ក្នុងរយៈពេល០៣ថ្ងៃ កម្លាំងការិយាល័យជំនាញនៃស្នងការខេត្ត បានសហការជាមួយកម្លាំងជំនាញតាមបណ្ដាស្រុកនានា និងជាមួយខេត្តដទៃផង ធ្វើការស្រាវជ្រាវតាមចាប់ខ្លួនក្រុមចោរលួចម៉ូតូ និងចាប់ខ្លួនអ្នកទទូលផលចោរកម្មជាបន្តបន្តាប់បានចំនួន០៩នាក់ ថែមទាំងរឹបអូសយកបានម៉ូតូចំនួន១៥គ្រឿង ដែលពួកក្រុមចោរបានលួចជាង១០លើក ។
ស្នងការរងទទួលផែនព្រហ្មទណ្ឌ លោក ឈឿង គឹមសុង បានឲ្យដឹងថា ក្រុមជនសង្ស័យដែលមានអ្នកប្រព្រឹត្តផ្ទាល់ និងអ្នកទទូលផលចោរកម្មទាំង០៩នាក់នេះ ត្រូវបានលោកស្នងការបញ្ជាឲ្យកសាងសំណុំរឿងបញ្ជូនទៅកាន់សាលាដំបូងខេត្តហើយ កាលពីរសៀលថ្ងៃទី០៣ តុលា ក្រោយបញ្ចប់ការសួរនាំ ។ លោកស្នងការរងបានប្រាប់ថា ក្នុងចំណោមក្រុមជនសង្ស័យទាំង០៩នាក់ មាន០៣នាក់ជាអ្នកទទូលទិញផលចោរកម្ម។
លោកបញ្ជាក់ថា ក្រុមនេះ ត្រូវបានកម្លាំងការិយាល័យជំនាញនៃស្នងការខេត្ត ធ្វើការស្រាវជ្រាវតាមឃាត់ខ្លួនបានជាបន្តបន្ទាប់ចាប់តាំងពីថ្ងៃទី៣០ កញ្ញា រហូតដល់ថ្ងៃទី០២ តុលា ដោយមានកិច្ចសហការពីកម្លាំងជំនាញអធិការស្រុកភ្នំព្រឹក ស្រុកសង្កែ ខណៈអ្នកទទូលផលចោរកម្មម្នាក់ ត្រូវតាមចាប់ដល់ទឹកដី ខេត្តកំពង់ស្ពឺ។
យោងលើរបាយការណ៍ការិយាល័យជំនាញបានឲ្យដឹងថា ក្រុមចោរហារយទាំង០៩នាក់រួមមាន៖ ១-ឈ្មោះ ហឿន រក្សា ភេទប្រុស អាយុ១៧ឆ្នាំ ២-ឈ្មោះ អៀង មុន្នី ភេទប្រុស អាយុ១៥ឆ្នាំ ៣-ឈ្មោះ ចិត្ត ណាវី ភេទប្រុស អាយុ១៨ឆ្នាំ ៤-ឈ្មោះ ណែត ម៉េងងួរ ភេទប្រុស អាយុ១៩ឆ្នាំ ៥-ឈ្មោះ ខាន ប៊ុនរៈ ភេទប្រុស អាយុ១៩ឆ្នាំ ៦-ឈ្មោះ ថា ដាវិត ភេទប្រុស អាយុ១៥ឆ្នាំ ៧-ឈ្មោះ ហឿម ចាន់ថា ភេទប្រុស អាយុ៤៦ឆ្នាំ (អ្នកទទូលទិញផលចោរកម្ម) មួយសំបុកនេះ រស់នៅភូមិបួរ ឃុំបួរ ស្រុកភ្នំព្រឹក។
ដោយឡែក ជនសង្ស័យ០២នាក់ទៀតជាអ្នកទទូលទិញផលចោរកម្មពីក្រុមចោរហារយដែរ មាន ម្នាក់ឈ្មោះ កាន គីម ភេទប្រុស អាយុ៤៤ឆ្នាំ រស់នៅភូមិពេជ្រចិន្តា ឃុំពេជ្រចិន្តា ស្រុកភ្នំព្រឹក និង ម្នាក់ទៀតឈ្មោះ ឡុង សុជា ភេទប្រុស អាយុ៣៣ឆ្នាំ រស់នៅភូមិស្វាយទាប ឃុំអង្គរពពេល ស្រុកគងពិសី ខេត្តកំពង់ស្ពឺ ។ ជាមួយនឹងការឃាត់ខ្លួនជនដៃដល់ និងអ្នកទទួលផលទាំងសំបុកខាងលើនេះ កម្លាំងជំនាញដកហូតបានវត្ថុតាងរួមមាន៖ «ម៉ូតូចំនួន១៥គ្រឿង និងស្លាកលេខម៉ូតូចំនួន២១សន្លឹក។ ជុំវិញអំពើចោរកម្មបែបអាជីពរបស់ក្រុមចោរហារយខាងលើនេះ នៅចំពោះមុខសមត្ថកិច្ច ក្រុមនេះ បានផ្ដល់ចម្លើយសារភាពទទួលស្គាល់កំហុសប្រហាក់ប្រហែលគ្នាថា ពួកគេពីតជាបានធ្វើសកម្មភាព«លួចយកម៉ូតូ»ខាងលើនេះមែន។
ដោយឡែក ជនទទួលទិញផលចោរកម្ម ក៏បានទទូលស្គាល់ថា ពួកខ្លួនក៏បានទទូលទិញម៉ូតូពីក្រុមចោរនេះដែរ។ នៅក្នុងរបាយការណ៍ដដែល ក្រុមជនដៃដល់បានសារភាពទៀតថា បើតាមពួកគេនៅចងចាំខ្លះៗ និងរាប់ត្រូសៗ មានចំនួន១១លើក ដែលពួកខ្លួនបានធ្វើសកម្មភាព«លួចម៉ូតូ»។ ក្នុងនោះ មានចំនួន០៦លើកប្រព្រឹត្តនៅខេត្តបាត់ដំបងចំនួន០៤លើកប្រព្រឹត្តនៅខេត្តបន្ទាយមានជ័យ និង ចំនួន០១លើក ប្រព្រឹត្តនៅទឹកដីខេត្តកំពង់ឆ្នាំង។
យ៉ាងណាក្ដី នេះចាត់ទុកថា ជាកិច្ចប្រតិបត្តិការបំបែកសំបុកក្រុមចោរហារយដ៏ធំមួយ ប្រចាំស្រុកភ្នំព្រឹក រួមទាំងអ្នកទទូលផលចោរកម្មផងដែរ ឈានដល់ការកាត់បន្ថយបានមួយចំនួន នូវសមាសភាពក្រុមចោរ ដែលតែងដើរប្រព្រឹត្តអំពើ«ចោរកម្ម» គ្រប់ទិសទី បង្កអសន្តិសុខដល់ការរស់នៅរបស់ប្រជាពលរដ្ឋក្នុងមូលដ្ឋាន រំខានដល់សមត្ថកិច្ចស្ទើរវិលក្បុង។ ពេលនេះទាំងចោរ ទាំងអ្នកទទូលផលចោរកម្ម ត្រូវបានកម្លាំងជំនាញ បញ្ជូនទៅប្រគល់ជូនតុលាការ ចាត់ការតាមនីតិវិធីហើយ៕
