យ៉ាងហោចណាស់មនុស្ស ៥៣៨នាក់ស្លាប់ អំឡុងការបង្ក្រាបដោយហិង្សាលើការតវ៉ានៅទូទាំងប្រទេសអ៊ីរ៉ង់ ហើយគេបារម្ភថាចំនួនអ្នកស្លាប់អាចនឹងមានច្រើនជាងនេះ ខណៈរដ្ឋធានីតេហ៍រ៉ង់ ព្រមានថា ទីតាំងកងទ័ពសហរដ្ឋអាម៉េរិក និងអ៊ីស្រាអ៊ែល នៅក្នុងតំបន់ នឹងក្លាយជា «គោលដៅស្របច្បាប់» របស់អ៊ីរ៉ង់ ប្រសិនបើអាម៉េរិកប្រើប្រាស់កម្លាំងបាយ ដើម្បីការពារក្រុមបាតុករ ។
ទីភ្នាក់ងារសារព័ត៌មានសកម្មជនសិទ្ធិមនុស្ស (HRANA) ដែលមានមូលដ្ឋាននៅសហរដ្ឋអាម៉េរិក បានឱ្យដឹងថា មនុស្សជាង ១០,៦០០នាក់ត្រូវអាជ្ញាធរអ៊ីរ៉ង់ចាប់ខ្លួននៅក្នុងរយៈពេលត្រឹមតែ២សប្ដាហ៍ប៉ុណ្ណោះ ដោយទីភ្នាក់ងារខាងលើនេះ ធ្លាប់បានផ្តល់ព័ត៌មានយ៉ាងសុក្រឹតក្នុងអំឡុងស្ថានភាពចលាចលនាពេលកន្លងមកក្នុងប្រទេសអ៊ីរ៉ង់ ដោយផ្អែកលើការត្រួតពិនិត្យព័ត៌មានពីសកម្មជននៅក្នុងប្រទេសអ៊ីរ៉ង់ដោយផ្ទាល់ ។
ដោយសារតែប្រព័ន្ធអ៊ីនធឺណិត និងទូរសព្ទត្រូវបានកាត់ផ្តាច់ទាំងស្រុងនៅក្នុងប្រទេសអ៊ីរ៉ង់ ធ្វើឱ្យអ្នកសង្កេតការណ៍អន្តរជាតិ និងទីភ្នាក់ងារសារព័ត៌មានអន្តរជាតិនានា មានការពិបាកលំបាកខ្លាំងលើការវាយតម្លៃអំពីតួលេខនៃអ្នកស្លាប់និងអ្នករងរបួស ។
ទន្ទឹមនឹងនោះ សហគមន៍អន្តរជាតិបារម្ភថា ការបិទខ្ទប់ព័ត៌មាននេះ កំពុងផ្តល់ឱកាសឱ្យក្រុមអ្នកជ្រុលនិយមនៅក្នុងស្ថាប័នសន្តិសុខអ៊ីរ៉ង់ ចាប់ផ្តើមការបង្រ្កាបដោយបង្ហូរឈាមបន្ថែមទៀត ហើយបើទោះបីជាមានការបង្ក្រាបយ៉ាងណាក្ដី ប៉ុន្តែនៅតែមានក្រុមបាតុករបានបន្តបង្ហាញវត្តមាននៅតាមដងផ្លូវក្នុងរដ្ឋធានី និងទីក្រុងធំៗផ្សេងទៀតរបស់ប្រទេសនេះ ជាថ្មីម្តងទៀត កាលពីព្រឹកថ្ងៃអាទិត្យ ដើម្បីទាមទារសេរីភាព ។
ដោយឡែក ប្រធានាធិបតីអាម៉េរិក លោក ដូណាល់ ត្រាំ តាមរយៈសារនៅលើបណ្ដាញសង្គម បានបង្ហាញនូវការគាំទ្រដល់ក្រុមបាតុករ ដោយរៀបរាប់ថា៖ «ប្រជាជនអ៊ីរ៉ង់ កំពុងស្វែងរកសេរីភាព ប្រហែលជាមិនធ្លាប់មានពីមុនមកនោះទេ។ សហរដ្ឋអាម៉េរិក ត្រៀមខ្លួនជាស្រេចដើម្បីជួយ!!!» ។
យោងតាមប្រភពចំនួនពីរដែលដឹងពីកិច្ចការពិភាក្សាផ្ទៃក្នុងរបស់សេតវិមាន បានបង្ហើបថា លោកប្រធានាធិបតីត្រាំ និងក្រុមសន្តិសុខជាតិកំពុងពិចារណាលើការឆ្លើយតបជាច្រើន រួមមានការវាយប្រហារតាមប្រព័ន្ធអ៊ីនធឺណិត និងការវាយប្រហារដោយផ្ទាល់ពីសំណាក់សហរដ្ឋអាម៉េរិក ឬអ៊ីស្រាអ៊ែល។ ទោះជាបែបណាក្ដី សេតវិមាន មិនទាន់បានបញ្ជាក់ថា រដ្ឋបាលសហរដ្ឋអាម៉េរិកបានធ្វើការសម្រេចចិត្តណាមួយនៅឡើយទេ ៕
