កាលពីវេលាម៉ោង ១១:០០ នាទីព្រឹក ថ្ងៃទី ០៣ ខែធ្នូ ឆ្នាំ ២០២៥ បានកើតមានករណីជនជាតិថៃ ២ នាក់ សង្ស័យថាជាអ្នកញៀនគ្រឿងញៀន កាន់កាំបិតវាយចាក់បុរសសន្តិសុខខ្មែរ ២ នាក់ នៅក្នុងបុរីសាន ស៊ានហូ ភូមិគីឡូម៉ែត្រលេខ ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បណ្តាលឲ្យសន្តិសុខម្នាក់ស្លាប់ និងម្នាក់ទៀតរងរបួសធ្ងន់។
សមត្ថកិច្ចនគរបាលជំនាញ សហការជាមួយកងរាជអាវុធហត្ថបានហ៊ុមព័ទ្ធទីតាំងកើតហេតុ ដើម្បីស្រាវជ្រាវ កំណត់អត្តសញ្ញាណ និងប្រមូលភស្តុតាង។ មន្ត្រីពាក់ព័ន្ធបញ្ជាក់ថា ករណីនេះកំពុងស្ថិតនៅក្នុងដំណាក់កាលស៊ើបអង្កេត ហើយមិនអាចផ្តល់ព័ត៌មានលម្អិតបាននៅឡើយ។
សន្តិសុខម្នាក់ដែលបានរងរបួសក្នុងហេតុការណ៍ បានប្រាប់ថា នៅក្នុងផ្ទះដែលកើតហេតុមានជនជាតិថៃប្រុសស្រីចំនួន ៩ នាក់។ នៅពេលកើតហេតុ មានជនជាតិថៃ ២ នាក់បានរំខានវាយ និងចាក់ ដោយធ្វើឲ្យសន្តិសុខម្នាក់ស្លាប់ភ្លាមៗនៅក្នុងបន្ទប់នោះ។
ប្រជាពលរដ្ឋរស់នៅជិតទីតាំងកើតហេតុឲ្យដឹងថា ជនជាតិថៃដែលស្នាក់នៅទីនោះ តែងតែចេញជក់បារី និងជជែកគ្នានៅវេរ៉ង់ដាជាន់លើជាញឹកញាប់ ប៉ុន្តែមិនសូវដឹងពីអាជីព ឬសកម្មភាពរបស់ពួកគេឡើយ។ ម្យ៉ាងវិញទៀត ក៏ឃើញមានកម្លាំងសន្តិសុខខ្មែរយាមការពារយ៉ាងតឹងរ៉ឹងផងដែរ។
បន្ទាប់ពីកើតហេតុ សមត្ថកិច្ចបានឃាត់ខ្លួនជនជាតិថៃ ២ នាក់ដែលត្រូវសង្ស័យជាអ្នកប្រព្រឹត្តឧក្រិដ្ឋកម្ម ហើយបានព្យាយាមការពារ មិនឲ្យប្រជាពលរដ្ឋ និងសាច់ញាតិជនរងគ្រោះធ្វើអំពើហឹង្សាចំពោះជនសង្ស័យទាំងពីរនោះ។
រហូតមកទល់ពេលនេះ កម្លាំងជំនាញនគរបាល និងកងរាជអាវុធហត្ថនៅក្រុងប៉ោយប៉ែត កំពុងបន្តស៊ើបអង្កេតលើអំពើរឃាតកម្មដ៏សាហាវនេះ ដើម្បីនាំមុខជនជាប់ចោទដាក់ទោសតាមច្បាប់។
