ឯកឧត្តម ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានថ្លែងថា កម្ពុជាគ្មានបំណងឈ្លានពាន ឬប៉ះទង្គិចជាមួយអ្នក ជិតខាងនោះទេ ខណៈការបង្កើនសមត្ថភាពយោធាក្នុងដំណាក់កាលបច្ចុប្បន្ន ធ្វើឡើងដើម្បីពង្រឹងសមត្ថភាពការពារជាតិ អធិបតេយ្យភាព និងបូរណភាពទឹកដីប៉ុណ្ណោះ ។
ឯកឧត្តម ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាតំណាងដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងដូចខាងលើនេះ ក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការ ស្តូបអនុស្សាវរីយ៍នយោបាយឈ្នះឈ្នះ នៅក្រុងខេមរភូមិន្ទ ខេត្តកោះកុង នាថ្ងៃទី៣០ ខែឧសភា ឆ្នាំ២០២៦ ។
ឯកឧត្តម ទៀ សីហា បានបញ្ជាក់ថា ចំពោះកិច្ចសហប្រតិបត្តិការអន្តរជាតិ ក្រសួងការពារជាតិ តែងតែសំណូមពរនូវអ្វី ដែលអាចការពារខ្លួនបាន ដោយកម្ពុជា មិនត្រូវការគ្រាប់មីស៊ីល ដែលអាចបាញ់បានចម្ងាយ ២០០ទៅ៥០០គីឡូម៉ែត្រនោះទេ ។
“អ្វីដែលយើងទាមទារ គឺប្រព័ន្ធការពារច្បាស់លាស់ ការពារភូមិសាស្ត្ររបស់យើងបាន មិនឱ្យគេឈ្លានពាន ហើយខ្ញុំបានឮហើយថា ពីមុនដូចជាការផ្សារភ្ជាប់ជាមួយសន្តិភាព និងវិមានឈ្នះឈ្នះ ក៏ដូចជាស្តូបឈ្នះឈ្នះនៅថ្ងៃនេះ ពិតណាស់យើង កាលបានបញ្ចប់សង្គ្រាមស៊ីវិល នៅឆ្នាំ១៩៩៨ គឺយើងបានសន្តិភាព ពេញលេញនេះ ប្រទេសកម្ពុជា បានកំពុងអភិវឌ្ឍន៍យ៉ាងឆាប់រហ័ស ក្រោមម្លប់សន្តិភាព ហើយគ្រប់វិស័យ គឺមានការរីកចម្រើនជាបន្តបន្ទាប់ ។
ឯកឧត្តមឧបនាយករដ្ឋមន្ត្រី ក៏បានរំលឹកថា បន្ទាប់ពីកម្ពុជាបញ្ចប់សង្គ្រាមស៊ីវិល និងទទួលបានសន្តិភាពពេញលេញក្រោមនយោបាយឈ្នះ-ឈ្នះ ក្នុងឆ្នាំ១៩៩៨ ប្រទេសជាតិ ទទួលបានឱកាសអភិវឌ្ឍន៍យ៉ាងឆាប់រហ័សលើគ្រប់វិស័យ ក្រោមម្លប់សន្តិភាព ស្ថិរភាព និងឯកភាពជាតិ។
បន្ថែមលើនេះ ឯកឧត្តមឧបនាយករដ្ឋមន្ត្រី ទៀ សីហា បន្តថា ដោយឡែក ក្នុងរយៈពេលកន្លងមក រាជរដ្ឋាភិបាលបានផ្តោតសំខាន់លើការ អភិវឌ្ឍហេដ្ឋារចនាសម្ព័ន្ធ ការកសាងធនធានមនុស្ស និងការលើកកម្ពស់វិស័យអប់រំ ដើម្បីជំរុញការរីកចម្រើនរបស់ប្រទេស។ ទោះជាយ៉ាងណា ស្ថានភាពពាក់ព័ន្ធនឹងការប៉ះទង្គិច នៅតាមព្រំដែនក្នុងឆ្នាំ២០២៥ បានធ្វើឲ្យកម្ពុជា ត្រូវពិនិត្យ និងកែសម្រួលផែនការមួយចំនួន ស្របតាមការវិវត្ត នៃស្ថានការណ៍ជាក់ស្តែង។
ឯកឧត្តមឧបនាយករដ្ឋមន្ត្រី ទៀ សីហា បានគូសបញ្ជាក់ថា ការប៉ះទង្គិចយោធា មិននាំមកនូវផលចំណេញដល់ភាគីណាមួយឡើយ ផ្ទុយទៅវិញ មានតែការខាតបង់ និងការបាត់បង់។ ដូច្នេះ កម្ពុជា នៅតែបន្តយកចិត្តទុកដាក់ខ្ពស់ ក្នុងការថែរក្សាសន្តិភាព ដែលជាសមិទ្ធផលដ៏មានតម្លៃ និង ជាកេរដំណែលពីការដឹកនាំ របស់សម្តេចតេជោ ហ៊ុន សែន និងរាជរដ្ឋាភិបាលជំនាន់មុន ដែលបានបន្តមកដល់ការដឹកនាំរបស់ សម្តេចមហាបវរ ធិបតី ហ៊ុន ម៉ាណែត។
ជាមួយគ្នានេះ ឯកឧត្តមឧបនាយករដ្ឋមន្ត្រី ទៀ សីហា បានអះអាងថា ការថែរក្សាសន្តិភាព និងស្ថិរភាព គឺជាកត្តាគន្លឹះសម្រាប់ការអភិវឌ្ឍសេដ្ឋកិច្ច និងសង្គម ខណៈដែលកម្ពុជា កំពុងបន្តដំណើររីកចម្រើន និងលើកកម្ពស់ជីវភាព ប្រជាពលរដ្ឋឲ្យកាន់តែប្រសើរឡើង៕
