ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានបញ្ជាក់តាមរយៈបណ្តាញសង្គម នៅរសៀលថ្ងៃទី២៣ ខែតុលា ឆ្នាំ២០២៦ ថា ការក្លែងបន្លំខ្លួនជាសមត្ថកិច្ច និងការប្រើប្រាស់អំណាចខុសច្បាប់ ដើម្បីគំរាមកំហែង ឃាត់ខ្លួន ឬទាមទារផលប្រយោជន៍ពីប្រជាពលរដ្ឋ គឺជាសកម្មភាពដែលត្រូវចាត់ការតាមច្បាប់យ៉ាងម៉ឺងម៉ាត់។
ឯកឧត្តមបានបញ្ជាក់ថា ការក្លែងឯកសារសាធារណៈ ឬបណ្ណសម្គាល់ខ្លួនជាសមត្ថកិច្ច ការស្លៀកពាក់ឯកសណ្ឋានសមត្ថកិច្ចដោយខុសច្បាប់ និងការបន្លំខ្លួនជាមន្ត្រីមានសមត្ថកិច្ច ដើម្បីឃាត់សួរ ឆែកឆេរ សំឡុត គំរាមកំហែង ឬចាប់នាំខ្លួនប្រជាពលរដ្ឋដោយខុសច្បាប់ ក្នុងគោលបំណងទាញយកផលប្រយោជន៍ គឺជាសកម្មភាពដែលអាចប្រឈមនឹងការទទួលខុសត្រូវតាមផ្លូវច្បាប់។
ឯកឧត្តមបានស្នើឱ្យអាជ្ញាធរ និងសមត្ថកិច្ចក្នុងក្របខ័ណ្ឌក្រសួងមហាផ្ទៃ អនុវត្តនីតិវិធីស៊ើបអង្កេតស្រាវជ្រាវ កំណត់អត្តសញ្ញាណជនសង្ស័យ និងចាត់វិធានការតាមច្បាប់ ព្រមទាំងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី។
ជាមួយគ្នានេះ ឯកឧត្តមក៏បានព្រមានចំពោះមន្ត្រីក្នុងក្រសួងមហាផ្ទៃ ដែលប្រព្រឹត្តផ្ទុយពីច្បាប់ ឬប្រើប្រាស់តួនាទី និងអំណាចដោយគ្មានភារកិច្ច ដើម្បីបង្ខិតបង្ខំ បំភ័យ ឬទាមទារផលប្រយោជន៍ពីប្រជាពលរដ្ឋ។
សកម្មភាពបែបនេះអាចជាការបំពានវិន័យ និងជាបទល្មើសព្រហ្មទណ្ឌ ដែលត្រូវចាត់វិធានការតាមច្បាប់ រួមទាំងការពិន័យវិន័យ និងការបញ្ជូនសំណុំរឿងទៅអង្គភាពប្រឆាំងអំពើពុករលួយ ប្រសិនបើមានមូលដ្ឋានតាមនីតិវិធី។
ឯកឧត្តមបានបញ្ជាក់បន្ថែមថា ការបង្ក្រាបដោយបន្លំភស្តុតាង ឬបង្កើតព័ត៌មានដាក់បន្ទុកលើប្រជាពលរដ្ឋដែលគ្មានកំហុស ក៏ជាបញ្ហាដែលត្រូវយកចិត្តទុកដាក់ និងស៊ើបអង្កេតឱ្យបានហ្មត់ចត់ ដើម្បីធានាថា ការអនុវត្តច្បាប់ប្រព្រឹត្តទៅដោយត្រឹមត្រូវ និងយុត្តិធម៌។
ក្នុងឱកាសនេះ ឯកឧត្តមបានអំពាវនាវដល់ប្រជាពលរដ្ឋដែលបានជួបប្រទះ ឬមានព័ត៌មានពាក់ព័ន្ធនឹងសកម្មភាពខាងលើ ឱ្យប្រញាប់រាយការណ៍ ឬដាក់ពាក្យបណ្ដឹងទៅកាន់អាជ្ញាធរ និងអង្គភាពនគរបាលដែលនៅជិតបំផុត រួមមាន ប៉ុស្តិ៍នគរបាលរដ្ឋបាលឃុំ-សង្កាត់ អធិការដ្ឋាននគរបាលក្រុង-ស្រុក-ខណ្ឌ និងស្នងការដ្ឋាននគរបាលរាជធានី-ខេត្ត។
លើសពីនេះ ឯកឧត្តមបានលើកទឹកចិត្តឱ្យប្រជាពលរដ្ឋប្រើប្រាស់ប្រព័ន្ធទទួលពាក្យបណ្ដឹងតាមអនឡាញរបស់អគ្គាធិការដ្ឋានក្រសួងមហាផ្ទៃ ក្នុងករណីចាំបាច់ តាមរយៈតំណភ្ជាប់៖ https://css-gdin.interior.gov.kh/home ។
ជាចុងក្រោយ ឯកឧត្តមបានថ្លែងអំណរគុណចំពោះមតិយោបល់ សំណើ និងសំណូមពររបស់ប្រជាពលរដ្ឋគ្រប់មជ្ឈដ្ឋាន ដោយសង្កត់ធ្ងន់លើសារៈសំខាន់នៃការចូលរួមរាយការណ៍ពីភាពមិនប្រក្រតី ដើម្បីរួមគ្នាលើកកម្ពស់ការអនុវត្តច្បាប់ ការទទួលខុសត្រូវ និងការការពារសិទ្ធិស្របច្បាប់របស់ប្រជាពលរដ្ឋ។