រដ្ឋាភិបាលនៃប្រទេសយ៉ាងតិច ៣៣ នៅទូទាំងពិភពលោក បានចេញសេចក្តីណែនាំជំរុញឱ្យប្រជាពលរដ្ឋត្រៀមស្តុកស្បៀងអាហារ ទឹកស្អាត និងសម្ភារៈចាំបាច់សម្រាប់ប្រើប្រាស់ក្នុងគ្រាអាសន្ន ដូចជា សង្គ្រាម គ្រោះធម្មជាតិ និងការវាយប្រហារតាមប្រព័ន្ធសាយប័រ។ នេះបើយោងតាមការចេញផ្សាយរបស់សារព័ត៌មាន Newsweek នាពេលថ្មីៗនេះ។
ជាទូទៅ ប្រទេសភាគច្រើនណែនាំឱ្យប្រជាពលរដ្ឋត្រៀមសម្ភារៈចាំបាច់សម្រាប់រយៈពេលយ៉ាងហោចណាស់ ៧២ ម៉ោង ឬ ៣ ថ្ងៃ។ ក្នុងនោះ បារាំង ចក្រភពអង់គ្លេស កាណាដា ជប៉ុន ម៉ិកស៊ិក និងហូឡង់ សុទ្ធតែបានផ្តល់អនុសាសន៍ឱ្យត្រៀមសម្ភារៈសម្រាប់រយៈពេលនេះ។ ចំណែកស៊ុយអែត និងន័រវែស ណែនាំឱ្យត្រៀមសម្រាប់មួយសប្តាហ៍ ខណៈអាល្លឺម៉ង់ណែនាំឱ្យត្រៀមរហូតដល់ ១០ ថ្ងៃ។
ដោយឡែក សហរដ្ឋអាមេរិក និងឥណ្ឌា ក៏បានណែនាំឱ្យប្រជាពលរដ្ឋរៀបចំសម្ភារៈបន្ទាន់សម្រាប់គ្រាអាសន្នផងដែរ ប៉ុន្តែមិនបានកំណត់រយៈពេលជាក់លាក់ឡើយ។
គួរឱ្យកត់សម្គាល់ថា កាលពីខែមីនា ឆ្នាំ២០២៥ គណៈកម្មការអឺរ៉ុបបានដាក់ចេញយុទ្ធសាស្ត្រត្រៀមលក្ខណៈរួមសម្រាប់គ្រាអាសន្ន ដោយលើកឡើងពីការកើនឡើងនៃភាពតានតឹងភូមិសាស្ត្រនយោបាយ និងការគំរាមកំហែងពីគ្រោះធម្មជាតិដែលបណ្តាលមកពីការប្រែប្រួលអាកាសធាតុ។
សម្ភារៈចាំបាច់ដែលគួរត្រៀមទុក រួមមាន អាហារដែលអាចរក្សាទុកបានយូរ ទឹកស្អាត ថ្នាំពេទ្យ ថ្ម អាគុយ ពិលបំភ្លឺ និងវិទ្យុ។
ទោះជាយ៉ាងណា សេចក្តីណែនាំទាំងនេះ មិនមែនមានន័យថាប្រទេសទាំងនោះកំពុងប្រឈមនឹងការខ្វះខាតស្បៀងអាហារនោះទេ ប៉ុន្តែជាវិធានការបង្ការជាមុន ដើម្បីឱ្យគ្រួសារអាចដោះស្រាយតម្រូវការមូលដ្ឋានដោយខ្លួនឯង ក្នុងអំឡុងពេលមានការរំខានដល់សេវាកម្មសំខាន់ៗ ដូចជា អគ្គិសនី ទឹកស្អាត និងប្រព័ន្ធទំនាក់ទំនង៕
