លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាព្រឹកថ្ងៃទី១ ខែសីហា ឆ្នាំ២០២៥ បានមានប្រសាសន៍ថា ក្នុងរយៈពេល៥ថ្ងៃនៃការឈ្លានពានរបស់ថៃ បានធ្វើឱ្យអគារសិក្សាមួយចំនួនខូតខាត និងសាលារៀនចំនួន ៦០០បិទទ្វារ ប្រជាពលរដ្ឋប្រមាណជា ១៥ម៉ឺននាក់ទទួលរងផលប៉ះពាល់ ក្នុងនោះមានគ្រូបង្រៀនប្រមាណ ៦៥០០នាក់ត្រូវជម្លៀសខ្លួន។
លោកបណ្ឌិតសភាចារ្យ ឧបនាយករដ្ឋមន្ត្រី ថ្លែងដូចនេះក្នុងឱកាសបានដឹកនាំប្រតិភូក្រសួងអប់រំ យុវជន និង កីឡា ជួបសំណេះសំណាល សួរសុខទុក្ខ បុគ្គលិកអប់រំ និងសិស្សានុសិស្ស នៅវិទ្យាល័យភ្នំដែក ខេត្តព្រះវិហារ។ លោកបន្តថា ដូច្នេះថ្ងៃនេះ ក្រសួងបាននាំយកនូវសម្ភារៈសិក្សាជាច្រើន និងគ្រឿងឧបភោគ បរិភោគមួយចំនួន ដែលទទួលបានពីសប្បុរសជន និងជាការឧបតម្ភផ្ទាល់ពីក្រសួង ជូនដល់មន្ទីរអប់រំ ដើម្បីបែងចែកបន្តទៅដល់លោកគ្រូ អ្នកគ្រូ និងសិស្សានុសិស្ស នៃសាលាប្រមាណ ២០ ដែលរងប៉ះពាល់ដោយសង្គ្រាមឈ្លានពានរបស់ថៃ។
ក្នុងឱកាសនេះ ក្រសួងបាននាំយកនូវសៀវភៅសិក្សាគោលជូនដល់មន្ទីរ ដើម្បីចែកចាយបន្តដល់លោកគ្រូ អ្នកគ្រូ និងសិស្សានុសិស្ស បើទោះសាលាបិទទ្វារក្តី សិស្សដែលស្នាក់នៅជាមួយឪពុកម្តាយនៅទីតាំងសុវត្ថិភាព អាចបន្តធ្វើស្វ័យសិក្សា ខណៈកំពុងរង់ចាំការដោះស្រាយសម្របសម្រួលនានាពីសំណាក់រាជរដ្ឋាភិបាល ដើម្បីធានាបាននូវសុខសុវត្ថិភាពត្រឡប់ទៅលំនៅដ្ឋានវិញ។ បច្ចុប្បន្នក្រសួងក៏បាននិងកំពុងយកចិត្តទុកដាក់យ៉ាងខ្លាំងជំរុញការជួសជុលសាងសង់អគារសិក្សា និងសាលារៀនដែលរងការខូតខាតពីសង្គ្រាមឱ្យបានឆាប់រហ័ស ដើម្បីត្រៀមសម្រាប់ការបើកវេសនកាលនៅដើមខែវិច្ឆកាខាងមុខនេះ និងបន្តផ្តល់ជូនសៀវភៅសិក្សាគោលបន្ថែមទៀត ក៏ដូចជាបន្តកៀរគរស្វែងរកការឧបត្ថម្ភជាសម្ភារៈសិក្សា និងសម្ភារៈប្រើប្រាស់ចាំបាច់ផ្សេងៗ។
