លោក ដូណាល់ ត្រាំ ប្រធានាធិបតីអាម៉េរិកបាននិយាយទៅកាន់បណ្ដាមេដឹកនាំនៃក្រុមប្រទេស G7 ថា “លោកជាមេគេ” ខណៈរូបលោក និងមេដឹកនាំ G7 ផ្សេងទៀតទទួលស្គាល់ថា អ៊ុយក្រែនកំពុងមានភាពរីកចម្រើនក្នុងសង្រ្គាមជាមួយរុស្ស៉ី ខណៈសន្យាថានឹងដាក់ទណ្ឌកម្មថ្មីប្រឆាំងនឹងទីក្រុងមូស្គូ។ នេះបើយោងតាមការចេញផ្សាយដោយសារព័ត៌មាន Reuters។
លោក វ៉ូឡូឌីមៀ ហ្សេលេនស្គី ប្រធានាធិបតីអ៊ុយក្រែន និងសម្ព័ន្ធមិត្តអឺរ៉ុបរបស់លោកបានចូលរួមកិច្ចប្រជុំ G7 ជាមួយក្ដីសង្ឃឹមថា អាចបញ្ចុះបញ្ចូលឱ្យលោក ត្រាំ ជឿថាការតស៊ូរបស់អ៊ុយក្រែន កំពុងហុចលទ្ធផល ហើយរុស្ស៉ីកំពុងស្ថិតក្នុងគោលជំហរមួយដែលមិនអាចកំណត់លក្ខខណ្ឌសម្រាប់កិច្ចព្រមព្រៀងសន្តិភាពណាមួយនោះទេ។ នៅឯសន្និសីទសារព័ត៌មាន លោក ត្រាំ បាននិយាយថា រុស្ស៉ីបានបាត់បង់ចំនួនកងទ័ពច្រើនជាងអ៊ុយក្រែននៅក្នុងសង្រ្គាម ព្រមទាំងចាត់ទុករុស្ស៉ីជាភាគីដែលកំពុងបើកការវាយលុកក្នុងសង្រ្គាម។
គួរបញ្ជាក់ថាការលើកឡើងបែបនេះរបស់លោក ត្រាំ ត្រូវបានក្រុមមេដឹកនាំចាត់ទុកថាជាការផ្លាស់ប្ដូរពិតប្រាកដមួយរបស់លោក ត្រាំ។ តែទោះជាបែបនេះក្ដី ក្ដីសង្ឃឹមក្នុងការដាក់សម្ពាធឱ្យរុស្ស៉ីត្រឡប់ទៅរកតុចរចាសន្តិភាព នៅតែអាស្រ័យលើការប្ដេជ្ញាចិត្តរបស់លោក ត្រាំ ជាមនុស្សម្នាក់ដែលគេពិបាកព្យាករ និងជឿទុកចិត្ត៕
