ក្រសួងវប្បធម៌ និងវិចិត្រសិល្បៈ បានចេញសេចក្តីប្រកាសព័ត៌មាន នៅថ្ងៃទី ១២ ខែមករា ឆ្នាំ ២០២៦ បង្ហាញអំពីស្ថានភាពខូចខាតយ៉ាងធ្ងន់ធ្ងរ នៅរមណីយដ្ឋានប្រាសាទព្រះវិហារ និងតំបន់ជុំវិញ បណ្តាលមកពីការបាញ់ប្រហាររបស់យោធាថៃ ក្នុងអំឡុងពីរដំណាក់កាលធំៗ គឺចន្លោះថ្ងៃទី ២៤–២៨ ខែកក្កដា ឆ្នាំ ២០២៥ និងថ្ងៃទី ៧–២៧ ខែធ្នូ ឆ្នាំ ២០២៥។
យោងតាមសេចក្តីប្រកាសព័ត៌មាន ការវាយប្រហារនៅខែកក្កដា ឆ្នាំ ២០២៥ បានបណ្តាលឱ្យប្រាង្គប្រាសាទព្រះវិហារ ខូចខាតចំនួន ១៤២ កន្លែង និងតំបន់ជុំវិញចំនួន ៤២ កន្លែង រួមទាំងវត្តកែវសិក្ខាគិរីស្វារៈ ហេដ្ឋារចនាសម្ព័ន្ធសាធារណៈ និងអគារការិយាល័យអភិរក្សរបស់អាជ្ញាធរជាតិព្រះវិហារ។ លើសពីនេះ សហគមន៍ជុំវិញប្រាសាទ ក៏រងការខូចខាតចំនួន ៦០ កន្លែង បណ្តាលឱ្យប្រជាពលរដ្ឋ ១៤,៨៣២ នាក់ ត្រូវបានបង្ខំចិត្តជម្លៀសចេញពីលំនៅឋាន។
ចំណែកការវាយប្រហារនៅខែធ្នូ ឆ្នាំ ២០២៥ ត្រូវបានក្រសួងវប្បធម៌ និងវិចិត្រសិល្បៈ បញ្ជាក់ថា មានលក្ខណៈធ្ងន់ធ្ងរជាងមុនយ៉ាងខ្លាំង។ ភស្តុតាងរូបថត និងវីដេអូ ដែលប្រមូលបានដោយអាជ្ញាធរជាតិព្រះវិហារ បង្ហាញថា សំណង់ស្ថាបត្យកម្មសំខាន់ៗ ស្ទើរតែទាំងអស់ ចាប់ពីគោបុរៈទី ១ ដល់គោបុរៈទី ៥ រួមទាំងស្ពានហាលត និងជណ្តើរបុរាណខាងជើង បានរងផលប៉ះពាល់យ៉ាងធ្ងន់ធ្ងរ ដោយសារការផ្លោងគ្រាប់ធុនធ្ងន់ និងការទម្លាក់គ្រាប់បែកពីយន្តហោះគ្មានមនុស្សបើក និងយន្តហោះចម្បាំង។
សេចក្តីប្រកាសព័ត៌មានដដែល ក៏បានឱ្យដឹងថា គម្រោងអភិរក្ស និងជួសជុលប្រាសាទ ដែលធ្វើឡើងក្រោមកិច្ចសហប្រតិបត្តិការអន្តរជាតិ ត្រូវបានបំផ្លាញយ៉ាងធ្ងន់ធ្ងរ។ ក្នុងនោះ រួមមានគម្រោងជួសជុលជណ្តើរបុរាណខាងជើង (កម្ពុជា–សហរដ្ឋអាមេរិក) គម្រោងគោបុរៈទី ៥ (កម្ពុជា–ឥណ្ឌា) និងសំណង់គោបុរៈទី ១ ទី ២ និងទី ៣ (កម្ពុជា–ចិន) ដែលមួយចំនួន ត្រូវការសិក្សាបច្ចេកទេសឡើងវិញទាំងស្រុង។
ក្រសួងវប្បធម៌ និងវិចិត្រសិល្បៈ បានបញ្ជូនរបាយការណ៍វាយតម្លៃការខូចខាតនេះ ទៅកាន់អង្គការយូណេស្កូ គណៈកម្មាធិការបេតិកភណ្ឌពិភពលោក រដ្ឋសមាជិក ICC-Preah Vihear និងសហគមន៍អន្តរជាតិ ដើម្បីជ្រាបព័ត៌មាន និងស្វែងរកការគាំទ្រ។
ជាមួយគ្នានេះ ក្រសួងក៏បានអំពាវនាវឱ្យមានការគោរពច្បាប់អន្តរជាតិ រួមទាំងអនុសញ្ញាទីក្រុងឡាអេ ឆ្នាំ ១៩៥៤ និងពិធីសារទីពីរ ឆ្នាំ ១៩៩៩ ស្តីពីការការពារសម្បត្តិវប្បធម៌ក្នុងពេលមានជម្លោះប្រដាប់អាវុធ ព្រមទាំងច្បាប់មនុស្សធម៌អន្តរជាតិ ដើម្បីធានាការការពារ និងស្តារឡើងវិញ នូវប្រាសាទព្រះវិហារ ដែលជាបេតិកភណ្ឌពិភពលោក និងជាទីសក្ការៈរបស់កម្ពុជា។
