តាមរបាយការណ៍ ពីរដ្ឋបាលខេត្តសៀមរាប បានឱ្យដឹងថា គិតត្រឹមម៉ោង ១រសៀល នាថ្ងៃទី ៨ ខែធ្នូ ឆ្នាំ២០២៥ បងប្អូនជនភៀសសឹក បានជម្លៀសមកពីទីតាំងផ្សេងៗគ្នា បានចូលរកទីតាំងសុវត្ថិភាពក្នុងខេត្តសៀមរាប មានចំនួន៥៥៦គ្រួសារ ស្មើនិង១៤៤៥នាក់ នៅតាមបណ្ដាក្រុងស្រុកទូទាំងខេត្តសៀមរាប ក្រោមការយកចិត្តទុកដាក់ខ្ពស់ពីថ្នាក់ដឹកនាំខេត្ត អាជ្ញាធរមូលដ្ឋាន និងមន្ត្រីពាក់ព័ន្ធ។
ក្នុងនោះ រដ្ឋបាលខេត្តសៀមរាប បានត្រៀមទីតាំង នៅតាមបណ្តា ក្រុង ស្រុក ទាំង១៣ ស្មើនិង៦៥ទីតាំង ដើម្បីត្រៀមទទួល បងប្អូនជនភៀសសឹក មកពីតាមបណ្តាខេត្តជាប់ព្រំដែនកម្ពុជាថៃ។
សូមបញ្ជាក់ថា ចាប់ពីវេលាម៉ោងប្រមាណ ៥ ព្រឹកថ្ងៃទី៨ ខែធ្នូ ឆ្នាំ២០២៥ យោធាថៃបានបើកការបាញ់ប្រហារមកលើកងកម្លាំងកម្ពុជា នៅតំបន់ព្រំដែន ហើយបានធ្វើឱ្យប្រជាពលរដ្ឋរស់នៅតំបន់នោះជម្លៀស ចេញពីលំនៅឋានភ្លាម ដើម្បីធានាបានសុខសុវត្ថិភាព៕
