នៅរសៀលថ្ងៃទី២៨ ខែកញ្ញា ឆ្នាំ២០២៦ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញចុះពិនិត្យស្ថានភាពទឹកជំនន់នៅតំបន់ភាគពាយ័ព្យប្រទេស ដោយផ្តោតលើការតាមដានស្ថានភាពជាក់ស្តែង សួរសុខទុក្ខប្រជាពលរដ្ឋដែលរងផលប៉ះពាល់ និងត្រៀមវិធានការស្តារឡើងវិញ បន្ទាប់ពីទឹកស្រក។
សម្តេចមហាបវរធិបតី បានគូសបញ្ជាក់ថា ការសង្គ្រោះជីវិតប្រជាពលរដ្ឋ គឺជាអាទិភាពចម្បងរបស់រាជរដ្ឋាភិបាល ហើយបានថ្លែងអំណរគុណដល់អាជ្ញាធរខេត្ត ស្រុក-ក្រុង កងកម្លាំងប្រដាប់អាវុធ កម្លាំងស្ម័គ្រចិត្ត និងក្រុមការងារពាក់ព័ន្ធ ដែលបានចូលរួមសង្គ្រោះ និងជម្លៀសប្រជាពលរដ្ឋទៅកាន់ទីទួលសុវត្ថិភាពបានទាន់ពេលវេលា។
សម្តេចនាយករដ្ឋមន្ត្រី ក៏បានថ្លែងអំណរគុណដល់ក្រុមការងារថ្នាក់ជាតិចុះជួយតាមបណ្តាខេត្ត គណៈកម្មការជាតិគ្រប់គ្រងគ្រោះមហន្តរាយ និងក្រសួង-ស្ថាប័នពាក់ព័ន្ធទាំងអស់ ដែលបានផ្តល់ការគាំទ្រដល់ប្រតិបត្តិការសង្គ្រោះប្រជាពលរដ្ឋ ក្នុងអំឡុងពេលជួបប្រទះគ្រោះទឹកជំនន់។
យោងតាមរបាយការណ៍រដ្ឋបាលខេត្តបន្ទាយមានជ័យ គិតត្រឹមថ្ងៃទី២៧ ខែកញ្ញា ឆ្នាំ២០២៦ ក្នុងចំណោមក្រុង-ស្រុកទាំង៩ មានចំនួន៦ បានរងផលប៉ះពាល់ដោយទឹកជំនន់ ដែលបង្កផលប៉ះពាល់ដល់ប្រជាពលរដ្ឋសរុបចំនួន ៣ពាន់ ២១៤គ្រួសារ ស្មើនឹង ១២ពាន់ ៤២៦នាក់។ ក្នុងនោះ ប្រជាពលរដ្ឋ ១ពាន់ ៤៨១គ្រួសារ ស្មើនឹង ៥ពាន់ ៤៨២នាក់ ត្រូវបានជម្លៀសទៅកាន់ទីទួលសុវត្ថិភាព។
ទឹកជំនន់ក៏បានប៉ះពាល់ដល់ផ្ទៃដីស្រូវ ១២ពាន់ ១៨ហិកតា ដំឡូងមី ១៧០ហិកតា និងដំណាំរួមផ្សំ ៣ហិកតា ខណៈស្រូវចំនួន ៣៤៣ហិកតា បានរងការខូចខាត។ សត្វពាហនៈ ៥២ក្បាលក៏រងផលប៉ះពាល់ផងដែរ។
ចំពោះហេដ្ឋារចនាសម្ព័ន្ធ ទឹកបានជន់លិចសាលារៀន ១៣កន្លែង វត្តអារាម ៨កន្លែង មណ្ឌលសុខភាព ៤កន្លែង និងផ្លូវចំនួន ២០១ខ្សែ ដែលមានប្រវែងសរុប ៨៧ពាន់ ៤៩៥ម៉ែត្រ។
អាជ្ញាធរពាក់ព័ន្ធកំពុងបន្តតាមដានស្ថានភាពទឹក និងត្រៀមវិធានការចាំបាច់ ដើម្បីធានាសុវត្ថិភាពប្រជាពលរដ្ឋ ព្រមទាំងត្រៀមស្តារឡើងវិញនូវហេដ្ឋារចនាសម្ព័ន្ធ និងវិស័យដែលរងផលប៉ះពាល់ បន្ទាប់ពីស្ថានភាពទឹកបានធូរស្រាល។
