ក្រសួងការបរទេសអាម៉េរិកបានប្រកាសឱ្យដឹងថា ទីក្រុងវ៉ាស៊ីនតោនបានអនុម័តការលក់យន្តហោះចម្បាំងបំបាំងកាយ F-35 ចំនួន ៤៨ គ្រឿង គិតជាទឹកប្រាក់ ២៤,៣ ពាន់លានដុល្លារ ទៅឱ្យអារ៉ាប៊ីសាអូឌីត។ ការលក់នេះជាការទិញអាវុធដ៏ធំចុងក្រោយបំផុតមួយរបស់ទីក្រុងរីយ៉ាដ ចាប់តាំងពីសង្គ្រាមអ៊ីរ៉ង់បានផ្ទុះឡើងកាលពីចុងខែកុម្ភៈមក។ នេះបើយោងតាមការចេញផ្សាយដោយសារព័ត៌មាន Reuters។
អារ៉ាប៊ីសាអូឌីតបានស្វះស្វែងព្យាយាមទិញយន្តហោះចម្បាំង F-35 ពីសហរដ្ឋអាម៉េរិកជាយូរណាស់មកហើយ។ ប៉ុន្តែ ក្រុមមន្ត្រីមកពីអ៊ីស្រាអែល ដែលបច្ចុប្បន្នជាប្រទេសតែមួយគត់ក្នុងតំបន់មជ្ឈិមបូព៌ា ដែលកំពុងធ្វើប្រតិបត្តិការយន្តហោះចម្បាំងដ៏ទំនើបមួយនេះ បានបង្ហាញការព្រួយបារម្ភអំពីការលក់ F-35 ទៅឱ្យទីក្រុងរីយ៉ាដ បើទោះបីជាអ៊ីស្រាអែលកំពុងជំរុញការភ្ជាប់ទំនាក់ទំនងជាប្រក្រតីជាមួយអារ៉ាប៊ីសាអូឌីតក៏ដោយ។
នៅក្នុងសេចក្តីថ្លែងការណ៍មួយ ក្រសួងការបរទេសអាម៉េរិកបានគូសបញ្ជាក់ថា៖ «ការលក់យន្តហោះចម្បាំង F-35 នឹងជួយធ្វើឱ្យប្រសើរឡើងនូវសមត្ថភាពរបស់អារ៉ាប៊ីសាអូឌីត ដើម្បីកំញើញទប់ស្កាត់ការគំរាមកំហែងក្នុងពេលបច្ចុប្បន្ន និងទៅថ្ងៃអនាគត តាមរយៈការពង្រឹងសមត្ថភាពការពារខ្លួនឯង ហើយក៏នឹងធ្វើឱ្យប្រសើរឡើងផងដែរនូវការធ្វើអន្តរប្រតិបត្តិការជាមួយកងកម្លាំងអាម៉េរិក»។
តាមសេចក្តីថ្លែងការណ៍ដដែល យន្តហោះចម្បាំង F-35 ក៏នឹងជួយពង្រឹងផងដែរនូវសមត្ថភាពរបស់អារ៉ាប៊ីសាអូឌីតក្នុងការធ្វើប្រតិបត្តិការយន្តហោះចម្បាំង ព្រមទាំងសមត្ថភាពវាយប្រហារនៅលើអាកាស និងពីអាកាសទៅលើដី។
គួរបញ្ជាក់ថា ក្រសួងការបរទេសអាម៉េរិកបានជូនដំណឹងទៅកាន់សភារួចហើយអំពីការអនុម័តការលក់យន្តហោះចម្បាំង F-35 ទៅឱ្យអារ៉ាប៊ីសាអូឌីត ដើម្បីស្នើសុំការអនុម័ត ប៉ុន្តែមិនបានបង្ហើបឱ្យដឹងទេថា តើការប្រគល់នឹងត្រូវធ្វើឡើងនៅពេលណានោះទេ៕
