ប្រធានាធិបតីអាម៉េរិក លោក ដូណាល់ ត្រាំ សន្យារៀបចំរចនាសម្ព័ន្ធគ្រប់គ្រងនៅវេណេហ្ស៊ូអ៊ីឡាឱ្យបានត្រឹមត្រូវ ក្រោមកិច្ចសហការជាមួយមេដឹកនាំថ្មី

តាមរយៈសន្ទរកថាថ្មីៗនេះពាក់ព័ន្ធនឹងការផ្លាស់ប្តូរនយោបាយនៅប្រទេសវេណេហ្ស៊ូអ៊ីឡា ប្រធានាធិបតីអាម៉េរិក លោក ដូណាល់ ត្រាំ បានដាក់ចេញនូវយុទ្ធសាស្ត្រដោះស្រាយដោយផ្ទាល់ ដោយមានការចូលរួមពីសមាជិកសំខាន់ៗនៃគណៈរដ្ឋមន្ត្រីរបស់លោក រួមមានលោក ហេកសេត (Hegseth) និងលោកម៉ាកូរ៉ូបីយ៉ូ (Marco Rubio)។ លោកត្រាំ បានសង្កត់ធ្ងន់ថា សហរដ្ឋអាម៉េរិកមិនមែនដកមេដឹកនាំបច្ចុប្បន្នចេញ ហើយទុកប្រទេសនេះឱ្យធ្លាក់ចូលទៅក្នុងភាពវឹកវរនោះទេ។ លោកកត់សម្គាល់ថា ប្រសិនបើគ្មានការចូលរួមរៀបចំរចនាសម្ព័ន្ធ(ប្រព័ន្ធគ្រប់គ្រង)ឱ្យបានត្រឹមត្រូវនោះទេ វេណេហ្ស៊ូអ៊ីឡា នឹងមិនមានឱកាសក្នុងការងើបឡើងវិញឡើយ ។

លោកប្រធានាធិបតីត្រាំ បានបង្ហើបថា អនុប្រធានាធិបតីដែលតែងតាំងដោយលោក ម៉ាឌូរ៉ូ (ពេលនៅកាន់អំណាច) ត្រូវបានគេស្គាល់ឈ្មោះថា ឌែលស៊ី រ៉ូឌ្រីហ្គេស (Delcy Rodríguez) បានជជែកគ្នាយ៉ាងវែងឆ្ងាយជាមួយលោក ម៉ាកូ រ៉ូប៊ីយ៉ូ (Marco Rubio) រួចហើយ។ តាមសម្តីលោកត្រាំ លោកស្រីអនុប្រធានាធិបតីរូបនោះ បានបង្ហាញឆន្ទៈក្នុងការសហការតាមតម្រូវការរបស់អាម៉េរិក។ លោកត្រាំ បានពិពណ៌នាថា លោកស្រីមានអាកប្បកិរិយា «សមរម្យខ្លាំងណាស់» ប៉ុន្តែលោកក៏បានបញ្ជាក់ដែរថា ស្ថានភាពនយោបាយបច្ចុប្បន្នធ្វើឱ្យលោកស្រីគ្មានជម្រើសអ្វីក្រៅពីធ្វើការជាមួយរដ្ឋាភិបាលអាម៉េរិកនោះទេ ។

ចក្ខុវិស័យរបស់លោកត្រាំ ក្នុងការធ្វើឱ្យ «វេណេហ្ស៊ូអ៊ីឡាដើរលើផ្លូវត្រូវ» រួមមានការគ្រប់គ្រងដោយភាពត្រឹមត្រូវ និងទាក់ទាញក្រុមហ៊ុនប្រេងកំពូលៗនៅលើពិភពលោកឱ្យចូលមកកាន់ប្រទេសនេះ។ លោកបានសន្យាថា ទឹកប្រាក់វិនិយោគរាប់ពាន់លានដុល្លារនឹងហូរចូលទៅក្នុងវិស័យប្រេងរបស់វេណេហ្ស៊ូអ៊ីឡា។ លោកប្រធានាធិបតី បានអះអាងថា ទ្រព្យសម្បត្តិទាំងនេះនឹងត្រូវយកមកប្រើប្រាស់នៅក្នុងប្រទេសវេណេហ្ស៊ូអ៊ីឡា ដោយលោកបញ្ជាក់ថា «អ្នកដែលទទួលបានផលប្រយោជន៍ធំបំផុត» ពីផែនការនេះ គឺប្រជាជនវេណេហ្ស៊ូអ៊ីឡាផ្ទាល់តែម្តង ៕