ក្នុងសន្និសីទសារព័ត៌មានស្តីពី ការប្រឡងសញ្ញាបត្រមធ្យមសិក្សាទុតិយភូមិ នាសម័យប្រឡងថ្ងៃ១០ សីហា នារសៀលថ្ងៃទី៥ ខែសីហា ឆ្នាំ២០២៦ ឯកឧត្តមឧបនាយករដ្ឋមន្រ្តី ហង់ជួន ណារ៉ុន រដ្ឋមន្រ្តីក្រសួងអប់រំ យុវជននិងកីឡាបានឆ្លើយតប ទៅនឹងសំណួរអ្នក សារព័ត៌មានអំពីក្តីរំពឹងទុកជាមុនថា នឹងមានអត្រាសិស្សប្រឡងជាប់កើនឡើងជាងឆ្នាំ២០២៥ ប៉ុន្មានភាគរយនោះ ឯកឧត្តមមិនទាន់អាចរំពឹងជាប់ប៉ុន្មានទេ ទាល់តែថ្ងៃប្រឡងចុងក្រោយទើបអាចសន្មត់ថាជាប់ប៉ុន្មានភាគរយ ។
ប៉ុន្តែទោះបីជាយ៉ាងណាឯកឧត្តមរដ្ឋមន្រ្តីអះអាងថា ជារៀងរាល់ឆ្នាំនៃការប្រឡងមានបេក្ខជនប្រឡងជាប់កើនឡើងរហូតដោយសារសិស្សបានខិតខំប្រឹងប្រែងរៀនសូត្រ ។
“ឃើញថា ពីមួយឆ្នាំទៅមួយឆ្នាំឃើញអត្រាជាប់កើនឡើង នេះជាចំណុចមួយល្អ ហើយសិស្សខំប្រឹងរៀន បើសិនជាមិនរៀន មិនអាចសរសេរជាប់ទេ អីចឹងយើងត្រូវពិនិត្យឡើងវិញទៀត ។ យើងធ្វើការសិក្សាឡើងវិញ ខ្ញុំជឿថា ឆ្នាំនេះ យើងនឹងរើសមើលសិស្សដែលគាត់បាននិទ្ទេសA តើសមត្ថភាពគាត់មានប៉ុន្មានយើងយកមកវិភាគ”។
ក្នុងឱកាសនៃសន្និសីទនោះដែរ ឯកឧត្តមរដ្ឋមន្រ្តីក៏បានផ្តាំផ្ញើឱ្យបេក្ខជនប្រឡងបាក់ឌុប ត្រូវតែដាក់អាវភ្លៀងតាមជាប់ខ្លួនជានិច្ច ដើម្បីការពារសុវត្ថិភាពដល់សុខភាពខ្លួនដោយសារក្នុងអំឡុងពេលប្រឡងរយៈពេល២ថ្ងៃស្ថិតនៅក្នុងដំណាក់កាលមានភ្លៀងធ្លាក់ ខណៈក្រសួងធនធានទឹក បានប្រកាសថា ចាប់ពីថ្ងៃ៥ដល់១៥សីហានឹងមានភ្លៀងធ្លាក់ពីតិចទៅច្រើននៅតំបន់មួយចំនួននៃប្រទេសកម្ពុជា ។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិនឹងប្រព្រឹត្តទៅនៅថ្ងៃទី ១០-១១ ខែសីហា ឆ្នាំ២០២៦ ខាងមុខ ដែលមានបេក្ខជនចុះឈ្មោះប្រឡងសរុបចំនួន ១៥១ ២៣៨ នាក់ (ស្រី ៨៤ ៧៣៥ នាក់) ចំនួនបេក្ខជនឆ្នាំនេះមានការកើនឡើងជាង ៣ ០០០ នាក់ បើធៀបនឹងឆ្នាំ២០២៥៕
