អគ្គស្នងការនគរបាលជាតិម៉ាឡេស៊ីបានប្រកាសនាថា អាជ្ញាធរកំពុងបើកការស៊ើបអង្កេតជុំវិញការឃុបឃិតជាសម្ងាត់មួយ ដើម្បី “ទម្លាក់រដ្ឋាភិបាល និងបំផ្លិចបំផ្លាញស្ថិរភាពជាតិ”។ នេះបើយោងតាមការចេញផ្សាយដោយសារព័ត៌មាន Reuters។
លោកអគ្គស្នងការនគរបាលជាតិម៉ាឡេស៊ី បានបញ្ជាក់ក្នុងសេចក្តីថ្លែងការណ៍ថា គម្រោងឃុបឃិតនេះមានការពាក់ព័ន្ធនឹងបុគ្គលមានឥទ្ធិពល ក្នុងស្រុកម្នាក់ ព្រមទាំងស្ថាប័នព័ត៌មានអន្តរជាតិមួយ ប៉ុន្តែលោកមិនបានបញ្ចេញអត្តសញ្ញាណពួកគេឡើយ។ បច្ចុប្បន្នសំណុំរឿងនេះ កំពុងត្រូវ បានស៊ើបអង្កេតក្រោមច្បាប់ប្រឆាំងការបំផ្លាញលទ្ធិប្រជាធិបតេយ្យសភា ដែលជនល្មើសអាចប្រឈមមុខនឹងការផ្តន្ទាទោសដាក់ពន្ធនាគារ អតិបរមារហូតដល់ ២០ឆ្នាំ ប្រសិនបើរកឃើញកំហុស។
គួរបញ្ជាក់ថា មកទល់ពេលនេះ ខាងភាគីនគរបាលពុំទាន់ទម្លាយព័ត៌មានលម្អិតបន្ថែម ជុំវិញគម្រោងក្បត់ជាសម្ងាត់នេះនៅឡើយទេ។ ជុំវិញបញ្ហានេះ រដ្ឋមន្ត្រីក្រសួងទូរគមនាគមន៍ និងជាអ្នកនាំពាក្យរដ្ឋាភិបាលបានចាត់ទុកករណីនេះថា ជារឿងដ៏ធ្ងន់ធ្ងរបំផុតដោយទុកភារកិច្ច ឱ្យសមត្ថកិច្ចស៊ើបអង្កេតឱ្យបានពេញលេញ ខណៈការិយាល័យអគ្គរដ្ឋអាជ្ញា ក៏បានអំពាវនាវឱ្យមានការស៊ើបអង្កេតឲ្យគ្រប់ជ្រុងជ្រោយ ប្រកបដោយវិជ្ជាជីវៈ និងគ្មានការជ្រៀតជ្រែកពីភាគីណាមួយឡើយ៕
