សន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ដែលបានប្រព្រឹត្តទៅរយៈពេល ២ថ្ងៃ នៅរាជធានីភ្នំពេញ បានបញ្ចប់ដោយជោគជ័យ ដោយមានការចូលរួមពីប្រទេសចំនួន ២៨ និងអង្គការចំនួន ៧។ សន្និសីទបានឈានដល់ការអនុម័ត «សេចក្តីប្រកាសទីក្រុងភ្នំពេញ» ដោយកំណត់ការប្តេជ្ញាចិត្តរួមចំនួន ១១ ចំណុច។
សន្និសីទដែលបានប្រព្រឹត្តទៅនៅថ្ងៃទី២៣ និង២៤ ខែកញ្ញា ឆ្នាំ២០២៦ បានផ្តោតសំខាន់លើការពង្រឹងកិច្ចសហប្រតិបត្តិការអន្តរជាតិ ដើម្បីទប់ស្កាត់ និងប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា និងឧក្រិដ្ឋកម្មពាក់ព័ន្ធ។ តាមរយៈ «សេចក្តីប្រកាសទីក្រុងភ្នំពេញ» ប្រទេស និងអង្គការចូលរួម បានប្តេជ្ញារួមគ្នាលើវិធានការសំខាន់ៗចំនួន ១១។
ក្នុងនោះ រួមមានទី១ ពង្រឹងកិច្ចសហប្រតិបត្តិការអន្តរជាតិ ដើម្បីបង្កើនប្រសិទ្ធភាពក្នុងការទប់ស្កាត់ និងបង្ក្រាបបទល្មើសឆ្លងដែន។ ទី២ កាត់ផ្តាច់ច្រវាក់ឧក្រិដ្ឋកម្ម និងបណ្តាញដែលពាក់ព័ន្ធនឹងការឆបោកតាមប្រព័ន្ធបច្ចេកវិទ្យា។ ទី៣ រារាំង និងប្រមូលត្រឡប់មកវិញនូវផលនៃបទល្មើស ដើម្បីកាត់បន្ថយផលប្រយោជន៍សេដ្ឋកិច្ចរបស់បណ្តាញឧក្រិដ្ឋកម្ម។ ទី៤ ទាញយកប្រយោជន៍ពីនវានុវត្តន៍បច្ចេកវិទ្យា ដើម្បីពង្រឹងសមត្ថភាពស៊ើបអង្កេត និងការពារប្រឆាំងនឹងការឆបោក។ ទី៥ ពង្រឹងក្របខ័ណ្ឌ គោលនយោបាយ ច្បាប់ និងបទប្បញ្ញត្តិ ដើម្បីឆ្លើយតបឱ្យសមស្របទៅនឹងការវិវត្តនៃបទល្មើសតាមប្រព័ន្ធបច្ចេកវិទ្យា។ ទី៦ កសាងសមត្ថភាព និងភាពធន់របស់ស្ថាប័នពាក់ព័ន្ធ និងសង្គម ក្នុងការទប់ស្កាត់ការឆបោក។ ទី៧ ពង្រឹងភាពជាដៃគូរវាងរដ្ឋ និងវិស័យឯកជន ដើម្បីចែករំលែកព័ត៌មាន និងចាត់វិធានការប្រកបដោយប្រសិទ្ធភាព។ទី៨ គាំទ្រការការពារជនរងគ្រោះដោយការជួញដូរមនុស្ស និងជនងាយរងគ្រោះ ព្រមទាំងធានាឱ្យពួកគេទទួលបានការគាំទ្រសមស្រប។ ទី៩ អនុវត្តគោលការណ៍មិនផ្តន្ទាទោសចំពោះជនរងគ្រោះ ដែលត្រូវបានបង្ខំ ឬជាប់ពាក់ព័ន្ធនឹងសកម្មភាពឧក្រិដ្ឋកម្មដោយសារការជួញដូរមនុស្ស។ ទី១០ ទប់ស្កាត់ការឆបោក និងការជួញដូរមនុស្ស តាមរយៈវិធានការបង្ការ ការអនុវត្តច្បាប់ និងកិច្ចសហប្រតិបត្តិការឆ្លងដែន។ ទី១១ លុបបំបាត់ទីតាំងឆបោកធំៗ និងហេដ្ឋារចនាសម្ព័ន្ធពាក់ព័ន្ធ ដែលត្រូវបានប្រើប្រាស់សម្រាប់ប្រព្រឹត្តបទល្មើស។
សេចក្តីប្រកាសក៏បានសង្កត់ធ្ងន់លើការពង្រឹងក្របខ័ណ្ឌគោលនយោបាយ ច្បាប់ និងបទប្បញ្ញត្តិ ការកសាងសមត្ថភាព និងភាពធន់ ព្រមទាំងការពង្រឹងភាពជាដៃគូរវាងរដ្ឋ និងវិស័យឯកជន។
ជាមួយគ្នានេះ កិច្ចប្រជុំបានផ្តោតជាពិសេសលើ ការការពារជនរងគ្រោះដោយការជួញដូរមនុស្ស និងជនងាយរងគ្រោះ ដោយគាំទ្រការអនុវត្តគោលការណ៍មិនផ្តន្ទាទោសចំពោះជនរងគ្រោះដែលត្រូវបានបង្ខំឱ្យពាក់ព័ន្ធនឹងសកម្មភាពឧក្រិដ្ឋកម្ម។
វិធានការសំខាន់មួយទៀត គឺការទប់ស្កាត់ការឆបោក និងការជួញដូរមនុស្ស ព្រមទាំងការលុបបំបាត់ ទីតាំងឆបោកធំៗ និងហេដ្ឋារចនាសម្ព័ន្ធពាក់ព័ន្ធ ដែលត្រូវបានប្រើប្រាស់សម្រាប់ប្រព្រឹត្តបទល្មើស។
កម្ពុជា បានបញ្ជាក់ជាថ្មីពីការប្តេជ្ញាចិត្តរបស់ខ្លួន ក្នុងការធ្វើការជាមួយដៃគូអន្តរជាតិ ដើម្បីប្រែក្លាយការប្តេជ្ញាចិត្តទាំង ១១ ចំណុច ទៅជាសកម្មភាពជាក់ស្តែង ប្រកបដោយចីរភាព និងប្រសិទ្ធភាព ក្នុងគោលបំណងការពារជនរងគ្រោះ ទប់ស្កាត់បណ្តាញឆបោក និងមិនឱ្យហេដ្ឋារចនាសម្ព័ន្ធឆបោកកើតមានឡើងវិញ។
សន្និសីទនេះ ក៏ជាការបង្ហាញពីការប្តេជ្ញារួមរបស់សហគមន៍អន្តរជាតិ ក្នុងការឆ្លើយតបចំពោះការឆបោកតាមប្រព័ន្ធបច្ចេកវិទ្យា តាមរយៈកិច្ចសហប្រតិបត្តិការនៅកម្រិតជាតិ តំបន់ និងសកលលោក។