ពាក់ព័ន្ធនឹងការប្រឡងសញ្ញាបត្រមធ្យមសិក្សាទុតិយភូមិ ក្រសួងសម្រេចថានឹងរៀបចំនៅទីរួមខេត្តព្រះវិហារតាមការគ្រោងទុក ដូច្នេះសូមមន្ទីរយកចិត្តទុកដាក់ត្រៀមរៀបចំកន្លែងស្នាក់នៅ និងកន្លែងប្រឡង ហើយចំពោះសិស្សដែលកំពុងភៀសខ្លួនទៅខេត្តផ្សេង ក្រសួងអនុញ្ញាតិឱ្យប្រឡងនៅទីតាំងនោះតែម្តង។ ដើម្បីជាការទទួលស្គាល់ និងថ្លែងអំណរគុណយ៉ាងជ្រាលជ្រៅដល់បុគ្គលិកអប់រំទាំងអស់ក្នុងខេត្តព្រះវិហារ ក្រសួងបានស្នើសុំពីសម្តេចមហាបវរធិបតី នាយករដ្ឋមន្ត្រី នូវមេដាយ មុនីសារាភ័ណ្ឌ ថ្នាក់ធិបឌិន្ទ ប្រគល់ជូនប្រធានមន្ទីរអប់រំ យុវជន និងកីឡា ខេត្តព្រះវិហារ តំណាងឱ្យលោកគ្រូអ្នកគ្រូ និងមន្ត្រីអប់រំខេត្តព្រះវិហារគ្រប់លំដាប់ថ្នាក់ ដែលបានយកអស់កម្លាំងកាយចិត្តបំពេញភារកិច្ចប្រកបដោយមនសិការទទួលខុសត្រូវខ្ពស់ក្នុងបុព្វហេតុអភិវឌ្ឍធនធានមនុស្សនៅកម្ពុជា។
ជាថ្មីម្តងទៀត តាងនាមក្រសួងអប់រំ យុវជន និងកីឡា លោកបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់ ដៃគូអភិវឌ្ឍ សប្បុរសជន និងភាគីពាក់ព័ន្ធទាំងអស់ ដែលបានចូលរួមចំណែកជាមួយក្រសួងអប់រំ យុវជន និងកីឡា គាំទ្រដល់ជនរងគ្រោះភៀសសឹក ជាពិសេសសិស្សានុសិស្ស និងបុគ្គលិកអប់រំទាំងអស់នៅតាមព្រំដែន ដោយគូសបញ្ជាក់ពីការបន្តយកចិត្តទុកដាក់ជួយគាំទ្រឧបត្តម្ភដល់បងប្អូនប្រជាពលរដ្ឋគ្រប់រូបភាព។
ទន្ទឹមនឹងនេះ ក្រសួងបានស្នើឱ្យចាប់ផ្តើមបើកដំណើរការសាលារៀនឡើងវិញ ប្រសិនបើលក្ខខណ្ឌអំណោយផលគ្រប់គ្រាន់ តែក៏មិនមានការបង្ខិតបង្ខំឱ្យត្រូវបញ្ជូនកូនមកសាលារៀននោះទេ នេះគឺជាការសម្រេចចិត្តរបស់គ្រួសារ ឪពុកម្តាយ អ្នកអាណាព្យាបាលដោយផ្ទាល់ ហើយក្រសួងក៏នៅតែបន្តគាំទ្រជំរុញសិស្សឱ្យបន្តខិតខំប្រឹងប្រែងរៀនសូត្រ និងស្វ័យសិក្សាឱ្យអស់ពីលទ្ធភាព ជាពិសេសសិស្សដែលកំពុងត្រៀមប្រឡងសញ្ញាបត្រមធ្យមសិក្សាទុតិយភូមិដើម្បីទទួលបាននិទ្ទេសល្អបំផុតដែលខ្លួនប្រាថ្នាចង់បាន ឈោងចាប់អនាគតដ៏ភ្លឺស្វាង និងចូលរួមចំណែកកសាងសេដ្ឋកិច្ចសង្គមជាតិកម្ពុជាឱ្យរឹងមាំនិងរីកចម្រើន៕
