មិនមែនមានតែពលរដ្ឋបរទេសប៉ុណ្ណោះទេដែលរងការខាតបង់ប្រាក់រាប់ពាន់លានដុល្លារ ដោយសារក្រុមឆបោកតាមអនឡាញ។ ពលរដ្ឋខ្មែរក៏បានបាត់បង់ប្រាក់ប្រមាណ ២៦,២ លានដុល្លារ ក្នុងឆ្នាំ២០២៥ និងរយៈពេល ៨ ខែ ឆ្នាំ២០២៦។
បើតាមការបញ្ជាក់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ក្នុងសន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ICCOS) នៅថ្ងៃទី២៤ ខែកញ្ញា ឆ្នាំ២០២៦ បានឱ្យដឹងថា ក្នុងឆ្នាំ២០២៥ អគ្គស្នងការដ្ឋាននគរបាលជាតិបានទទួលពាក្យបណ្ដឹងពីពលរដ្ឋខ្មែរចំនួន ១,១៣៦ បណ្ដឹង ពាក់ព័ន្ធនឹងការឆបោកតាមអនឡាញ ដែលមានទឹកប្រាក់ខាតបង់សរុបប្រមាណ ៤,៧ លានដុល្លារ។ ក្នុងចំណោមបណ្ដឹងទាំងនេះ មានតែ ៥១ ករណី ប៉ុណ្ណោះដែលត្រូវបានដោះស្រាយបញ្ចប់។
ដោយឡែក សម្រាប់រយៈពេល ៨ ខែ ឆ្នាំ២០២៦ សមត្ថកិច្ចបានទទួលពាក្យបណ្ដឹងចំនួន ១,០៨៤ បណ្ដឹង ដែលមានទឹកប្រាក់ខាតបង់ប្រមាណ ២១,៥ លានដុល្លារ។ ក្នុងនោះ សមត្ថកិច្ចបានដោះស្រាយបញ្ចប់ចំនួន ៤២ បណ្ដឹង។
ឯកឧត្តម នាយឧត្តមសេនីយ៍ ស ថេត បានពន្យល់ថា កម្ពុជាកំពុងជួបប្រទះបញ្ហាប្រឈមមួយចំនួនក្នុងការបង្ក្រាប និងទប់ស្កាត់បទល្មើសតាមប្រព័ន្ធបច្ចេកវិទ្យា។ បញ្ហាប្រឈមទាំងនោះរួមមាន ការវិវត្តយ៉ាងឆាប់រហ័សនៃប្រព័ន្ធបច្ចេកវិទ្យា និងទូរគមនាគមន៍ ដែលក្រុមឧក្រិដ្ឋជនយកទៅប្រើប្រាស់ក្នុងសកម្មភាពឆបោក ព្រមទាំងបញ្ហាពាក់ព័ន្ធនឹងចរន្តផ្ទេរប្រាក់។
ជាមួយគ្នានេះ ការអប់រំ និងផ្សព្វផ្សាយឱ្យប្រជាពលរដ្ឋមានការយល់ដឹងអំពីការឆបោកតាមអនឡាញ ក៏នៅមានកម្រិតនៅឡើយ ដែលជាកត្តាមួយធ្វើឱ្យបទល្មើសប្រភេទនេះនៅតែបន្តកើតមាន។
អគ្គស្នងការនគរបាលជាតិបានបញ្ជាក់បន្ថែមថា ការបង្ក្រាបកន្លងមកភាគច្រើនអាចចាប់ខ្លួនបានតែអ្នកប្រព្រឹត្តបទល្មើសនៅកម្រិតក្រោម និងអ្នកគ្រប់គ្រងមួយចំនួន ខណៈមេខ្លោងធំៗមួយចំនួនស្ថិតនៅក្រៅប្រទេស។ ស្ថានភាពនេះធ្វើឱ្យការកាត់ផ្ដាច់ឫសគល់នៃបណ្ដាញឧក្រិដ្ឋកម្មឆបោកតាមអនឡាញនៅតែប្រឈមនឹងការលំបាក។
មួយវិញទៀត កម្ពុជាក៏ប្រឈមនឹងបញ្ហាក្នុងការកំណត់អត្តសញ្ញាណជនពាក់ព័ន្ធមួយចំនួន ដោយសារឯកសាររបស់ពួកគេបានផុតកំណត់។ បញ្ហានេះធ្វើឱ្យនីតិវិធីមាតុភូមិនិវត្តន៍ ឬការបណ្ដេញចេញមានភាពយឺតយ៉ាវ ហើយកម្ពុជាត្រូវទទួលបន្ទុកលើការចំណាយពាក់ព័ន្ធផ្សេងៗ។
ជាចុងក្រោយ ឯកឧត្តម នាយឧត្តមសេនីយ៍ ស ថេត បានស្នើឱ្យមានកិច្ចសហប្រតិបត្តិការកាន់តែជិតស្និទ្ធរវាងប្រទេស និងស្ថាប័នពាក់ព័ន្ធនានា ដើម្បីរួមគ្នាកាត់ផ្ដាច់ខ្សែសង្វាក់ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា ដែលជាបទល្មើសគ្មានព្រំដែន៕
