តាមរបាយការណ៍ដែលបានផ្សព្វផ្សាយ ផលប៉ះពាល់ និងខូចខាតដោយសារគ្រោះទឹកជំនន់របស់គណៈកម្មាធិការគ្រប់គ្រងគ្រោះមហន្តរាយខេត្តបន្ទាយមានជ័យ គិតត្រឹមម៉ោង ៤៖០០នាទីរសៀល ថ្ងៃទី១ ខែតុលា ឆ្នាំ២០២៦ មានប្រជាពលរដ្ឋសរុប ៣,២៤២គ្រួសារ ត្រូវបានជម្លៀសទៅកាន់ទីទួលសុវត្ថិភាព។
តាមបណ្តាក្រុង-ស្រុកដែលរងផលប៉ះពាល់ មានដូចជា៖
១. ក្រុងប៉ោយប៉ែត៖ ជម្លៀសប្រជាពលរដ្ឋទៅកាន់ទីទួលសុវត្ថិភាពចំនួន ១,៥៦៤គ្រួសារ។
២. ក្រុងសិរីសោភ័ណ៖ ជម្លៀសប្រជាពលរដ្ឋចំនួន ៧៧១គ្រួសារ។ ប៉ះពាល់ដំណាំស្រូវ ២,៧៥៣ហិកតា ដំណាំរួមផ្សំ ៥ហិកតា ខូចខាតដំណាំស្រូវ ១២៤ហិកតា និងប៉ះពាល់ផ្លូវ ១៤៩កន្លែង ស្មើនឹង ៥៩,៧៦៦ម៉ែត្រ។
៣. ស្រុកអូរជ្រៅ៖ ជម្លៀសប្រជាពលរដ្ឋចំនួន ៣៣គ្រួសារ។ ប៉ះពាល់ដំណាំស្រូវ ៩,០៨៥ហិកតា ខូចខាតដំណាំស្រូវ ១០៦ហិកតា និងប៉ះពាល់ផ្លូវ ៦២កន្លែង ស្មើនឹង ៤៥,៧៦៦ម៉ែត្រ។
៤. ស្រុកមង្គលបូរី៖ ជម្លៀសប្រជាពលរដ្ឋចំនួន ៨៥៦គ្រួសារ។ ប៉ះពាល់ដំណាំស្រូវ ៧,៨៨៤ហិកតា និងប៉ះពាល់ផ្លូវ ៩២កន្លែង ស្មើនឹង ៦៣,៩៧៨ម៉ែត្រ។
៥. ស្រុកភ្នំស្រុក៖ ជម្លៀសប្រជាពលរដ្ឋចំនួន ១៨គ្រួសារ។ ប៉ះពាល់ដំណាំស្រូវ ៤,៨១៦ហិកតា ដំឡូងមី ១៣៧ហិកតា ដំណាំរួមផ្សំ ៥ហិកតា និងប៉ះពាល់ផ្លូវ ១៧៨កន្លែង ស្មើនឹង ១៣៤,៣៥៦ម៉ែត្រ។
៦. ស្រុកម៉ាឡៃ៖ ខូចខាតដំណាំស្រូវចំនួន ២០៤ហិកតា និងប៉ះពាល់ផ្លូវ ១កន្លែង ស្មើនឹង ២៦.៩២ម៉ែត្រ។
៧. ស្រុកព្រះនេត្រព្រះ៖ ប៉ះពាល់ដំណាំស្រូវ ២,៤៨១ហិកតា និងប៉ះពាល់ផ្លូវ ២៨កន្លែង ស្មើនឹង ៤,៦០០ម៉ែត្រ។
៨. ស្រុកថ្មពួក៖ ប៉ះពាល់ដំណាំស្រូវ ២៨ហិកតា។
៩. ស្រុកស្វាយចេក៖ មិនមានផលប៉ះពាល់។
ជារួម គ្រោះទឹកជំនន់បានបណ្តាលឱ្យប្រជាពលរដ្ឋសរុប ៣,២៤២គ្រួសារ ត្រូវបានជម្លៀសទៅកាន់ទីទួលសុវត្ថិភាព។ របាយការណ៍ក៏បានបញ្ជាក់ថា មានការប៉ះពាល់ដំណាំស្រូវសរុប ២,៧០៩ហិកតា ដំឡូងមី ១៥៦ហិកតា ដំណាំរួមផ្សំ ១០ហិកតា ខូចខាតដំណាំស្រូវសរុប ៤៣៤ហិកតា និងប៉ះពាល់ផ្លូវ ៥០២កន្លែង ស្មើនឹង ២៩៤,២៥០ម៉ែត្រ។
ជាមួយគ្នានេះ មន្ទីរសាធារណការ និងដឹកជញ្ជូនខេត្តបន្ទាយមានជ័យ ក៏បានចេញសេចក្តីជូនដំណឹងនៅថ្ងៃទី១ ខែតុលា ឆ្នាំ២០២៦ ស្តីពីការផ្អាកជាបណ្តោះអាសន្នចំពោះយានយន្តធុនធំគ្រប់ប្រភេទ ដែលធ្វើដំណើរឆ្លងកាត់កំណាត់ ផ្លូវជាតិលេខ៥ ចាប់ពី គ.ម. ៣៤០+០០០ ដល់ គ.ម. ៣៦១+៨៥០ (អូរស្ងួត–ផ្លូវវាងក្រុងទឹកថ្លា) ក្នុងភូមិសាស្ត្រខេត្តបន្ទាយមានជ័យ៕
