាំចុងក្រោយនេះ វិស័យអប់រំកម្ពុជាសម្រេចបានវឌ្ឍនភាពទាំងបរិមាណ និងគុណភាព ។
ទោះជាយ៉ាងណា បញ្ហាប្រឈមនៅតែមាន ដែលទាមទារឲ្យភាគីពាក់ព័ន្ធគ្រប់រូបធ្វើការរួមគ្នា ដើម្បីបន្តពង្រឹងវិស័យអប់រំកម្ពុជាបន្ថែមទៀត ។ World Population Review 2025 បានចាត់ចំណាត់ថ្នាក់អប់រំកម្ពុជានៅលេខរៀងទី១២០ ក្នុងចំណោម២០៣ប្រទេស ។ ចំណែកទីម័រខាងកើតនៅលេខរៀងទី ៦៩ ម៉ាឡេស៊ីទី៨៩ ឡាវទី ១០២ ថៃទី ១០៧ និងភូមាស្ថិតនៅលេខរៀងទី១០៩ ៕
