គិតមកដល់បច្ចុប្បន្ន ហេដ្ឋារចនាសម្ព័ន្ធគាំទ្រ នៃគម្រោងអភិវឌ្ឍន៍គោលដៅលំហែបៃតង នៅតំបន់ខ្នងផ្សារ ស្ថិតនៅព្រំប្រទល់ ខេត្តកំពង់ស្ពឺ និងខេត្តកោះកុង បានលេចចេញជារូបរាងជា បណ្តើរៗហើយ។
ហេដ្ឋារចនាសម្ព័ន្ធទាំងនោះ រួមមានផ្លូវចូលប្រវែងជាង៧ គីឡូម៉ែត្រ ចំណតរថយន្ត ប្រព័ន្ធទឹកស្អាត ការបំពាក់អំពូលសូឡា ខ្លោងទ្វារធំផ្លូវចូល ការដាំលម្អរុក្ខជាតិ និងផ្កាក្ងោកដ៏ស្រស់បំព្រង បន្ទប់ទឹក កន្លែងលក់អាហារ និងភេសជ្ជៈ កន្លែងសង្គ្រោះបន្ទាន់ កន្លែងបោះតង់ ផ្លូវថ្មើរជើងក្នុងព្រៃ ជាដើម។
ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន បានបញ្ជាក់ថា ការអភិវឌ្ឍតំបន់ភ្នំខ្នងផ្សារ គឺជាការអភិវឌ្ឍបែបអេកូទេសចរណ៍ធម្មជាតិ ដែលជាទម្រង់ទេសចរណ៍ផ្អែកលើធម្មជាតិ ដែលមានគោលបំណងសំខាន់ ក្នុងការការពារនិងអភិរក្សបរិស្ថានធម្មជាតិ និងវប្បធម៌ក្នុងតំបន់ ជួយលើកកម្ពស់ជីវភាពរស់នៅ របស់ប្រជាពលរដ្ឋមូលដ្ឋាន មានសុខភាពល្អ ចូលរួមផ្តល់បទពិសោធល្អ ដល់ភ្ញៀវទេសចរ និងការធ្វើដំណើរ ក្នុងតំបន់ព្រៃភ្នំប្រកបដោយការទទួលខុសត្រូវ។
សូមបញ្ជាក់ថា តំបន់ខ្នងផ្សារ សម្បូរទៅព្រៃឈើក្រាស់ មានជួរភ្នំច្រើននិងខ្ពស់ៗ ពិសេសអ្នកទេសចរអាចគយគន់ថ្ងៃលិចដ៏ស្រស់ស្អាតនៅទីនោះ៕
