រយៈពេលជាង១ឆ្នាំ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានផ្ដល់ការគាំទ្រការងារអភិវឌ្ឍន៍ស៊ុសវែរថ្នាល ជូនអគ្គនាយកដ្ឋានក្រោមចំណុះក្រសួងមហាផ្ទៃ ប្រើប្រាស់ចំនួន១២ប្រព័ន្ធ និងកំពុងអភិវឌ្ឍន៍បន្ថែមចំនួន១០ ប្រព័ន្ធបន្ថែមទៀត។ នេះបើតាមប្រសាសន៍របស់ឯកឧត្តម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ នៃក្រសួងមហាផ្ទៃ។ ឯកឧត្តម អគ្គនាយក បានលើកឡើងថា ដើម្បីគាំទ្រការដ្ឋានការងារឌីជីថលដ៏ជឿនលឿននេះ អគ្គនាយកដ្ឋាន បានរៀបចំ និងសហការរៀបចំវគ្គបណ្ដុះបណ្ដាលជំនាញឌីជីថលដល់មន្រ្តីពាក់ព័ន្ធចំនួន១ ៧២០រូប ក្នុងវគ្គបណ្ដុះបណ្ដាលចំនួន២២វគ្គ។
ឈរលើមូលដ្ឋាននៃការបណ្ដុះបណ្ដាលធនធានមនុស្សក្នុងបរិបទបច្ចេកវិទ្យា ស្របតាមយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា ក្រោមការដឹកនាំដឹកនាំប្រកបដោយប្រតិភាណរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា នាព្រឹកថ្ងៃទី៤ ខែមេសានេះ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ដោយទទួលបានគោលការណ៍អនុញ្ញាតពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានរៀបចំសិក្ខាសាលាស្ដីពី «បរិវត្តកម្មប្រព័ន្ធបច្ចេកវិទ្យាឌីជីថលក្រសួងមហាផ្ទៃ» ក្នុងគោលបំណង ដើម្បីបញ្ជ្រាបចំណេះដឹងពាក់ព័ន្ធនឹងវិស័យឌីជីថល ដល់មន្រ្តីរាជការចំណុះក្រសួងមហាផ្ទៃ។
នៅក្នុងឱកាសនៃពិធីបើកសិក្ខាសាលានោះហើយដែល ឯកឧត្តម ឧត្តមសេនីយ៍ឯក ហោ សំអាត បានលម្អិតឱ្យដឹងអំពីការគាំទ្រលើការងារអភិវឌ្ឍន៍ស៊ុលវែរជូនអគ្គនាយកដ្ឋានក្រោមចំណុះ ទាំង១២ប្រព័ន្ធនោះ មានជាអាទិ៍រួមមាន៖ ប្រព័ន្ធផ្សព្វផ្សាយ ប្រព័ន្ធតាមដាន ប្រមូល វិភាគព័ត៌មាន និងឆ្លើយតប ប្រព័ន្ធព័ត៌មានទាន់ហេតុការណ៍ក្រសួងមហាផ្ទៃ ប្រព័ន្ធស្វែងរកជំនួយបន្ទាន់ ប្រព័ន្ធគ្រប់គ្រងលំហូរឯកសាររដ្ឋបាលអេឡិចត្រូនិក ការរៀបចំប្រព័ន្ធជំនួយការប្រជុំ និងបណ្ណាល័យសាធារណៈ ប្រព័ន្ធគ្រប់គ្រងគម្រោង និងផែនការសកម្មភាព ប្រព័ន្ធគ្រប់គ្រងគណនីតែមួយ គេហទំព័រផ្លូវការសាលាជាតិរដ្ឋបាលមូលដ្ឋាន គេហទំព័រ និងកម្មវិធីទូរសព្ទដៃក្រសួងមហាផ្ទៃ ប្រព័ន្ធគ្រប់គ្រងទិន្នន័យឧក្រិដ្ឋជន ប្រព័ន្ធគ្រប់គ្រងទិន្នន័យមន្ត្រីរាជការនៅរដ្ឋបាលថ្នាក់ជាតិ ថ្នាក់ក្រោមជាតិ និងក្រុមប្រឹក្សារដ្ឋបាលថ្នាក់ក្រោមជាតិរបស់អគ្គនាយកដ្ឋានរដ្ឋបាល។
ទន្ទឹមនោះដែរ ១០ប្រព័ន្ធទៀតដែលអគ្គនាយកដ្ឋានកំពុងអភិវឌ្ឍន៍នោះ បើតាម ឯកឧត្តម ហោ សំអាត ក្នុងនោះរួមមាន ប្រព័ន្ធគ្រប់គ្រងការផ្ទៀងផ្ទាត់ទិន្នន័យអតីតមន្រ្តីរាជការស៊ីវិល មន្រ្តីពន្ធនាគារ មន្រ្តីនគរបាលជាតិ និងកងយោធពលខេមរភូមិន្ទ ប្រព័ន្ធថ្នាលផ្លាស់ប្ដូរទិន្នន័យក្រសួងមហាផ្ទៃ គម្រោងតភ្ជាប់ពីប្រព័ន្ធច្រកចេញចូលតែមួយ ទៅកាន់ប្រព័ន្ធមន្ទីររៀបចំដែនដីនគរូបនីយកម្ម សំណង់ និងសុរិយោដី ប្រព័ន្ធគ្រប់គ្រងបណ្ណអាវុធ គម្រោងតភ្ជាប់ទិន្នន័យនៃការចុះបញ្ជីយានយន្ត ការផ្ទៀងផ្ទាត់ទិន្នន័យបណ្ណបើកបរយានយន្ត និងការផ្ទៀងផ្ទាត់អត្តសញ្ញាណបណ្ណប្រជាពលរដ្ឋ ប្រព័ន្ធគ្រប់គ្រងបណ្ណព្រំដែនកម្ពុជា-ថៃ ប្រព័ន្ធគ្រប់គ្រង និងផ្តល់សេវាតាមយន្តការច្រកចេញចូលតែមួយនៅរដ្ឋបាលថ្នាក់ក្រោមជាតិ ប្រព័ន្ធព័ត៌មានវិទ្យាសម្រាប់ចុះបញ្ជី និងគ្រប់គ្រងទិន្នន័យសមាគម ប្រព័ន្ធគ្រប់គ្រងតាមដានការរៀបចំរបាយការណ៍អនុវត្តការងាររដ្ឋបាលថ្នាក់ក្រោមជាតិ និងប្រព័ន្ធគ្រប់គ្រងទិន្នន័យផែនទីព្រំប្រទល់រដ្ឋបាលដែនដី។
សូមបញ្ជាក់ថា អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ត្រូវបានបង្កើតតាមរយៈអនុក្រឹត្យលេខ ២៧៩ អនក្រ បក ចុះថ្ងៃទី២៤ ខែសីហា ឆ្នាំ២០២៣ ចុះហត្ថលេខាដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជណាចក្រកម្ពុជា ស្តីពី «ការបង្កើតអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ចំណុះក្រសួងមហាផ្ទៃ»។ ក្នុងក្របខណ្ឌក្រសួងមហាផ្ទៃ និងក្រោមការដឹកនាំរបស់ឯកឧត្តមអភិសន្តិបណ្ឌិត ស សុខា អគ្គនាយកដ្ឋានថ្មីនេះ ដើរតួនាទីស្នូលជាសេនាធិការលើការងាររដ្ឋបាលឌីជីថល ស្របតាមមុំទី៥ នៃយុទ្ធសាស្រ្តបញ្ចកោណផងដែរ៕