ស្នងការដ្ឋាននគរបាលខេត្តពោធិ៍សាត់ នៅថ្ងៃទី៣០ ខែមករា ឆ្នាំ២០២៦ នេះ បានចេញសេចក្ដីបំភ្លឺព័ត៌មានជាសាធារណៈ ដើម្បីវាយបកទៅលើគណនីបណ្ដាញសង្គមមួយចំនួន ដែលបានចុះផ្សាយព័ត៌មានមិនពិត បង្ខូចកេរ្តិ៍ឈ្មោះសមត្ថកិច្ចពាក់ព័ន្ធនឹងការបង្ក្រាបបទល្មើសអនឡាញ (Online Scams)។
ការចេញមកបំភ្លឺនេះ ធ្វើឡើងបន្ទាប់ពីមានគណនីហ្វេសប៊ុកឈ្មោះ “Lê Đức Thọ-I” និង “រ៉ា-Maverick” បានបង្ហោះខ្លឹមសារចោទប្រកាន់ថា នគរបាលខេត្តពោធិ៍សាត់បានចាប់ជម្រិតទារប្រាក់រាប់ម៉ឺនដុល្លារពីជនជាតិចិន ជាថ្នូរនឹងការដោះលែង។ ស្នងការដ្ឋានបានបញ្ជាក់ច្បាស់ៗថា នេះគឺជា “ព័ត៌មានប្រឌិត” ក្នុងចេតនាអាក្រក់ដើម្បីធ្វើឱ្យសាធារណជនមានការភ័ន្តច្រឡំ។
ផ្ទុយពីការចោទប្រកាន់ ស្នងការដ្ឋានបានបង្ហាញរបាយការណ៍ការងារយ៉ាងសកម្ម ចាប់ពីថ្ងៃទី១៥ ដល់ថ្ងៃទី២៧ ខែមករា ឆ្នាំ២០២៦ ដោយសម្រេចបានលទ្ធផលដូចជា៖ ឃាត់ខ្លួនជនបរទេសសរុប៖ ៧៨ នាក់ (ស្រី ០៣ នាក់) ក្នុងនោះរួមមាន៖ ជនជាតិចិន ២២ នាក់, ជនជាតិមីយ៉ាន់ម៉ា ៤៩ នាក់ និងជនជាតិថៃ ០៧ នាក់។ជនបរទេសទាំងអស់ត្រូវបានបញ្ជូនទៅអគ្គនាយកដ្ឋានអន្តោប្រវេសន៍ ដើម្បីបន្តនីតិវិធីច្បាប់រួចរាល់ហើយ មិនមានការដោះលែងដូចការចោទប្រកាន់ឡើយ។
ស្នងការនគរបាលខេត្តពោធិ៍សាត់ បានសង្កត់ធ្ងន់ថា ខ្លួននឹងបន្តអនុវត្តតាមបទបញ្ជារបស់រាជរដ្ឋាភិបាល និងក្រសួងមហាផ្ទៃ ក្នុងការលុបបំបាត់រាល់បទល្មើសបច្ចេកវិទ្យា និងការស្នាក់នៅខុសច្បាប់របស់ជនបរទេស ដើម្បីរក្សាសន្តិសុខ និងសណ្ដាប់ធ្នាប់សង្គម។
ទន្ទឹមនឹងនេះ ស្នងការដ្ឋានក៏បានអំពាវនាវដល់អ្នកប្រើប្រាស់បណ្ដាញសង្គមទាំងអស់ ត្រូវមានការពិចារណាឱ្យបានច្បាស់លាស់មុននឹងជឿ ឬចែកចាយព័ត៌មានដែលគ្មានប្រភពច្បាស់លាស់ ដែលអាចនាំឱ្យមានទោសទណ្ឌតាមផ្លូវច្បាប់៕
