ខេត្តប៉ៃលិន៖ ព្រឹកថ្ងៃអង្គារ ទី៨ ខែមេសា ឆ្នាំ២០២៥ ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ បានអញ្ជើញជាអធិបតីក្នុងពិធីប្រកាសចូលកាន់មុខតំណែងប្រធានពន្ធនាគារខេត្តប៉ៃលិន ដោយមានការអញ្ជើញចូលរួម ឯកឧត្តម សោ សុវណ្ណ អភិបាលរង តំណាងលោកជំទាវ បាន ស្រីមុំ អភិបាល នៃគណៈអភិបាលខេត្តប៉ៃលិន អគ្គនាយករង ប្រធាននាយកដ្ឋាន ប្រធាន និងតំណាងអង្គភាពពាក់ព័ន្ធ និងមន្ត្រីជុំវិញខេត្តជាច្រើនរូប។
ថ្លែងក្នុងពិធីនេះ ឯកឧត្តម អគ្គនាយក បានធ្វើការផ្តាំផ្ញើរដល់មន្រ្តីក្រោមឱវាទទាំងអស់ឱ្យបន្តយកចិត្តទុកដាក់ខ្ពស់ចំពោះការងាររបស់ខ្លួនម្នាក់ៗ និងបានដាក់ចេញជាគន្លឹះក្នុងការដឹកនាំដូចខាងក្រោម ៖
-បំពេញការងារ ត្រូវគោរពតាមឋានានុក្រម មុខងារ តួនាទី ភារៈកិច្ច ដែលថ្នាក់លើ និងអង្គភាពប្រគល់ជូន
-ត្រូវប្រកាន់ខ្ជាប់នូវគោលការណ៍វិជ្ជាជីវៈ គុណភាព ប្រសិទ្ធផល ភាពស្មោះត្រង់ ក្រមសីលធម៌ និងបទវិន័យមន្ត្រីពន្ធនាគារ
-ពង្រឹងការគោរពអនុវត្តច្បាប់ និតិវិធី បទបញ្ជាផ្ទៃក្នុងពន្ធនាគារ និងលិខិតបទដ្ឋាន ពាក់ព័ន្ធនានាដែលជាត្រីវិស័យក្នុងការងារដឹកនាំគ្រប់គ្រង និងផ្នែកជំនាញនីមួយៗ
-ត្រូវបន្តកិច្ចសហការល្អ និងស្នើសុំកិច្ចគាំទ្រពីថ្នាក់ដឹកនាំរដ្ឋបាលខេត្ត ពីកងកម្លាំងប្រដាប់អាវុធទាំងបី ក្នុងកិច្ចអន្តរាគមន៍ផ្នែកសន្តិសុខសុវត្ថិភាព កិច្ចគាំទ្រពីមន្ទីរ អង្គភាពពាក់ព័ន្ធជុំវិញ ខេត្ត និងអង្គការដៃគូនានា ដើម្បីជួយដល់ការងារពន្ធនាគារ
-ការទទួលខុសត្រូវចំពោះមុខថ្នាក់ដឹកនាំមុនគេក្នុងដែនសមត្ថកិច្ចរបស់ខ្លួន គឺប្រធាន អង្គភាព និងមន្ត្រីអនុវត្តផ្ទាល់ ដូច្នេះឯកឧត្តមបានយកឱកាសនេះ ក្រើនរំលឹកបន្ថែម សូមឱ្យមានការយកចិត្ត ទុកដាក់ខ្ពស់ ទាំងចំណុចវិជ្ជមានដែលត្រូវពង្រឹងបន្ថែម និងចំណុចអវិជ្ជមានដែលត្រូវធ្វើការកែលម្អ ដោយយកការងារកន្លងមកជាបទពិសោធន៍
-បន្តគាំទ្រជាមួយនឹងស្មារតីម្ចាស់ការទទួលខុសត្រូវ និងរក្សាឱ្យបានសាមគ្គីភាពផ្ទៃក្នុងល្អដើម្បីបន្តការងារ ដឹកនាំគ្រប់គ្រង និងធានានិរន្តរភាពការងារឱ្យបានល្អប្រសើរ។
សូមបញ្ជក់ផងដែរថា ៖ លោកឧត្តមអគ្គានុរក្សថ្នាក់លេខ៣ កូវ កឿត ត្រូវបានចូលកាន់មុខតំណែងជាប្រធានពន្ធនាគារថ្មី នៃខេត្តប៉ៃលិន ជំនួសលោកឧត្តមអគ្គានុរក្សថ្នាក់លេខ២ រត្ន័ ទី ដែលត្រូវចូលនិវត្តន៍បន្ទាប់ពីរូបលោកបានបម្រើការងារក្នុងបុព្វហេតុវិស័យពន្ធនាគារអស់រយៈពេលយូរកន្លងមក។
