ជនសង្ស័យប្រមាណជាង ៨០០នាក់ ត្រូវបានកម្លាំងសមត្ថកិច្ចធ្វើការឃាត់ខ្លួន ក្នុងកិច្ចប្រតិបត្តិការចុះបង្ក្រាបករណីឆបោកតាមប្រព័ន្ធបច្ចេកវិទ្យា (Online Scams) នៅអគារកាស៊ីណូ ស៊ិនលិ ស្ថិតក្នុងភូមិ៤ សង្កាត់៤ ក្រុង-ខេត្តព្រះសីហនុ។
ប្រតិបត្តិការនេះ បានអនុវត្តតាមអនុសាសន៍ដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ និងក្រោមការដឹកនាំបញ្ជាពីគណៈបញ្ជាការឯកភាពខេត្តព្រះសីហនុ ព្រមទាំងមានការសម្របសម្រួលនីតិវិធីពី ព្រះរាជអាជ្ញា តំណាងអយ្យការអមសាលាដំបូងខេត្តព្រះសីហនុ។
ក្រោមការដឹកនាំផ្ទាល់ដោយ ឯកឧត្តម ឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ កម្លាំងនគរបាលជំនាញ បានសហការជាមួយកម្លាំងកងរាជអាវុធហត្ថខេត្ត ចុះត្រួតពិនិត្យ និងឆែកឆេរនៅជាន់ទី១៨ និងជាន់ទី១៩ នៃអគារកាស៊ីណូខាងលើ។
ជាលទ្ធផល សមត្ថកិច្ចបានរកឃើញមនុស្សសរុបប្រហែល ៨០៥នាក់ មានសញ្ជាតិចម្រុះចំនួន ៧ រួមមាន សញ្ជាតិចិន កូរ៉េ ជប៉ុន អាមេរិក ភីលីពីន ប៉ាគីស្ថាន ឥណ្ឌា និងខ្មែរ។ ព្រមទាំងបានដកហូតវត្ថុតាងសំខាន់ៗ រួមមាន កុំព្យូទ័រប្រហែល ៦៥០គ្រឿង និងទូរស័ព្ទដៃប្រមាណ ១,០០០គ្រឿង។
បច្ចុប្បន្ន ករណីខាងលើ សមត្ថកិច្ចជំនាញ កំពុងបន្តអនុវត្តនីតិវិធីតាមផ្លូវច្បាប់ ដើម្បីស្រាវជ្រាវ និងចាត់ការតាមច្បាប់ជាធរមាន៕
