សមត្ថកិច្ចកម្ពុជា បើកប្រតិបត្តិការទ្រង់ទ្រាយធំ បង្ក្រាបទីតាំងសង្ស័យប្រព្រឹត្តអំពើឆបោកតាមប្រព័ន្ធបច្ចេកវិទ្យា (Online Scams) នៅក្រុងបាវិត ខេត្តស្វាយរៀង ដោយបានឃាត់ខ្លួនជនបរទេសសរុបចំនួន ២,០៤៤ នាក់ ពីជាតិជាច្រើន បង្ហាញពីការប្តេជ្ញាចិត្តរឹងមាំរបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងបទល្មើសឆបោកអនឡាញ។
ប្រតិបត្តិការនៅព្រឹកថ្ងៃទី៣១ ខែមករា ឆ្នាំ២០២៦ ដោយកម្លាំងនគរបាល នៃអគ្គស្នងការដ្ឋាននគរបាលជាតិ សហការជាមួយព្រះរាជអាជ្ញា នៃអយ្យការអមសាលាដំបូងខេត្តស្វាយរៀង លើទីតាំងកាស៊ីណូវ៉ាន់ឆឹង (A7) ដែលមានអគារចំនួន ២២ ខ្នង ស្ថិតក្នុងភូមិតាបឹប សង្កាត់បាវិត ក្រុងបាវិត។
ឯកឧត្តមនាយឧត្តមសេនីយ៍ ស ថេត អគ្គស្នងការនគរបាលជាតិ បានឱ្យដឹងថា ប្រតិបត្តិការនេះដឹកនាំដោយលោកឧត្តមសេនីយ៍ឯក ជីវ ផល្លី និងលោកឧត្តមសេនីយ៍ឯក មួង សុធា អគ្គស្នងការរង ដោយប្រើកម្លាំងជំនាញប្រមាណ ៧០០ នាក់។ ជាលទ្ធផល សមត្ថកិច្ចបានឃាត់ខ្លួនជនសង្ស័យជាជនបរទេសចំនួន ២,០៤៤ នាក់ រួមមាន ជនជាតិចិន ១,៧៩២ នាក់ វៀតណាម ១៧៧ នាក់ មីយ៉ាន់ម៉ា ១៧៩ នាក់ នេប៉ាល់ ៣០ នាក់ ឥណ្ឌា ៣៦ នាក់ ចិនតៃវ៉ាន់ ៥ នាក់ ឡាវ ២ នាក់ ម៉ាឡេស៊ី ១ នាក់ និងម៉ិកស៊ិក ១ នាក់។
លោក ទូច សុឃៈ អ្នកនាំពាក្យរងក្រសួងមហាផ្ទៃ បានបញ្ជាក់ថា លទ្ធផលនៃប្រតិបត្តិការនេះ ជាសារដ៏ច្បាស់លាស់ទៅកាន់សាធារណមតិជាតិ និងអន្តរជាតិ ថារាជរដ្ឋាភិបាលកម្ពុជា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី គ្មានថ្ងៃបន្ធូរដៃឱ្យក្រុមឧក្រិដ្ឋជនឆបោកតាមអនឡាញឡើយ។ លោកបានសង្កត់ធ្ងន់ថា «កម្ពុជាមិនមែនជាទីជម្រកសុវត្ថិភាពរបស់ជនល្មើសទេ ប៉ុន្តែជាឋាននរករបស់ជនល្មើស»។
គួរបញ្ជាក់ថា រាជរដ្ឋាភិបាលកម្ពុជា កាលពីថ្ងៃទី២០ ខែកុម្ភៈ ឆ្នាំ២០២៥ បានបង្កើតគណៈកម្មការជាតិប្រឆាំងការឆបោកតាមប្រព័ន្ធបច្ចេកវិទ្យា ដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដោយមានឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ ជាអនុប្រធាន។
ក្នុងរយៈពេល ៩ ខែ ឆ្នាំ២០២៥ សមត្ថកិច្ចបានបើកប្រតិបត្តិការបង្ក្រាប Online Scams ចំនួន ៤៨ លើក ឃាត់ខ្លួនបញ្ជូនទៅតុលាការ ១៦៨ នាក់ និងបណ្តេញជនបរទេសចេញពីកម្ពុជាចំនួន ២,៧២២ នាក់។ ឈានចូលដើមឆ្នាំ២០២៦ សមត្ថកិច្ចក៏បានចាប់ខ្លួនមេខ្លោងធំមួយ ឈ្មោះ ចេន ហ្ស៊ី និងបក្សពួក បញ្ជូនទៅប្រទេសចិន បន្ទាប់ពីការស៊ើបអង្កេតយ៉ាងយូរ។
ក្រសួងមហាផ្ទៃ បានអះអាងថា នឹងបន្តពង្រឹងកិច្ចសហប្រតិបត្តិការជាមួយបណ្តាប្រទេសក្នុង និងក្រៅតំបន់ ដើម្បីបង្ការ ទប់ស្កាត់ និងបង្ក្រាបបទល្មើសឆបោកតាមប្រព័ន្ធអនឡាញ ខណៈមន្ត្រីណាដែលពាក់ព័ន្ធ ឬបណ្ដែតបណ្ដោយបទល្មើសនេះ នឹងត្រូវទទួលខុសត្រូវចំពោះមុខច្បាប់ ដល់ថ្នាក់ដកតំណែង និងបណ្តេញចេញពីក្របខ័ណ្ឌ។
