ក្រុមប្រឹក្សាសន្តិភាព ស្វាគមន៍ចំពោះប្រទេសកម្ពុជាជាសមាជិកស្ថាបនិកនៃអង្គការអន្តរជាតិ ដែលកំពុងមានភាពរីកចម្រើន

ក្រុមប្រឹក្សាសន្តិភាព ស្វាគមន៍ចំពោះប្រទេសកម្ពុជាជាសមាជិកស្ថាបនិកនៃអង្គការអន្តរជាតិ ដែលកំពុងមានភាពរីកចម្រើនទៅមុខ។ នេះបើយោងតាមគណនី Board of peace នៃបណ្តាញសង្គម X។ ក្រុមប្រឹក្សាសន្តិភាព គឺជាគំនិតផ្ដួចផ្ដើមរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ នាពេលថ្មីៗកន្លងទៅនេះ ដែលជាគំនិតផ្ដួចផ្ដើមមួយចង់ឱ្យពិភពលោកមានសន្តិភាពពិតប្រាកដ។

អ្នកនាំពាក្យរាជរដ្ឋាភិបាលកម្ពុជាឯកឧត្តម ប៉ែន បូណា បានបញ្ជាក់ថា ការសម្រេចចិត្តចូលរួមជាសមាជិកស្ថាបនិកនៃក្រុមប្រឹក្សាសន្តិភាពតាមការអញ្ជើញរបស់ឯកឧត្តមប្រធានាធិបតីសហរដ្ឋអាម៉េរិក Donald J. Trump នៅពេលនេះ គឺជាសក្ខីភាពថ្មីមួយទៀតដែលបញ្ជាក់អំពីសុច្ឆន្ទៈមិនចេះរីងស្ងួតរបស់កម្ពុជាដើម្បីបុព្វហេតុសន្តិភាព។ អ្នកនាំពាក្យរាជរដ្ឋាភិបាលបញ្ជាក់ថា ការតម្កល់តម្លៃសន្តិភាពជាអាទិភាព និងការចូលរួមយ៉ាងសកម្មក្នុងការថែរក្សាសន្តិភាពក្នុងប្រទេស ក្នុងតំបន់ ក៏ដូចជាក្នុងសាកល លោក បានធ្វើឱ្យពិភពលោកនឹកឃើញដល់កម្ពុជាជានិច្ចនៅពេលដែលគេនិយាយពីសន្តិភាព។

សូមជំរាបថា សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានសម្រេចចូលរួមជាសមាជិកស្ថាបនិកនៃក្រុមប្រឹក្សាសន្តិភាព (The Board of Peace) តាមការអញ្ជើញរបស់ឯកឧត្តមប្រធានាធិបតីសហរដ្ឋអាម៉េរិក Donald J. Trump កាលពីថ្ងៃទី១៦ ខែមករា ឆ្នាំ២០២៦។ សម្តេចនាយករដ្ឋមន្ត្រីបានគូសបញ្ជាក់ទៀតថា ការចូលរួមនេះ គឺដើម្បីបង្ហាញពីឆន្ទៈរបស់កម្ពុជាក្នុងការគាំទ្រ និងរួមចំណែកដល់ការលើកកម្ពស់ការរក្សាសន្តិភាពសកល៕