អាម៉េរិក៖ នៅក្នុងវីដេអូកាលពីថ្ងៃពុធនេះ បានបង្ហាញពីតារាងពន្ធគយដែលប្រធានាធិបតីអាម៉េរិក លោក ដូណាល់ ត្រាំ (Donald Trump) កំពុងអនុវត្ត ដើម្បីផ្គូផ្គងកាតព្វកិច្ចពន្ធដែលប្រទេសផ្សេងៗបានកំណត់លើទំនិញរបស់អាម៉េរិក។
ថ្លែងនៅឯសួនផ្កាកុលាបក្នុងសេតវិមាន លោកត្រាំ (Trump) បានប្រកាសថា លោកនឹងកំណត់ពន្ធជាមូលដ្ឋាន ១០% លើផលិតផលនាំចូលទាំងអស់ និងបានបង្ហាញតារាងដែលបញ្ជាក់ពីការបង្កើនពន្ធខ្ពស់លើផលិតផលនាំចូលពីប្រទេសជាដៃគូពាណិជ្ជកម្មជាច្រើន រួមមានទាំង ៣៤% លើប្រទេសចិន និង ២០% លើសហភាពអឺរ៉ុប។ លើសពីនេះ ក៏នៅមានបន្ថែមពន្ធ ២៥% លើរថយន្ត និងគ្រឿងបន្លាស់រថយន្តថែមទៀតផង ។
ខាងលើនេះ លោកត្រាំ (Trump) ចង់បញ្ជាក់ថា គោលដៅនៃការដំឡើងពន្ធលើទំនិញនាំចូលទាំងអស់នេះ គឺដើម្បីលើកទឹកចិត្តដល់ការវិលត្រឡប់នៃឧស្សាហកម្មផលិតកម្មសំខាន់ៗទៅកាន់សហរដ្ឋអាមេរិកឡើងវិញ។ តាមរយៈការធ្វើឱ្យទំនិញបរទេសមានតម្លៃថ្លៃជាងមុនក្រោមមធ្យោបាយដំឡើងពន្ធគយ គំនិតនេះ នឹងធ្វើឱ្យក្រុមហ៊ុនអាម៉េរិក កាន់តែមានភាពទាក់ទាញសម្រាប់ផលិតទំនិញក្នុងស្រុក ជាជាងពឹងផ្អែកលើការនាំចូលពីប្រទេសផ្សេងទៀត។ វាក៏នឹងជួយកសាងឡើងវិញ ព្រមទាំងពង្រឹងវិស័យផលិតកម្មរបស់សហរដ្ឋអាម៉េរិក ។
សំណុំពន្ធចុងក្រោយបំផុតដែលសហរដ្ឋអាម៉េរិកកំណត់គិតចាប់ពីថ្ងៃទី២ ខែមេសា ត្រូវគេរំពឹងថា នឹងធ្វើឱ្យមានតានតឹងកាន់តែខ្លាំងបន្ថែមទៀតដល់សេដ្ឋកិច្ចពិភពលោក ដែលទើបតែចាប់ផ្ដើមងើបឡើងវិញពីការប្រឈមផ្នែកអតិផរណា ក្រោយរងគ្រោះដោយសារតែវិបត្តិជំងឺកូវីដ១៩។ ស្របពេលសេដ្ឋកិច្ចពិភពលោក កំពុងជួបបញ្ហារួចទៅហើយ ដោយសារតែបំណុលដ៏ច្រើន ខណៈភាពមិនច្បាស់លាស់ផ្នែកភូមិសាស្ត្រនយោបាយ ជម្លោះយោធានយោបាយ ឬយោធារវាងប្រទេសនានា បានបង្កើននូវអស្ថិរភាពបន្ថែមទៀត ។
របៀបដែលលោកត្រាំ (Trump) និងមេដឹកនាំប្រទេសផ្សេងទៀតកំពុងធ្វើនៅពេលនេះ អាចនាំឱ្យមានការផ្លាស់ប្តូរដ៏សំខាន់នៅក្នុងប្រព័ន្ធស្នូលរបស់ពិភពលោក ដែលសេដ្ឋកិច្ចនៅតាមប្រទេសជាច្រើន ធ្លាប់តែពឹងផ្អែកលើសហរដ្ឋអាម៉េរិកនូវភាពរឹងមាំ និងស្ថិរភាពរហូតមកដល់ពេលបច្ចុប្បន្ន ។
ក្នុងរយៈពេលដ៏ខ្លីខាងមុខ ឥទ្ធិពលនៃការកំណត់ពន្ធគយថ្មីៗទាំងអស់នោះ នឹងធ្វើឱ្យតម្លៃទំនិញរាប់ពាន់មុខកាន់តែកើនឡើងខ្ពស់ ហើយទំនងជានឹងធ្វើឱ្យតម្រូវការថយចុះ ពីអ្នកប្រើប្រាស់ និងអាជីវកម្មជុំវិញពិភពលោក។ តាមរយៈសម្រង់តួលេខចេញពីប្រភពនានា បានឱ្យដឹងថា ពន្ធលើប្រទេសចិនមានចំនួន ៣៤% បន្ថែមពីលើពន្ធចាស់ ២០% នាំឱ្យពន្ធសរុបកើនឡើង ៥៤%, សហភាពអឺរ៉ុប ២០%, ជប៉ុន ២៤%, អូស្ត្រាលី ១០%, ឥណ្ឌា ២៦%, កូរ៉េខាងត្បូង ២៥%, តៃវ៉ាន់ ៣២%, បង់ក្លាដេស្ហ ៣៧%, ស្វីស ៣១%, អាហ្វ្រិកខាងត្បូង ៣០%, អ៊ីស្រាអែល ១៧%, ស្រីលង្កា ៤៤% និងប្រទេសជាច្រើនទៀត។ ដោយឡែក ប្រទេសក្នុងតំបន់អាស៊ាន រួមមាន វៀតណាម ៤៦%, កម្ពុជា ៤៩%, មីយ៉ាន់ម៉ា ៤៤%, ឥណ្ឌូណេស៊ី ៣២%, ប្រទេសថៃ ៣៦%, ម៉ាឡេស៊ី ២៤%, ហ្វីលីពីន ១៧%, សិង្ហបុរី ១០%, ឡាវ ៤៨% ៕
