ប្រព័ន្ធផ្សព្វផ្សាយរដ្ឋអ៊ីរ៉ង់ជាច្រើនបានទទួលស្គាល់ថាលោក Ayatollah Ali Khamenei មេដឹកនាំកំពូលអ៊ីរ៉ង់ បានស្លាប់ពិតប្រាកដ បន្ទាប់ពីការវាយប្រហារតាមផ្លូវអាកាសរួមគ្នា ដែលត្រូវបានរាយការណ៍ថាធ្វើឡើងដោយសហរដ្ឋអាមេរិក និងអ៊ីស្រាអែល។ នេះបើយោងតាមការចេញផ្សាយរបស់សារព័ត៌មាន Al Jazeera។
ប្រព័ន្ធផ្សព្វផ្សាយរដ្ឋអ៊ីរ៉ង់ IRIB បានរាយការណ៍ថា “មេដឹកនាំកំពូលអ៊ីរ៉ង់បានពលីហើយ” ខណៈទីភ្នាក់ងារសារព័ត៌មានអ៊ីរ៉ង់ផ្សេងទៀត ក៏បានបញ្ជាក់ពីការស្លាប់របស់លោក អាលី ខាមេនី ផងដែរ។
ការទទួលស្គាល់នេះ បានកើតឡើងបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសកាលពីថ្ងៃទី២៨ ខែកុម្ភៈ ឆ្នាំ២០២៦ ថា មេដឹកនាំកំពូលអ៊ីរ៉ង់ ត្រូវបានសម្លាប់ក្នុងការវាយប្រហារតាមផ្លូវអាកាសរួមគ្នា រវាងសហរដ្ឋអាមេរិក និងអ៊ីស្រាអែល។
តាមរបាយការណ៍ពីទីភ្នាក់ងារសារព័ត៌មានអ៊ីរ៉ង់ រដ្ឋាភិបាលអ៊ីរ៉ង់បានប្រកាសកាន់ទុក្ខទូទាំងប្រទេសរយៈពេល ៤០ ថ្ងៃ ដើម្បីបង្ហាញពីទុក្ខក្រៀមក្រំនៃការស្លាប់របស់មេដឹកនាំកំពូល និងបានប្រកាសឈប់សម្រាកថ្នាក់ជាតិរយៈពេល ៧ ថ្ងៃ ផងដែរ។
ជាមួយគ្នានេះ សារព័ត៌មាន TASS បានផ្សព្វផ្សាយថា ទីភ្នាក់ងារសារព័ត៌មាន IRNA រាយការណ៍ថា ប្រធានាធិបតីអ៊ីរ៉ង់ ម៉ាស៊ូដ ប៉េហ្សេសគីយ៉ាន នឹងដឹកនាំប្រទេសជាបណ្ដោះអាសន្ន ក្នុងអំឡុងពេលផ្លាស់ប្តូរនយោបាយ និងរៀបចំការគ្រប់គ្រងរដ្ឋបន្ត។
ការវិវត្តន៍នេះ បានបង្កើនភាពតានតឹងក្នុងតំបន់មជ្ឈឹមបូព៌ា និងបានទាក់ទាញការតាមដានយ៉ាងជិតស្និទ្ធពីសហគមន៍អន្តរជាតិ ខណៈពេលអ៊ីរ៉ង់កំពុងចូលស្ថានភាពកាន់ទុក្ខ និងរៀបចំដំណើរការបន្តអំណាចនៅកម្រិតជាតិ។
