សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីកម្ពុជាអញ្ជើញចុះជួបសំណេះសំណាលជាមួយប្រឹក្សា ខេត្ត ក្រុង ស្រុក ខណ្ឌ ឃុំ សង្កាត់ និងថ្នាក់ដឹកនាំមន្ទីរ អង្គភាពនានាជុំវិញខេត្ដកំពង់ចាម ដែលកម្មវិធីនេះប្រព្រឹត្ដិឡើងនៅសាលាខេត្ដកំពង់ចាម នៅព្រឹកថ្ងៃទី២៥ មេសា ឆ្នាំ២០២៦ ។
ការចុះជួបសំណេះសំណាលជាមួយមន្ដ្រីក្រុមប្រឹក្សារាជធានី ខេត្ត ក្រុង ស្រុក ខណ្ឌ និងឃុំ សង្កាត់ ជាសកម្មភាពដែល
សម្ដេចតេជោ ហ៊ុន សែន តែងតែអនុវត្ដជាប់ជាប្រចាំ ដើម្បីជួបផ្ទាល់ដឹងសុខទុក្ខ និងស្ដាប់នូវរបាយការណ៍ពីថ្នាក់ក្រុមប្រឹក្សារាជធានី ខេត្ត ក្រុង ស្រុក ខណ្ឌ និងឃុំ សង្កាត់ផ្ទាល់ ក្នុងនាមជាប្រធានព្រឹទ្ធសភា និងប្រធានគណបក្សប្រជាជនកម្ពុជា ក៏ដើម្បីក្រើនរំលឹក និងជំរុញដល់មន្ត្រីនៅមូលដ្ឋានឱ្យបង្កើនការយកចិត្តទុកដាក់លើការផ្តល់សេវាសាធារណៈ និងដោះស្រាយបញ្ហាជូនប្រជាពលរដ្ឋ។
គោលបំណងសំខាន់មួយទៀតគឺពង្រឹងភាពជិតស្និទ្ធ និងការធ្វើគណនេយ្យភាពរវាងសមាជិកព្រឹទ្ធសភាជាមួយអង្គបោះឆ្នោត ជាពិសេសក្រុមប្រឹក្សាឃុំ សង្កាត់ ដែលជាអ្នកបោះឆ្នោតជ្រើសរើសសមាជិកព្រឹទ្ធសភា។
កម្មវិធីចុះជួបសំណេះសំណាលនាពេលនេះមានវត្ដមានចូលរួមពីសំណាក់សមាជិក សមាជិកា ព្រឹទ្ធសភា និងមន្ដ្រីរាជការ ក្រុមប្រឹក្សាខេត្ដ ក្រុង ស្រុក ខណ្ឌ និងឃុំ សង្កាត់ប្រមាណជាង១១០០នាក់។
នាឱកាសនេះសម្ដេចតេជោ ហ៊ុន សែន មានប្រសាសន៍ថា ការចុះជួបសំណេះសំណាលជាមួយមន្ដ្រីក្រុមប្រឹក្សា ខេត្ត ក្រុង ស្រុក ខណ្ឌ និងឃុំ សង្កាត់ នេះជាការចាប់ផ្ដេីមនៃដំណេីរឆ្ពោះទៅរកមូលដ្ឋានសម្រាប់ការត្រៀមរៀបចំធ្វេីដំណេីរទៅកាន់ការបោះឆ្នោត ឃុំ សង្កាត់ នៅឆ្នាំ២០២៧ខាងមុខ និងការបោះឆ្នោតជាតិនៅឆ្នាំ២០២៨ ហេីយសកម្មភាពនេះ ចាប់ផ្ដេីមចេញដំណេីរមុនគេពីខេត្ដកំពង់ចាម ដោយកត្កាអំណោយផលនៃទីតាំងភូមិសាស្ដ្រ និងមានចំនួនប្រជជនច្រេីន ហេីយនឹងបន្ដទៅខេត្ដត្បូងឃ្មុំ។
សូមជម្រាបជូនថា បន្ទាប់ពីបញ្ចប់កម្មវិធីនេះ សម្ដេចតេជោ ហ៊ុន សែន នឹងបន្ដទៅជួបសំណេះសំណាលជាមួយមន្ត្រីរាជការជាសមាជិកក្រុមប្រឹក្សា ខេត្ត ក្រុង ស្រុក ខណ្ឌ និងឃុំ សង្កាត់ នៅខេត្ដត្បូងឃ្មុំ៕
