ឯកឧត្តម ហ៊ុន ម៉ានី បានបញ្ជាក់ថា រយៈពេល៤៧ ឆ្នាំគឺជាជោគជ័យនៃក្តីសង្ឃឹមដែលកើតចេញពីស្មារតី២ធ្នូនិងជ័យជម្នះ ៧កមរា ដែលបានបំភ្លឺផ្លូវកម្ពុជាឈានឆ្ពោះទៅរកការបិទបញ្ចប់ភ្លើងសង្គ្រាម បិទបញ្ចប់ការបែកបាក់ជាតិ នាំមកនូវការបង្រួបបង្រួមជាតិ ឯកភាពជាតិ និងការកសាង អភិវឌ្ឍប្រទេសឱ្យរីកចម្រើនមកដល់ពេលបច្ចុប្បន្ននេះ។
ថ្លែងក្នុងពិធីមីទ្ទិញអបអរសាទរ ខួបអនុស្សាវរីយ៍លើកទី៤៧ ទិវាកំណើតរណសិរ្សសាមគ្គីអភិវឌ្ឍន៍មាតុភូមិកម្ពុជា ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈនិងជាអនុប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជាបានបញ្ជាក់ថា ការរំលឹកខួបលើកទី៤៧ នៃការបង្កើត រណសិរ្សសាមគ្គីសង្គ្រោះជាតិកម្ពុជា មិនមែនជាការរំលឹកព្រឹត្តិការណ៍ធម្មតាទេ វាជាការបញ្ជាក់ម្តងទៀតនូវ សេចក្តីក្លាហាន ការរូបរួមសាមគ្គីគ្នា និងសេចក្តីស្រឡាញ់ជាតិ ដែលជាតិខ្មែរ បានធ្វើជាបន្តបន្ទាប់តាំងពីថ្ងៃនោះមក។ ជាមួយគ្នានេះការធ្វើពលិកម្មរបស់យុទ្ធជនជារៀមច្បង ដែលបានធ្វើពលិកម្មជីវិតក្នុងភាពក្លាហាន ដើម្បីរំដោះជាតិមាតុភូមិ ពិតជាក្លាយជាមេរៀនមួយ សម្រាប់ប្រជាជាតិខ្មែរដែលតែងចងចាំនិងយកធ្វើជាគំរូមិនអាចបំភ្លេចបានឡើយ។
ឯកឧត្តមឧបនាយករដ្ឋមន្រ្តីបានបញ្ជាក់ថា ក្នុងរយៈពេល៤៧ ឆ្នាំកន្លងមកនេះបានធ្វើឱ្យកម្ពុជាប្រែមុខមាត់ជាថ្មីម្តងទៀតក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងបន្តវេនសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបាននាំមកនូវសន្តិភាព ព្រោះសន្តិភាពទើបផ្តល់ឱកាសគ្រប់បែបយ៉ាង ដល់ប្រជាពលរដ្ឋក្នុងការកសាងសង្គមគ្រួសារ សហគមន៍ និងប្រទេសជាតិ ឱ្យរីកចម្រើនឆាប់រហ័សដល់សព្វថ្ងៃនេះ ។
«ការដាក់ចេញនូវមាគ៌ានយោបាយ យុទ្ធសាស្ត្រនិងនីតិវិធីដឹកនាំបានត្រឹមត្រូវ គឺជាកត្តាចម្បង ក្នុងការសម្រេចបាននូវជ័យជម្នះនានា រយៈពេល៤៧ឆ្នាំ អង្គការចាត់តាំងយើង បានដឹកនាំប្រទេស ប្រកបដោយជោគជ័យ តាមមាគ៌ាមួយដ៏ត្រឹមត្រូវ ដោយឈរលើមូលដ្ឋានឯករាជ្យ និងមានលក្ខណៈប្រាកដនិយម ឆ្លើយតបទៅនឹងបំណងប្រាថ្នារបស់ប្រជាជន និងស្របទៅនឹងការវិវត្ត នៃសភាពការណ៍ជាតិ និងអន្តរជាតិ»។
ឯកឧត្តមឧបនាយករដ្ឋមន្រ្តីបានបន្ថែមថា កម្ពុជាកំពុងបន្តដំណើរទៅមុខក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានដាក់ចេញយុទ្ធសាស្ត្របញ្ចកោណ ដើម្បីនាំប្រទេសឆ្ពោះទៅកាន់ប្រទេសមានចំណូលខ្ពស់ក្នុងឆ្នាំ២០៥០។
សូមបញ្ជាក់ថា រណសិរ្សសាមគ្គី អភិវឌ្ឍន៍មាតុភូមិកម្ពុជា មាន ឈ្មោះដើមថា រណសិរ្សសាមគ្គីសង្គ្រោះជាតិកម្ពុជា ត្រូវបានបង្កើតឡើងនៅថ្ងៃ២ធ្នូ ឆ្នាំ១៩៧៨ នៅក្នុងតំបន់រំដោះនាភូមិជើងឃ្លូ ឃុំ២ធ្នូ ស្រុកស្នួល ខេត្ដក្រចេះ ជាអង្គការចាត់តាំងមហាជនមួយឈានមុខរបស់គណបក្សប្រជាជនកម្ពុជា រួបរួមគ្នាជាកម្លាំងមហាសាមគ្គីជាតិ ដោយបានទទួលការជួយឧបត្ថម្ភនិងគាំទ្រ
យ៉ាងធំធេងពីមិត្ដភក្ដិជិតឆ្ងាយលើសកលលោក ដើម្បីផ្ដួលរំលំរបបកម្ពុជាប្រជាធិបតេយ្យ រហូតដល់ទទួលបានជ័យជម្នះដ៏ត្រចះត្រចង់នាថ្ងៃ៧មករា ឆ្នាំ១៩៧៩ ៕
