ថ្ងៃទី២៤ ខែកក្កដា ឆ្នាំ២០២៦ គឺជាខួបគម្រប់ ១ ឆ្នាំ នៃការចាប់ផ្តើមជម្លោះប្រដាប់អាវុធ ដែលបានបន្សល់ទុកនូវស្លាកស្នាមនៃការឈឺចាប់ ការបាត់បង់ និងការសោកស្តាយយ៉ាងជ្រាលជ្រៅសម្រាប់ប្រជាជនកម្ពុជាទូទាំងប្រទេស។ ព្រឹត្តិការណ៍នេះបានបណ្តាលឱ្យមានការបាត់បង់អាយុជីវិត ការរងរបួស ការខូចខាតទ្រព្យសម្បត្តិ និងការបែកបាក់គ្រួសារជាច្រើន។
ជម្លោះបានចាប់ផ្តើមបន្ទាប់ពីមានសកម្មភាពប្រដាប់អាវុធពីសំណាក់យោធាថៃ និងការបង្កភាពតានតឹងជាបន្តបន្ទាប់នៅតាមតំបន់ព្រំដែន។ សកម្មភាពទាំងនោះ ត្រូវបានចាត់ទុកថា ជាការរំលោភលើអធិបតេយ្យភាព និងបូរណភាពទឹកដីរបស់ព្រះរាជាណាចក្រកម្ពុជា។
សំឡេងគ្រាប់កាំភ្លើងធំ និងការវាយប្រហារពីលើអាកាស បានបន្សល់ទុកនូវស្លាកស្នាមដ៏ជ្រាលជ្រៅនៅក្នុងចិត្តរបស់ប្រជាពលរដ្ឋ ដែលរស់នៅក្នុងតំបន់រងផលប៉ះពាល់។ សកម្មភាពប្រដាប់អាវុធទាំងនេះ មិនត្រឹមតែបង្កផលប៉ះពាល់ដល់កងកម្លាំងការពារជាតិប៉ុណ្ណោះទេ ប៉ុន្តែថែមទាំងបណ្តាលឱ្យជនស៊ីវិលជាច្រើននាក់បាត់បង់ជីវិត និងរងរបួស ព្រមទាំងបង្កការខូចខាតយ៉ាងធ្ងន់ធ្ងរដល់ហេដ្ឋារចនាសម្ព័ន្ធស៊ីវិល ទ្រព្យសម្បត្តិសាធារណៈ និងទ្រព្យសម្បត្តិឯកជន។
ជម្លោះនេះក៏បានបង្ខំឱ្យប្រជាពលរដ្ឋជាច្រើនភៀសខ្លួនចេញពីលំនៅឋាន ដោយសារការភ័យខ្លាចពីការបាញ់ផ្លោង និងការវាយប្រហារដោយអាវុធធុនធ្ងន់។ ទន្ទឹមនឹងនេះ កុមារ និងសិស្សានុសិស្សរាប់ម៉ឺននាក់បានបាត់បង់ឱកាសសិក្សា ខណៈសាលារៀន វត្តអារាម និងហេដ្ឋារចនាសម្ព័ន្ធសាធារណៈជាច្រើនបានទទួលរងការខូចខាត។
ទោះបីជាបានឆ្លងកាត់ការបាត់បង់ និងផលប៉ះពាល់យ៉ាងធ្ងន់ធ្ងរក៏ដោយ កម្ពុជានៅតែបន្តបង្ហាញការប្តេជ្ញាចិត្តក្នុងការដោះស្រាយរាល់ជម្លោះព្រំដែនជាមួយប្រទេសថៃ និងប្រទេសជិតខាងទាំងអស់ តាមរយៈមធ្យោបាយសន្តិវិធី ដោយគោរពតាមច្បាប់អន្តរជាតិ និងកិច្ចព្រមព្រៀងទ្វេភាគីជាធរមាន។
ជាមួយគ្នានេះ រាជរដ្ឋាភិបាលបន្តយកចិត្តទុកដាក់លើការការពារសុវត្ថិភាព និងសុខុមាលភាពរបស់ប្រជាពលរដ្ឋ ការផ្តល់ជំនួយដល់អ្នករងគ្រោះ និងការការពារអធិបតេយ្យភាព ឯករាជ្យ និងបូរណភាពទឹកដី ដោយឈរលើគោលការណ៍នៃការអត់ធ្មត់ ភាពម៉ឺងម៉ាត់ និងការទទួលខុសត្រូវខ្ពស់ ដើម្បីឧត្តមប្រយោជន៍របស់ជាតិ និងប្រជាជន៕
