លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អនុប្រធានក្រុមប្រឹក្សាភិបាលនៃសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) បានជំរុញឱ្យក្រុមគ្រូពេទ្យប្រើប្រាស់បច្ចេកវិទ្យាបញ្ញាសិប្បនិម្មិត (AI) ក្នុងការពិនិត្យ និងព្យាបាលអ្នកជំងឺ ទាំងផ្នែកទន្តសាស្ត្រ និងជំងឺទូទៅផ្សេងៗ។ ទន្ទឹមនឹងនេះ លោកជំទាវបានណែនាំថា ការប្រើប្រាស់បច្ចេកវិទ្យាត្រូវប្រកបដោយមនសិការ វិជ្ជាជីវៈ សីលធម៌ និងការយកចិត្តទុកដាក់ដោយក្តីមេត្តាករុណាចំពោះអ្នកជំងឺ ដើម្បីធានាឱ្យការព្យាបាលមានគុណភាព សុវត្ថិភាព ប្រសិទ្ធភាព និងមានការទទួលខុសត្រូវខ្ពស់។
ការណែនាំនេះ បានធ្វើឡើងក្នុងឱកាសដែលលោកជំទាវបណ្ឌិត អញ្ជើញជាអធិបតីបើកសន្និសីទទន្តសាស្ត្រប្រចាំឆ្នាំលើកទី២ ឆ្នាំ២០២៦ របស់សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ក្រោមប្រធានបទ «ការលើកកម្ពស់ការអនុវត្តបច្ចេកទេសទន្តសាស្ត្រឈានមុខ» នាថ្ងៃទី៤ ខែកក្កដា ឆ្នាំ២០២៦។
លោកជំទាវបណ្ឌិតបានសង្កត់ធ្ងន់ថា បច្ចេកវិទ្យាបញ្ញាសិប្បនិម្មិតអាចជួយឱ្យគ្រូពេទ្យធ្វើរោគវិនិច្ឆ័យបានលឿន និងមានភាពត្រឹមត្រូវជាងមុន ព្រមទាំងជួយរៀបចំផែនការព្យាបាលឱ្យកាន់តែមានប្រសិទ្ធភាព។ ទោះជាយ៉ាងណា បច្ចេកវិទ្យាមិនអាចជំនួសមនសិការ វិជ្ជាជីវៈ សីលធម៌ និងការយកចិត្តទុកដាក់ដោយក្តីមេត្តាករុណារបស់គ្រូពេទ្យចំពោះអ្នកជំងឺបានឡើយ។
ក្នុងឱកាសនោះ លោកជំទាវបណ្ឌិតក៏បានចែករំលែកគោលគំនិតសំខាន់ៗចំនួន៥ រួមមាន៖
១. ចាត់ទុកសន្និសីទនេះជាវេទិកាសម្រាប់ការសិក្សា និងផ្លាស់ប្តូរចំណេះដឹងយ៉ាងពិតប្រាកដ។
២. បន្តចែករំលែកចំណេះដឹង និងបទពិសោធន៍ទៅកាន់មិត្តរួមវិជ្ជាជីវៈ និងអ្នកជំនាន់ក្រោយ។
៣. អភិវឌ្ឍជំនាញឱ្យស្របតាមការវិវត្តនៃបច្ចេកវិទ្យា ដោយមិនបាត់បង់សុជីវធម៌ និងក្រមសីលធម៌វិជ្ជាជីវៈ។
៤. តម្កល់អ្នកជំងឺជាចំណុចកណ្តាលនៃវិជ្ជាជីវៈ ដោយគោរព ស្តាប់ ពន្យល់ឱ្យបានច្បាស់លាស់ និងទទួលខុសត្រូវខ្ពស់។
៥. បន្តថែរក្សាស្មារតីស្ម័គ្រចិត្ត និងឆន្ទៈមនុស្សធម៌របស់សមាគម TYDA។
ជាមួយគ្នានេះ លោកជំទាវបណ្ឌិតក៏បានរំលឹកពីគំនិតផ្តួចផ្តើមប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានលើកឡើងថា សមាគម TYDA បានរៀបចំសន្និសីទជាបន្តបន្ទាប់ ដើម្បីបង្កើតវេទិកាពិគ្រោះ ពិភាក្សា និងចែករំលែកបទពិសោធន៍រវាងអ្នកជំនាញ។ សកម្មភាពទាំងនេះ គឺជាថ្នាលដ៏សំខាន់សម្រាប់ការលើកកម្ពស់គុណភាពសេវាសុខាភិបាលជូនប្រជាពលរដ្ឋ និងរួមចំណែកពង្រឹងមូលធនមនុស្សរបស់កម្ពុជាឱ្យកាន់តែរឹងមាំ៕
