ក្នុងស្មារតីយកចិត្តទុកដាក់ និងការគិតគូរខ្ពស់ចំពោះសុខុមាលភាពរបស់ស្ត្រី កុមារ និងក្រុមគ្រួសារដែលកំពុងជួបការលំបាកដោយសារស្ថានភាពមិនប្រាកដប្រជា លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានអញ្ជើញចុះសួរសុខទុក្ខ និងសំណេះសំណាលជាមួយប្រជាពលរដ្ឋភៀសសឹកដែលកំពុងស្នាក់នៅក្នុង ភូមិរង់ចាំ ដើម្បីស្វែងយល់ពីស្ថានភាពជាក់ស្តែង និងសុខទុក្ខរបស់បងប្អូនប្រជាពលរដ្ឋ ជាពិសេសស្ត្រី និងកុមារ នាព្រឹកថ្ងៃទី២ ខែវិច្ឆិកា ឆ្នាំ២០២៦ ។
ក្នុងឱកាសនោះ លោកជំទាវកិត្តិបណ្ឌិតបានសម្តែងនូវការយកចិត្តទុកដាក់ និងការគាំទ្រយ៉ាងជ្រាលជ្រៅចំពោះប្រជាពលរដ្ឋដែលកំពុងប្រឈមមុខនឹងការលំបាក ព្រមទាំងបានគូសបញ្ជាក់ពីសារៈសំខាន់នៃការការពារសិទ្ធិ សេចក្តីថ្លៃថ្នូរ និងសុវត្ថិភាពរបស់ស្ត្រី និងកុមារ។
នាឱកាសនេះ ក៏មានការផ្តល់ជូននូវកញ្ចប់សម្ភារ:ថែរក្សាសេចក្តីថ្លៃថ្នូរ (Dignity Kits) ដែលឧបត្ថម្ភគាំទ្រដោយមូលនិធិសហប្រជាជាតិសម្រាប់ប្រជាជន (UNFPA) រួមជាមួយរដ្ឋាភិបាល និងប្រជាជនជប៉ុន ក្នុងកិច្ចសហប្រតិបត្តិការជាមួយគណៈកម្មាធិការជាតិគ្រប់គ្រងគ្រោះមហន្តរាយ (NCDM) ដើម្បីឆ្លើយតបចំពោះតម្រូវការចាំបាច់ ព្រមទាំងជួយការពារឯកជនភាព សុខភាព និងសេចក្តីថ្លៃថ្នូររបស់ស្ត្រី និងកុមារីភៀសសឹក។
ជាមួយគ្នានេះ លោកជំទាវកិត្តិបណ្ឌិតបានបញ្ជាក់ពីការខិតខំប្រឹងប្រែងរបស់រាជរដ្ឋាភិបាល ក្នុងការចរចាការទូត ពហុភាគី និងទ្វេភាគី ដោយផ្អែកលើច្បាប់អន្តរជាតិ និងកិច្ចការគាំពារដែលមានស្រាប់ ដើម្បីដោះស្រាយជម្លោះ និងភាពតានតឹងដោយសន្តិវិធី។ កិច្ចខិតខំប្រឹងប្រែងទាំងនេះ គឺដើម្បីធានាឱ្យបងប្អូនប្រជាពលរដ្ឋអាចវិលត្រឡប់ទៅកាន់លំនៅឋានរបស់ខ្លួនវិញដោយសុវត្ថិភាព បានជួបជុំក្រុមគ្រួសារ ព្រមទាំងស្តារជីវភាពរស់នៅប្រកបដោយទំនុកចិត្ត និងក្តីសង្ឃឹមឡើងវិញ៕








