ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានឆ្លើយតបទៅនឹងការបដិសេធរបស់ភាគីថៃ ដែលអះអាងថា ខ្លួនមិនបានប្រើប្រាស់បញ្ហាឆបោកតាមប្រព័ន្ធបច្ចេកវិទ្យា (Online Scams) ជាលេសសម្រាប់សកម្មភាពយោធា ឬការកាន់កាប់ទឹកដីកម្ពុជាដោយខុសច្បាប់ ដោយបញ្ជាក់ថា ការបដិសេធមិនអាចលុបបំបាត់អង្គហេតុដែលបានកើតឡើងនៅលើដីបានឡើយ។
ឯកឧត្តមបានបញ្ជាក់ថា ការពិតមិនត្រូវវាស់តាមពាក្យបដិសេធនោះទេ ប៉ុន្តែត្រូវវាស់តាមអ្វីដែលបាននិយាយ អ្វីដែលបានធ្វើ និងលទ្ធផលដែលបានកើតឡើង បន្ទាប់ពីការប្រើប្រាស់កម្លាំងយោធារបស់ថៃ។
សម្តេចតេជោ ហ៊ុន សែន បានលើកឡើងយ៉ាងច្បាស់ ក្នុងពិធីបើកសន្និសីទអន្តរជាតិប្រធានសភានៃអន្តរសភាលើកទី២ កាលពីថ្ងៃទី២៧ ខែសីហា ឆ្នាំ២០២៦ ថា ថៃបានប្រើប្រាស់បញ្ហា Online Scams ជាលេសសម្រាប់ការឈ្លានពាន និងកាន់កាប់ផ្នែកខ្លះនៃទឹកដីកម្ពុជា។ សម្តេចបានព្រមានថា ការយកបទល្មើសឆ្លងដែន ដូចជា Online Scams មកធ្វើជាលេសសម្រាប់ការកាន់កាប់ទឹកដីរបស់ប្រទេសដទៃដោយខុសច្បាប់ គឺជាទម្រង់មួយនៃ «សង្គ្រាមទំនើប»។
ក្នុងនោះ យោធាថៃត្រូវបានចោទថា បានវាយប្រហារដោយការទម្លាក់គ្រាប់បែកលើសំណង់ស៊ីវិល នៅតំបន់អូរស្មាច់ និងច្រកជាំ ក្នុងខេត្តឧត្តរមានជ័យ និងតំបន់ថ្មដា ក្នុងខេត្តពោធិ៍សាត់ ដោយអះអាងថា ជាតំបន់យោធា។ ប៉ុន្តែតាមការបញ្ជាក់របស់ភាគីកម្ពុជា ទីតាំងទាំងនោះជាសំណង់ស៊ីវិលរបស់ប្រជាពលរដ្ឋ និងអ្នកវិនិយោគទុន។
សម្តេចតេជោ ក៏បានរំលេចពីគ្រោះថ្នាក់នៃ «យុទ្ធសាស្ត្រឈ្លានពានបែបហាន់ចំណិតសាច់ក្រក» (Salami-Slicing Strategy) ដែលជាការផ្លាស់ប្តូរស្ថានភាពនៅលើដីបន្តិចម្តងៗ ដើម្បីបម្រើមហិច្ឆតាទឹកដី និងបង្កើតស្ថានភាពដែលកើតឡើងជាក់ស្តែង មុននឹងព្យាយាមបម្លែងស្ថានភាពដែលបង្កើតឡើងដោយកម្លាំង ទៅជាអំណះអំណាងនយោបាយនៅពេលក្រោយ។
ជាមួយគ្នានេះ សម្តេចធិបតី ហ៊ុន ម៉ាណែត ក៏បានបង្ហាញទៅកាន់សហគមន៍អន្តរជាតិ អំពីសកម្មភាពដែលកម្ពុជាចាត់ទុកថា ជាការកាន់កាប់យកទឹកដីដោយខុសច្បាប់ រួមមាន ការបន្តវត្តមានកងទ័ព ការរាយលួសបន្លា ការដាក់ទូកុងតឺន័រ ការជីកលេណដ្ឋាន ការសាងសង់ហេដ្ឋារចនាសម្ព័ន្ធ និងការបង្កើតស្ថានភាពថ្មីនៅលើដី មុនពេលការងារវាស់វែង និងខណ្ឌសីមាព្រំដែនត្រូវបានបញ្ចប់។
ដូច្នេះ ប្រសិនបើថៃអះអាងថា Online Scams និងជម្លោះប្រដាប់អាវុធ គឺជារឿងពីរដាច់ដោយឡែកពីគ្នា នោះមានសំណួរមួយដែលថៃត្រូវឆ្លើយ៖ ប្រសិនបើបញ្ហា Scam មិនមែនជាលេសទេ ហេតុអ្វីបានជាទីតាំងដែលថៃអះអាងថា ពាក់ព័ន្ធនឹង Scam ត្រូវបានភ្ជាប់ជាមួយប្រតិបត្តិការយោធារបស់ថៃ លើទឹកដីកម្ពុជា ក្នុងអំឡុងជម្លោះ? ហើយហេតុអ្វីបានជាក្រោយការប្រើប្រាស់កម្លាំង លទ្ធផលបែរជាបន្តទៅជាការគ្រប់គ្រងដី អគារ ការរាយលួសបន្លា ការដាក់ទូកុងតឺន័រ និងការបង្កើតស្ថានភាពថ្មីនៅលើដី?
