ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក.) បានមានប្រសាសន៍ថា ក្នុងនាមជាយុវជនជំនាន់ក្រោយ ពិតជាមានមោទនភាពចំពោះគំរូវីរភាព និងការលះបង់របស់ថ្នាក់ដឹកនាំជំនាន់មុន ក្នុងបុព្វហេតុស្វែងរកសុខសន្តិភាព ស្ថិរភាព និងការអភិវឌ្ឍជូនជាតិមាតុភូមិ។
ថ្លែងក្នុងពិធីប្រកាសដាក់ឱ្យអនុវត្តជាផ្លូវការផែនទីបង្ហាញផ្លូវសហភាពសហព័ន្ធយុវជនកម្ពុជា ២.០ ឆ្ពោះទៅឆ្នាំ២០២៨ កាលពីថ្ងៃទី២២ ខែកុម្ភៈ ឆ្នាំ២០២៦ នៅមជ្ឈមណ្ឌលសន្និបាត និងពិពណ៌កោះពេជ្រ ឯកឧត្តម ហ៊ុន ម៉ានី បានថ្លែងថា ក្នុងរយៈពេល៤៧ឆ្នាំនេះ ដោយឈរលើកត្តា ៣ សំខាន់ៗ ទី១.ការបិទទំព័រខ្មៅងងឹតនៃការកាប់សម្លាប់ជាតិសាសន៍ខ្លួនឯង, ទី២.ការកសាងប្រទេសឡើងវិញពីបាតដៃទទេលើគ្រប់វិស័យ ដែលជាខឿនដ៏រឹងមាំនៃសង្គមជាតិយើង, និង ទី៣.អន្តរកាលនៃការបន្តវេនដោយស្ថិរភាព ដែលជាបុរេលក្ខខណ្ឌដ៏ចាំបាច់សម្រាប់វិបុលភាព និងអនាគតនៃប្រទេសជាតិ។
ឯកឧត្តមបានបន្តថា ក្នុងបរិការណ៍សកលដែលវិវត្តយ៉ាងឆាប់រហ័ស និងមិនប្រាកដប្រជា សហភាពសហព័ន្ធយុវជនកម្ពុជា (ស.ស.យ.ក.) ក្នុងនាមជាអង្គការសមាគមយុវជនដ៏ធំជាងគេ បន្តរួមចំណែកយ៉ាងសកម្មដល់ដំណើរកសាង ការពារ និងអភិវឌ្ឍប្រទេសជាតិ ដោយអនុវត្តតាមមាគ៌ាដឹកនាំរបស់ សម្តេចអគ្គមហាសេនាបតីតេជោ ហ៊ុន សែន អតីតប្រធានទី១ នៃ ស.ស.យ.ក. នូវសសរស្តម្ភ ០៣៖ ទី១.ភាពជាក់ស្តែងនិយម, ទី២.ការរស់នៅក្បែរប្រជាជន ទី៣.ការពារជាតិ និងតម្កល់ប្រយោជន៍ប្រជាជនជាធំ។
ឯកឧត្តម ហ៊ុន ម៉ានី បានបញ្ជាក់ថា ដោយឈរលើស្មារតីបុរេសកម្ម ស.ស.យ.ក. បានដាក់ចេញនូវ “ផែនទីបង្ហាញផ្លូវ ស្តីពី សហភាពសហព័ន្ធយុវជនកម្ពុជា ២.០” បំពេញបន្ថែមឱ្យ “ផែនការយុទ្ធសាស្ត្រយុវជនក្នុងបុព្វហេតុជាតិមាតុភូមិ ២០២៣-២០២៨” ដែលនឹងចូលរួមគាំទ្ររាជរដ្ឋាភិបាល ក្នុងការអនុវត្ត “យុទ្ធសាស្ត្របញ្ចកោណដំណាក់កាលទី១” ព្រមទាំងគោលនយោបាយ វិធានការគន្លឹះ និងកម្មវិធីអាទិភាពនានា។
ឯកឧត្តម ហ៊ុន ម៉ានី បានបញ្ជាក់បន្ថែមថា រាល់សកម្មភាព និងព្រឹត្តិការណ៍នានាដែល ស.ស.យ.ក. បានរៀបចំឡើង គឺក្នុងគោលបំណងកសាង និងស្វែងរកចំណុចរួមឱ្យបានច្រើន ព្រមទាំងបន្តពូនជ្រុំស្មារតីយុវជន ក្នុងបុព្វហេតុបម្រើជាតិ និងប្រជាជន៕
