ក្រុមអ្នកជួយសង្រ្គោះ រួមទាំងប្រជាជនវ៉េណេស៊ុយអេឡា បានពន្លឿនការស្វែងរក និងជួយសង្រ្គោះទៅលើមនុស្សដែលកំពុងតែជាប់នៅក្រោមគំនរអគារ ដោយបានបាក់រលំ បន្ទាប់ពីគ្រោះរញ្ជួយដីកម្រិតធ្ងន់ចំនួន ២ បានសម្លាប់មនុស្សយ៉ាងហោច ២៣៥នាក់។ នេះបើយោងតាមការចេញផ្សាយនៅលើគេហទំព័រ Reuters។
អគារជាច្រើនបានរងការខូចខាត និងមានខ្លះបាក់រលំទាំងស្រុង បន្ទាប់ពីគ្រោះរញ្ជួយដីចំនួន២ ដែលទីភ្នាក់ងារភូមិវិទ្យាអាម៉េរិក USGS រាយការណ៍ថា មានកម្រិតរំញ័រ ៧,២រ៉ិចទ័រ និង៧,៥រ៉ិចទ័រ បានអង្រួនភាគខាងជើងនៃប្រទេសវ៉េណេស៊ុយអេឡា កាលពីយប់ថ្ងៃពុធកន្លងទៅ។ រហូតដល់ថ្ងៃព្រហស្បតិ៍ នៅតែមានការរំញ័រខ្លះ ហើយរដ្ឋមន្ត្រីសុខាភិបាលវ៉េណេស៊ុយអេឡា បានឱ្យដឹងថា ចំនួនអ្នកស្លាប់បានកើនឡើងពី ១៨៨នាក់ ដល់ ២៣៥នាក់ និងជាង ១ ៥០០នាក់ បានរងរបួស។
គួរបញ្ជាក់ថា គ្រោះរញ្ជួយដីកម្រិត ៧,៥រ៉ិចទ័រកាលពីថ្ងៃពុធ គឺជាគ្រោះរញ្ជួយដីកម្រិតធ្ងន់ធ្ងរបំផុតចាប់តាំងពីថ្ងៃទី២៩ ខែតុលា ឆ្នាំ១៩០០។ បណ្ដាប្រទេសជាច្រើនក្នុងនោះរួមមាន សហរដ្ឋអាម៉េរិក បារាំង ចិន ឥណ្ឌា ប្រេស៊ីល ព័រទុយហ្កាល់ ស្វីស អេស្ប៉ាញ រួមទាំងម៉ិកស៊ិក បាននិងកំពុងបញ្ជូនជំនួយ និងក្រុមអ្នកជំនាញទៅជួយជាកម្លាំងដល់អាជ្ញាធរវ៉េណេស៊ុយអេឡា៕
