ចំនួនអ្នកស្លាប់ដោយសារភ្លើងឈ្មោះផាលីសាត ហ្វាយអឺ (Palisades Fire) ឆេះព្រៃនៅទីក្រុងឡូសអេនជើឡេស រដ្ឋកាលីហ្វ័រញ៉ា បានកើនឡើងដល់៦នាក់
រដ្ឋកាលីហ្វ័រញ៉ា៖ ចំនួនអ្នកស្លាប់ដោយសារភ្លើងឆេះព្រៃនៅទីក្រុងឡូសអេនជើឡេស រដ្ឋកាលីហ្វ័រញ៉ា បានកើនឡើងដល់៦នាក់ហើយបន្ទាប់ពីក្រុមអ្នកជួយសង្គ្រោះប្រទះឃើញសាកសពជនរងគ្រោះនៅក្នុងផ្ទះមួយនៃតំបន់ម៉ាលីប៊ូ (Malibu) ដែលត្រូវដុតកម្ទេចដោយភ្លើងឈ្មោះផាលីសាត ហ្វាយអឺ (Palisades Fire)។ ក្រៅពីនេះ សាកសពជនរងគ្រោះ៥នាក់ទៀតត្រូវគេប្រទះឃើញនៅតំបន់អាល់តាដេណា (Altadena) ដែលដុតកម្ទេចដោយភ្លើងឆេះព្រៃឈ្មោះអ៊ីតុន ហ្វាយអឺ (Eaton Fire)។ មន្ត្រីថ្នាក់មូលដ្ឋានជឿជាក់ថាចំនួនអ្នកស្លាប់នឹងកើនឡើងបន្ថែមទៀតព្រោះភ្លើងឆេះព្រៃលើកនេះមានសភាពខ្លាំងក្លាឆេះយ៉ាងតិច៦កន្លែងព្រមៗគ្នា និងបំផ្លាញអគាររាប់ពាន់ខ្នង។ យោងតាមតួលេខត្រួសៗ ផ្ទះ២ពាន់ខ្នងសុទ្ធតែផ្ទះវីឡាល្អៗរបស់តារាហូលីវូតល្បីៗត្រូវអគ្គិភ័យលេបត្របាក់អស់គ្មានសល់។ មនុស្សជាង១,៣សែននាក់ត្រូវតែជម្លៀសខ្លួនចេញជាបន្ទាន់ដោយមិនត្រូវស្ដាយស្រណោះទ្រព្យសម្បត្តិទេ។ ក្រៅពីនេះ មនុស្ស៤,៥សែននាក់ទៀតគ្មានភ្លើងអគ្គិសនីសម្រាប់ប្រើប្រាស់។ នៅក្នុងស្ថានភាពនេះ អាជ្ញាធរត្រូវតែបង្ខំចិត្តបញ្ចេញអ្នកជាប់ឃុំនៅមន្ទីរអប់រំកែប្រែនៃរដ្ឋកាលីហ្វ័រញ៉ាដើម្បីចូលរួមពន្លត់ភ្លើងឆេះព្រៃជាមួយភ្នាក់ងារអគ្គិភ័យដែលមានគ្នា១៤០០នាក់។ អាជ្ញាធរបញ្ជាក់ថាអ្នកជាប់ឃុំដែលបញ្ចេញមកប្រើមានចំនួន៧៨៣នាក់។ ទន្ទឹមនឹងនោះក៏មានអ្នកឆ្លៀតឱកាសគាស់ផ្ទះដែលម្ចាស់ទុកចោលដើម្បីលួចឥវ៉ាន់។ សមត្ថកិច្ចចាប់ខ្លួនពួកគេយ៉ាងតិចម្ភៃនាក់។ ពីទីក្រុងវ៉ាស៊ីនតោន លោកបៃដិនប្រកាសថារដ្ឋាភិបាលសហព័ន្ធនឹងចេញថ្លៃខូចខាត១០០%សម្រាប់អ្នកដែលរងគ្រោះដោយភ្លើងឆេះព្រៃទូទាំងទីក្រុងឡូសអេនជើឡេសរយៈពេល១៨០ថ្ងៃ។ ប៉ុន្តែមែនទែនទៅលោកនៅសល់ពេលតែ៩ថ្ងៃទៀតប៉ុណ្ណោះនឹងត្រូវចាកចេញពីសេតវិមានហើយ។ អត្ថបទពេញ