ប្រសិនបើគោលដៅគឺការបង្ក្រាប Online Scams ហេតុអ្វីបានជាលទ្ធផលបែរជាក្លាយទៅជាបញ្ហាទឹកដី?
Online Scams គឺជាឧក្រិដ្ឋកម្មឆ្លងដែនដ៏ធ្ងន់ធ្ងរ ហើយកម្ពុជាមិនបានបដិសេធបញ្ហានេះឡើយ។ កម្ពុជាបានខិតខំបន្តបង្ក្រាបបទល្មើសនេះយ៉ាងម៉ឺងម៉ាត់បំផុត ហើយលទ្ធផល គឺទីតាំងប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាជាង ៧០០ទីតាំង ត្រូវបានបោសសម្អាត និងបន្តបង្ក្រាបបណ្តាញដែលនៅសេសសល់។
ឧក្រិដ្ឋកម្មត្រូវប្រយុទ្ធប្រឆាំងតាមរយៈការស៊ើបអង្កេត ការចាប់ខ្លួន ការបង្កកទ្រព្យសម្បត្តិ ការធ្វើបត្យាប័ន ការសង្គ្រោះជនរងគ្រោះ និងកិច្ចសហប្រតិបត្តិការអន្តរជាតិ។
Online Scams មិនមែនជាអភ័យឯកសិទ្ធិដែលអនុញ្ញាតឱ្យប្រើកម្លាំងយោធានោះទេ។ វាមិនអាចផ្តល់សិទ្ធិឱ្យរដ្ឋមួយឆ្លងកាត់ព្រំដែន ប្រើប្រាស់កម្លាំង ឬបង្កើតការគ្រប់គ្រងទឹកដីថ្មីលើរដ្ឋមួយទៀតបានឡើយ។
កាន់តែសំខាន់ ថៃមិនអាចបង្ហាញខ្លួនឯងថា ស្ថិតនៅក្រៅបញ្ហា Cyber Scams និងការជួញដូរមនុស្សក្នុងតំបន់ ហើយចង្អុលម្រាមដៃមកកម្ពុជាតែម្នាក់ឯងបានទេ។
ឯកសាររបស់អង្គការសហប្រជាជាតិបានបង្ហាញថា Cyber Scam Operations និងការជួញដូរមនុស្ស គឺជាបញ្ហាឆ្លងដែនដែលពាក់ព័ន្ធនឹងប្រទេសជាច្រើននៅអាស៊ីអាគ្នេយ៍។ ឯកសាររបស់អ្នកជំនាញអង្គការសហប្រជាជាតិក៏បានកត់ត្រាថា Cyber Scam Compounds ត្រូវបានរាយការណ៍នៅក្នុងប្រទេសជាច្រើនក្នុងតំបន់ ខណៈថៃក៏ត្រូវបានរាយការណ៍ថា កំពុងក្លាយជាមជ្ឈមណ្ឌលកាន់តែសំខាន់មួយ សម្រាប់ការជួញដូរមនុស្ស។
UNODC ក៏បានបង្ហាញពីតួនាទីរបស់ថៃនៅក្នុងប្រព័ន្ធអេកូឡូស៊ីនៃឧក្រិដ្ឋកម្មឆ្លងដែន រួមទាំងការផ្លាស់ទីមនុស្ស សម្ភារៈ និងមូលនិធិរបស់បណ្តាញឧក្រិដ្ឋកម្ម។
អង្គហេតុទាំងនេះ មិនមែនមានន័យថា ថៃជាអ្នកទទួលខុសត្រូវចំពោះបទល្មើស Scam ទាំងអស់នោះទេ។ ប៉ុន្តែវាបង្ហាញពីចំណុចសាមញ្ញមួយថា៖ Online Scams គឺជាបណ្តាញឧក្រិដ្ឋកម្មឆ្លងដែន មិនមែនជាបញ្ហារបស់កម្ពុជាតែម្នាក់ឯងឡើយ។
ដូច្នេះ មុននឹងយកបញ្ហា Scam មកធ្វើជាឧបករណ៍ចោទប្រកាន់ប្រទេសជិតខាង ថៃគួរបង្ក្រាប និងលាងសម្អាតបញ្ហា Scam និងការជួញដូរមនុស្សនៅក្នុងប្រព័ន្ធរបស់ខ្លួនឱ្យបានជ្រះជាមុនសិន។ ការចង្អុលម្រាមដៃទៅអ្នកដទៃ មិនអាចលាងបញ្ហានៅក្នុងផ្ទះខ្លួនឯងឱ្យបាត់បានឡើយ។
កម្ពុជាមិនការពារ Online Scams ទេ។ កម្ពុជាការពារអធិបតេយ្យភាព បូរណភាពទឹកដី និងគោលការណ៍ដែលថា ខ្សែព្រំដែនមិនអាចត្រូវបានកែប្រែដោយកម្លាំងបានឡើយ៕
