លោក ដូណាល់ ត្រាំ ប្រធានាធិបតីអាម៉េរិក បានចេញបញ្ជាឱ្យមន្ទីរបញ្ចកោណកាត់បន្ថយសមយុទ្ធយោធារួមគ្នាជាមួយកូរ៉េខាងត្បូង ដោយរូបលោកលើកឡើងពីការបដិសេធរបស់ទីក្រុងសេអ៊ូល ក្នុងការចូលរួមក្នុងសកម្មភាពប្រឆាំងនឹងអ៊ីរ៉ង់ និងទំនាក់ទំនងល្អរបស់លោកជាមួយលោក គីម ជុងអ៊ុន។ នេះបើយោងតាមការចេញផ្សាយរបស់សារព័ត៌មាន Reuters។
សមយុទ្ធយោធារួមគ្នាជាមួយកូរ៉េខាងត្បូង ដែលនឹងចាប់ផ្តើមនៅថ្ងៃចន្ទ ទី១៧ ខែសីហានេះ លោក ត្រាំ បានបង្ហោះសារលើបណ្តាញទំនាក់ទំនងសង្គម Truth Social ថា បើទោះបីជាវាយឺតពេលទៅហើយ ដើម្បីលុបចោលការធ្វើសមយុទ្ធទាំងស្រុងក៏ដោយ លោកមិនសប្បាយចិត្តនោះទេ ដែលសហរដ្ឋអាម៉េរិកបានយល់ព្រមកន្លងមក ក្នុងការចូលរួមក្នុងការធ្វើសមយុទ្ធនេះ។
សមយុទ្ធយោធារួមគ្នាប្រចាំឆ្នាំឈ្មោះ Ulchi Freedom Shield នឹងប្រព្រឹត្តទៅចាប់ពីថ្ងៃទី១៧ ដល់ថ្ងៃទី២៧ ខែសីហា ដោយមានកងទ័ពកូរ៉េខាងត្បូង ១៨.០០០ នាក់ចូលរួម។
សមយុទ្ធនេះត្រូវបានរំពឹងថា នឹងផ្តោតលើការហ្វឹកហាត់ប្រតិបត្តិការដូចជា ការប្រយុទ្ធប្រឆាំងនឹងដ្រូន ការទប់ស្កាត់ការផ្តាច់រលកសញ្ញា GPS និងការវាយប្រហារតាមប្រព័ន្ធសាយប័រ សំដៅទប់ទល់នឹងការរីកចម្រើននៃសមត្ថភាពយោធារបស់កូរ៉េខាងជើង។ នៅក្នុងការបង្ហោះនោះ លោក ត្រាំ ក៏បានលើកឡើងដែរពីទំនាក់ទំនងល្អរបស់លោកជាមួយមេដឹកនាំកូរ៉េខាងជើង លោក គីម ជុងអ៊ុន។
គួរបញ្ជាក់ថា លោក ត្រាំ ក៏បានលើកឡើងផងដែរពីគោលជំហរថ្មីៗនេះរបស់កូរ៉េខាងត្បូងចំពោះសង្គ្រាមរបស់សហរដ្ឋអាម៉េរិកជាមួយអ៊ីរ៉ង់។ លោកបានបន្ថែមថា៖ «លោកបានស្នើសុំលោកប្រធានាធិបតីកូរ៉េខាងត្បូងថា តើពួកគេចង់ចូលរួមជាមួយយើង ដើម្បីរំសាយនុយក្លេអ៊ែររបស់អ៊ីរ៉ង់ដែរឬទេ? តែពួកគេបានឆ្លើយថា ទេ»៕
