ទំហំពាណិជ្ជកម្មនាំចេញ-នាំចូលសរុបរបស់កម្ពុជា ក្នុងឆ្នាំ២០២៥ សម្រេចបានក្នុងតម្លៃទឹកប្រាក់ប្រមាណ ៦៥,២០ពាន់លានដុល្លារអាម៉េរិក កើនឡើង ១៨% បើធៀបនឹងឆ្នាំ២០២៤ ក្នុងនោះការនាំចេញរបស់កម្ពុជា មានកំណើនរហូតដល់ ១៧%។ នេះបើយោងតាមការអះអាងរបស់លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម។
ថ្លែងក្នុងពិធីបើកសន្និបាតបូកសរុបលទ្ធផលការងារពាណិជ្ជកម្ម ឆ្នាំ២០២៥ និងទិសដៅការការងារឆ្នាំ២០២៦ របស់ក្រសួងពាណិជ្ជកម្ម នាព្រឹកថ្ងៃទី ៨ខែមករា ឆ្នាំ២០២៦ លោកជំទាវ ចម និម្មល បានមានប្រសាសន៍ថា កំណើនទំហំពាណិជ្ជកម្មនេះ ជាលទ្ធផលកើតចេញពីវិធានការដាក់ចេញដ៏មុតស្រួចជាបន្តបន្ទាប់ របស់រាជរដ្ឋាភិបាល ក្នុងការជំរុញការធ្វើនូវពិពិធកម្មពាណិជ្ជកម្មក្នុងស្រុក និងការនាំចេញ តាមរយៈវិធានការបង្កើនតម្លៃបន្ថែមទៅក្នុងខ្សែច្រវាក់តម្លៃ ពង្រឹងខ្សែច្រវាក់ផ្គត់ផ្គង់ក្នុងស្រុក តំបន់ និងសកល លើកស្ទួយធុរកិច្ចថ្មី សហគ្រិនភាព និងបន្តធ្វើឲ្យប្រសើរឡើងនូវកិច្ចសម្រួលពាណិជ្ជកម្ម ដើម្បីអាចចូលរួមប្រកបដោយភាពប្រកួតប្រជែង និងប្រសិទ្ធភាពខ្ពស់ ក្នុងបរិបទនៃពាណិជ្ជកម្មឌីជីថលផងដែរ។
លោកជំទាវ បានលើកឡើងថា ទោះជាយើងស្ថិតក្នុងបរិបទមិនប្រាកដជាខ្ពស់ នៃសេដ្ឋកិច្ច ពាណិជ្ជកម្មសកល ដោយសារមានការជះឥទ្ធិពលអវិជ្ជមានពីកត្តាភូមិសាស្ត្រនយោបាយ និងសង្គ្រាម ព្រមទាំងជម្លោះតាមព្រំដែនកម្ពុជា-ថៃ ក្រសួងនៅតែបោះជំហានយ៉ាងស្វាហាប់ តាមមាគារអភិវឌ្ឍន៍សេដ្ឋកិច្ច ពាណិជ្ជកម្ម ដោយបន្តធ្វើសមាហរន្តកម្ម ទៅក្នុងសេដ្ឋកិច្ចតំបន់ និងពិភពលោក ស្របតាមចក្ខុវិស័យ និងអភិក្រម ពង្រឹងទីផ្សារចាស់ និងពង្រីកទីផ្សារថ្មី និងបន្តអនុវត្តតាមយុទ្ធសាស្ត្រកែទម្រង់រស់ មិនកែទម្រង់ស្លាប់ សំដៅលើកកម្ពស់អភិបាលកិច្ចស្ថាប័ន ពង្រឹងប្រសិទ្ធនៃការផ្តល់សេវាសាធារណៈ ដើម្បីអភិវឌ្ឍន៍វិស័យពាណិជ្ជកម្មប្រកបដោយចីរភាព។
ដៃគូពាណិជ្ជកម្មសំខាន់ៗរបស់កម្ពុជា រួមមាន៖ ចិន សហរដ្ឋអាមេរិក វៀតណាម ថៃ ជប៉ុន សិង្ហបុរី កាណាដា អេស្បាញ អាល្លឺម៉ង់ និងម៉ាឡេស៊ី។
មុខទំនិញសំខាន់ៗរបស់កម្ពុជា ដែលនាំចេញទៅកាន់ទីផ្សារអន្តរជាតិ រួមមាន៖ ផលិតផលវាយនភណ្ឌកាត់ដេរ សម្លៀកបំពាក់ ស្បែកជើង និងទំនិញធ្វើដំណើរ, ផលិតផលកសិកម្ម ដែលមានដូចជា ស្រូវ អង្ករ គ្រាប់ស្វាយចន្ទី និងដំឡូងមី និងកៅស៊ូ, គ្រឿងសង្ហារឹម, សំបកកង់រថយន្ត, បន្ទះសូឡា, កង់, សម្ភារអគ្គិសនី, គ្រឿងបង្គុំអេឡិចត្រូនិក និងគ្រឿងបង្គុំយានយន្ត ជាដើម។ ចំណែកមុខទំនិញសំខាន់ៗ ដែលកម្ពុជា នាំចូលវិញ មានដូចជា វត្ថុធាតុដើមវាយនភណ្ឌកាត់ដេរ, ប្រេងឥន្ធនៈ, គ្រឿងអេឡិចត្រូនិក, យានយន្ត និងគ្រឿងចក្រ, សម្ភារសំណង់, គ្រឿងឧបភោគបរិភោគ គ្រឿងសម្អាង ឳសថ និងបរិក្ខាពេទ្យ ជាដើម។
ការវិនិយោគនៅកម្ពុជា នឹងទទួលបានអត្ថប្រយោជន៍ជាច្រើនពីកិច្ចព្រមព្រៀងពាណិជ្ជកម្មផ្សេងៗ រួមមាន៖ ភាពជាដៃគូសេដ្ឋកិច្ចគ្រប់គ្រុងជ្រោយក្នុងតំបន់ (RCEP), កិច្ចព្រមព្រៀងពាណិជ្ជកម្មសេរីកម្ពុជា-ចិន, កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា និងអេមីរ៉ាតអារ៉ាប់រួម ដែលបានសម្រួលដល់ការទទួលបានទីផ្សារកាន់តែធំ និងកាត់បន្ថយអត្រាពន្ធគយ។
ម៉្យាងវិញទៀត អ្នកវិនិយោគ ក៏នឹងទទួលបានការអនុគ្រោះពន្ធ EBA ពីសហភាពអឺរ៉ុប និងរួមទាំងការកំណត់ពន្ធថ្មីរបស់សហរដ្ឋអាម៉េរិកលើទំនិញនាំចូលពីកម្ពុជា ក្នុងអត្រា ១៩% ដែលនឹងផ្តល់ឳកាសប្រកួតប្រជែងខ្ពស់សម្រាប់កម្ពុជា ជាមួយបណ្តាលប្រទេសក្នុងតំបន់៕
